അകത്തും പുറത്തും ഒരുപോലെ വെക്കാവുന്ന ചുരുക്കം ചില ചെടികളിലൊന്നാണ് അഡീനിയം. ചെടി തന്നെ കാണാന്‍ ഭംഗിയാണ്, പൂ അതിലേറെ. അതുകൊണ്ട് ഉദ്യാനപ്രേമികളുടെ ഇഷ്ടതാരമാണ് അഡീനിയം. പത്തുമുതല്‍ പതിനഞ്ച് അടിവരെ വളരുന്ന ഈ ചെടി മനോഹരമായി വെട്ടിയൊരുക്കി ചുരുങ്ങിയകാലം കൊണ്ട് ബോണ്‍സായ് ആക്കി മാറ്റാം. ഡസേര്‍ട്ട് റോസ്, ഇംപാലലില്ലി, കുടുമോക്ക് അസാലി, സബിസ്റ്റര്‍ എന്നിങ്ങനെ ചില പേരുകള്‍ കൂടി ഉണ്ട് ഇതിന്.
അഡീനിയം അറബിക്കം, അഡീനിയം ബോമിയാനം, അഡീനിയം മള്‍ട്ടിഫോറം, അഡീനിയം ഒബീസം, അഡീനിയം ഓലിഫോലിയം എന്നീ ഇനങ്ങള്‍ക്ക് പുറമേ നിരവധി ഹൈബ്രിഡുകളും വിവിധ തരത്തില്‍ ഗ്രാഫ്റ്റ് ചെയ്ത ചെടികളും വിപണിയിലുണ്ട്.
എങ്ങനെ വളര്‍ത്താം
ചട്ടിയിലെ മിശ്രിതം
രണ്ടുഭാഗം ചുവന്ന മണ്ണില്‍ ഒരുഭാഗം കോക്കോപീറ്റും ഒരു ഭാഗം തരിയുള്ള ആറ്റുമണലും ചേര്‍ക്കണം. ഇതിന്റെ കൂടെ പന്ത്രണ്ട് ഇഞ്ച് ചട്ടിക്ക് 10 ഗ്രാം ഡോളോമൈറ്റ് അല്ലെങ്കില്‍ കുമ്മായം കൂടി ചേര്‍ക്കാവുന്നതാണ്. ഈ മിശ്രിതത്തില്‍ എളുപ്പത്തില്‍ വേരുകള്‍ ആഴ്ന്നിറങ്ങും. വായുസഞ്ചാരം ലഭിക്കാനും എളുപ്പമാണ്.
ചട്ടികള്‍
ചട്ടികളുടെ വ്യാസം ചെടിയുടെ തടിച്ച ഭാഗത്തിന്റെ ഇരട്ടിയായിരിക്കണം. വെള്ളം എളുപ്പത്തില്‍ വാര്‍ന്നുപോകാന്‍ ചട്ടിയുടെ അടിഭാഗത്ത് രണ്ടോ മൂന്നോ ദ്വാരങ്ങള്‍ അത്യാവശ്യമാണ്.
വെള്ളവും വെളിച്ചവും
നല്ല സൂര്യപ്രകാശവും കുറച്ചു വെള്ളവും മതി ഇവ നന്നായി വളരാന്‍. സൂര്യപ്രകാശം നേരിട്ട് തണ്ടില്‍ അടിച്ചാല്‍ അവിടെ സൂര്യതാപം ഏല്‍ക്കാനും നിറം മങ്ങാനും ഇടയുള്ളതുകൊണ്ട് ചെറിയ തോതില്‍ ഷേഡ് കൊടുക്കുന്നത് നല്ലതാണ്. ഒരുപ്രാവശ്യം വെള്ളമൊഴിച്ചതിനു ശേഷം ചട്ടിയിലെ മിശ്രിതം ഉണങ്ങിയതിനുശേഷം ചട്ടിയിലെ മിശ്രിതം ഉണങ്ങിയതിനുശേഷം മാത്രമേ അടുത്ത ജലപ്രയോഗം പാടുള്ളു.
വളപ്രയോഗം
ഉണക്കിപ്പൊടിച്ച ചാണകപ്പൊടി, മണ്ണിര കമ്പോസ്റ്റ്, അരിച്ചെടുത്ത എല്ലുപൊടി, കോഴിക്കാഷ്ഠം എന്നിവ അഡീനിയത്തിന് പറ്റിയ വളങ്ങളാണ്. രണ്ടോ മൂന്നോ ആഴ്ച്ച കൂടുമ്പോള്‍ ഇവയില്‍ ഏതെങ്കിലുമൊന്ന് ചട്ടിയിലെ മണ്ണില്‍ കലര്‍ത്തി ഇളക്കി വെള്ളമൊഴിച്ചു കൊടുക്കണം.
