ആദ്യത്തെ കുഞ്ഞിനെ വരവേറ്റതിന്റെ ആഹ്ലാ​ദത്തിലാണ് ബോളിവുഡ് താരം അനുഷ്കയും ക്രിക്കറ്റ്താരം വിരാട് കോലിയും. ഇക്കഴിഞ്ഞ പതിനൊന്നിനാണ് ഇരുവർക്കും പെൺകുഞ്ഞ് പിറന്നത്. ഇപ്പോഴിതാ കുഞ്ഞുമാലാഖയെ വരവേൽക്കാൻ വിരുഷ്ക ദമ്പതികൾ വീടൊരുക്കിയ വിശേഷങ്ങൾ സമൂഹമാധ്യമങ്ങളിൽ നിറയുകയാണ്. 

മുംബൈയിലെ വർളിയിലാണ് അനുഷ്ക-വിരാട് ദമ്പതികളുടെ ആഡംബര അപ്പാർട്മെന്റുള്ളത്. മിനിമലിസവും ലാളിത്യവും മുഖമുദ്രയാക്കിയ വീട്ടിൽ ജിമ്മും സ്പായും ഉൾപ്പെടെയുള്ള സൗകര്യങ്ങളുണ്ട്. 7000 ചതുരശ്ര അടിയിലാണ് വീട് സ്ഥിതി ചെയ്യുന്നത്. നിലവിലെ സവിശേഷതകൾക്ക് പുറമെ കുഞ്ഞുമാലാഖയെ വരവേൽക്കാൻ മറ്റു ചില പ്രത്യേകതകളും ഇരുവരും വീട്ടിലൊരുക്കിയിട്ടുണ്ട്. വോ​ഗിന് നൽകിയ അഭിമുഖത്തിലാണ് അനുഷ്ക ഇക്കാര്യങ്ങൾ പങ്കുവച്ചത്.

ആനിമൽ തീമിലാണ് അനുഷ്ക മകൾക്കായുള്ള മുറിയൊരുക്കിയിരിക്കുന്നതെന്ന് പറയുന്നു. റൂം ഡിസൈൻ ചെയ്യുന്നതിനായും പെർഫെക്റ്റ് ആക്കുവാനും ഏറെ സമയം നീക്കിവച്ചിരുന്നുവെന്നും അനുഷ്ക പറയുന്നു. മുറിയൊരുക്കുമ്പോൾ ശ്രദ്ധിച്ച പ്രധാന കാര്യം ലിം​ഗനിഷ്പക്ഷമാവണം എന്ന നിർബന്ധമായിരുന്നു എന്നും അനുഷ്ക പറയുന്നു. 

ആൺകുട്ടികൾ നീലനിറം ധരിക്കണമെന്നോ പെൺകുട്ടികൾ പിങ്ക് ധരിക്കണമെന്നോ താൻ കരുതുന്നില്ല. മകൾക്കൊരുക്കിയ നഴ്സറിയിൽ എല്ലാ നിറങ്ങളുമുണ്ട്. വിരാടിനും തനിക്കും മൃ​ഗങ്ങളെ ഏറെയിഷ്ടമാണ്, മകൾക്കും ആ സ്നേഹമുണ്ടാകണമെന്ന് കരുതുന്നു. അവ നമ്മുടെ ജീവിതത്തിൽ പ്രധാനസ്ഥാനം വഹിക്കുന്നവയാണ്, കുട്ടികൾക്ക് അനുകമ്പയും ദയയും പകരാൻ അവയ്ക്ക് കഴിയുമെന്ന് വിശ്വസിക്കുന്നു- അനുഷ്ക പറയുന്നു. 

Content Highlights: Anushka Sharma and Virat Kohli have added a new nursery for their child