പാക്യജനകം(നൈട്രജന്‍) കുറവുള്ള വളങ്ങളാണ് ഈ ചെടികള്‍ക്ക് പഥ്യം. വളര്‍ച്ചയുടെ ആദ്യഘട്ടത്തില്‍ എന്‍പികെ(101515) കൂട്ടുവളം അഞ്ചുഗ്രാം ഒരു ലിറ്റര്‍ വെള്ളത്തില്‍ ലയിപ്പിച്ച് സ്‌പ്രേ ചെയ്തു കൊടുക്കണം. പുഷ്പിക്കാന്‍ തുടങ്ങിയാല്‍ 19:19:19 മിശ്രിതം അഞ്ചുഗ്രാം ഒരുലിറ്റര്‍ വെള്ളത്തില്‍ ലയിപ്പിച്ച് മൂന്നാഴ്ച്ചയിലൊരിക്കല്‍ മിസ്റ്റ് സ്‌പ്രേ ചെയ്യുന്നത് നല്ലതാണ്. പച്ചച്ചാണകം ഒരുകിലോ പതിനഞ്ച് ലിറ്റര്‍ വെള്ളത്തില്‍ നല്ലവണ്ണം ലയിപ്പിച്ച് പതിനഞ്ച് ദിവസത്തോളം സൂക്ഷിച്ച് ഒരു ലിറ്റര്‍ പതിനഞ്ചു ലിറ്റര്‍ വെള്ളത്തില്‍ എന്ന കണക്കില്‍ കലക്കി ചെടിയുടെ ചുവട്ടില്‍ ഒഴിച്ചു കൊടുക്കാം.
ശിഖരം കോതല്‍
ഓരോ കൊല്ലവും മഞ്ഞുകാലത്തിനു മുമ്പായി നീണ്ടുമെലിഞ്ഞു വരുന്ന ശിഖരങ്ങള്‍ മൂര്‍ച്ചയുള്ള ബ്ലേഡു കൊണ്ടോ കത്തികൊണ്ടോ മുറിച്ചുമാറ്റണം. മുറിപ്പാടില്‍ ഫംഗസുകളെ നേരിടാന്‍ ഇന്‍ഡോഫില്‍ പേസ്റ്റ് പുരട്ടിക്കൊടുക്കാം. പ്രൂണിങ് നടത്തുന്നത് പുതിയ ശാഖകള്‍ വളരാനും കൂടുതല്‍ പുഷ്പങ്ങള്‍ ഉണ്ടാകാനും സഹായിക്കും.
ചട്ടി മാറ്റിവെക്കല്‍
ഒന്നോ രണ്ടോ കൊല്ലത്തിലൊരിക്കല്‍ അല്ലെങ്കില്‍ ചട്ടികളില്‍ വേരു നിറഞ്ഞ് കഴിയുമ്പോള്‍ ചെടി മാറ്റി നടണം. ചെടികള്‍ ചട്ടിയില്‍ നിന്ന് പറിച്ച് നല്ലവണ്ണം കഴുകി ആവശ്യമില്ലാത്ത വേരുകള്‍ മുറിച്ച് മാറ്റണം. ചെടി ഏതെങ്കിലും ആന്റി ഫംഗല്‍ ലായനിയില്‍ മുക്കി പത്ത് ദിവസത്തോളം വെയിലത്തു വെക്കണം. ചട്ടിയും നല്ലവണ്ണം കഴുകി വൃത്തിയാക്കണം.
രോഗങ്ങള്‍
രോഗങ്ങള്‍ താരതമ്യേന കുറവാണ് ഈ ചെടിക്ക്. അഫിഡ്, മീലിബഗ്, സ്‌പൈഡര്‍ മൈറ്റ്‌സ്, പച്ചത്തുള്ളന്‍ തുടങ്ങിയ അപൂര്‍വ പരാദങ്ങളെ കാണാവുന്നതാണ്. ഇവയെ പെറുക്കിക്കളയുകയോ അല്ലെങ്കില്‍ റോജര്‍ എന്ന കീടനാശിനി അഞ്ച് മില്ലിലിറ്റര്‍ ഒരു ലിറ്റര്‍ വെള്ളത്തില്‍ ലയിപ്പിച്ച് സ്‌പ്രേ ചെയ്തു കൊടുക്കുകയോ ചെയ്യാം.
വേരുചീയല്‍ ആണ് മറ്റൊരു പ്രധാന രോഗം. ഞെക്കി നോക്കിയാല്‍ ചീഞ്ഞ ഭാഗം ഞെങ്ങുന്നത് ശ്രദ്ധയില്‍പ്പെടും. ഉടനെതന്നെ അവയെ ചട്ടിയില്‍ നിന്ന് മാറ്റി ചീഞ്ഞഭാഗം നല്ല മൂര്‍ച്ചയുള്ള കത്തികൊണ്ട് ഹൈഡ്രജന്‍ പെറോക്‌സൈഡില്‍ മുക്കി മുറിച്ചുകളയുക. മുറിവായില്‍ ഇന്‍ഡോ പേസ്റ്റോ ബാവിസ്റ്റിന്‍ പേസ്റ്റോ പുരട്ടി വെയിലത്ത് ഒരാഴ്ച്ചയോളം വെക്കുക. അതിനുശേഷം മാത്രമേ ചട്ടിയില്‍ നടാവൂ.
കൊമ്പുണക്കം
അപൂര്‍വമായി കൊമ്പുകള്‍ ഉണങ്ങിപ്പോകാം. ഇത് ശ്രദ്ധയില്‍പ്പെട്ടാല്‍ ഉണങ്ങിയ ഭാഗം മുഴുവന്‍ മുറിച്ചുകളഞ്ഞ് മേല്‍പറഞ്ഞ പേസ്റ്റുകളിലൊന്നില്‍ മുറിവായില്‍ പുരട്ടി ചട്ടി വെയിലത്ത് വെക്കുക.
പ്രജനനം
ചെടികള്‍ മൂപ്പെത്തുമ്പോള്‍ പൂക്കങ്ങള്‍ കൊഴിഞ്ഞു വീണതിനുശേഷം അവയുടെ സ്ഥാനത്ത് പോത്തിന്‍ കൊമ്പുകള്‍ പോലെ വിത്തുസഞ്ചികള്‍ കാണാം. ഇവ മൂപ്പെത്തുമ്പോള്‍ പൊട്ടി വിത്തുകള്‍ പുറത്തുവരും. ഓരോ വിത്തിന്റെയും രണ്ടറ്റത്തും അപ്പൂപ്പന്‍താടി പോലെയുള്ള നാരുകള്‍ കാണാം. വിത്തുകള്‍ പൊട്ടി നഷ്ടപ്പെടാതിരിക്കാന്‍ ഇവ ഒന്നോ രണ്ടോ ചതഞ്ഞ നാരുകൊണ്ട് കെട്ടിയിടുകയോ അല്ലെങ്കില്‍ ഒരു പ്ലാസ്റ്റിക് ബാഗുകൊണ്ട് മൂടിക്കെട്ടുകയോ ചെയ്യാം. അല്ലെങ്കില്‍ വിത്തുകള്‍ പൊട്ടി പറന്നുപോകും. വിത്തുകള്‍ ശേഖരിച്ച് ഒരു പരന്ന ചട്ടിയില്‍ ഉണങ്ങിയ ചാണകപ്പൊടിയും ആറ്റുമണലും വിരിച്ച് അവയ്ക്കു മീതെ വിത്തുകള്‍ പരത്തിയിടുക. മീതെ നേരിയ കനത്തില്‍ മണല്‍ വിതറുന്നത് നന്നായിരിക്കും. നേരിയ തോതില്‍ വെള്ളം സ്‌പ്രേ ചെയ്തുകൊടുക്കണം. രണ്ടുനാല് ദിവസത്തിനുള്ളില്‍ വിത്തുകള്‍ മുളയ്ക്കും.
ഒരുമാസം കഴിഞ്ഞാല്‍ ചെറുചെടികള്‍, ചെടിയുടെ വലിപ്പമനുസരിച്ചുള്ള ചട്ടികളിലേക്ക് മാറ്റി നടാവുന്നതാണ്. കൊമ്പ മുറിച്ചും നടാം. വിവിധ തരത്തിലുള്ള ഗ്രാഫ്റ്റിംഗ് വഴി പുതിയ തൈകള്‍ ഉത്പാദിപ്പിക്കാം. ഏതൊരു ഉദ്യാനപ്രേമികള്‍ക്കും ഇഷ്ടപ്പെട്ട ഈ ചെടികളുടെ ശത്രു മഴയും അധിക ജലസേചനവുമാണെന്ന കാര്യം മറക്കാതിരിക്കുക.
ഗൃഹലക്ഷ്മിയില്‍ പ്രസിദ്ധീകരിച്ചത്‌
Content Highlights: Adenium Plants Care
