സംഭവബഹുലമായ എപ്പിസോഡുകള്‍ക്ക് ശേഷം ഹിമ ശങ്കര്‍ ബിഗ് ബോസിന്റെ പുറത്തേക്ക്. ബിഗ് ബോസില്‍ നിന്ന് നേരത്തേ പുറത്തുപോയ ഹിമ വൈല്‍ഡ് കാര്‍ഡ് എന്‍ട്രി വഴിയാണ് തിരിച്ചെത്തിയത്. പ്രേക്ഷകരുടെ അഭിപ്രായം മാനിച്ചായിരുന്നു ഹിമയെ തിരിച്ചെടുത്തത്. കഴിഞ്ഞ എപ്പിസോഡില്‍ സാബുവുമായി ഹിമ കടുത്ത വാക്കുതര്‍ക്കത്തില്‍ ഏര്‍പ്പെട്ടിരുന്നു. ഇനി മേലാല്‍ ഹൗസില്‍ മോശം വാക്കുകള്‍ ഉപയോഗിക്കരുതെന്ന് ഹിമയെയും സാബുവിനെയും അവതാരകന്‍ മോഹന്‍ലാല്‍ താക്കീത് ചെയ്തിരുന്നു.
മനസ്സില്‍ ഒന്നും സൂക്ഷിക്കാതെ തുറന്ന് പറയുന്നത് തന്റെ ബലഹീനതയാണെന്നും അതിനാലാണ് വീണ്ടും പുറത്തെത്തിയതെന്നും ഹിമ എലിമിനേഷന് ശേഷം പറഞ്ഞു.
'സാബുവുമായി എന്തോ ഒരു കണക്ഷന്‍ പോലെ തോന്നിയിരുന്നു. അത് പ്രണയമൊന്നുമല്ല. സാബുവിനോട് ആദ്യം കടുത്ത ദേഷ്യമായിരുന്നു. എന്നാല്‍ ആദ്യത്തെ തവണ പുറത്തായപ്പോള്‍ പതുക്കെ ആ വെറുപ്പ് മറ്റെന്തോ വികാരമായി. അതാണ് ഞാന്‍ തിരിച്ചുവന്നപ്പോള്‍ സാബുവിനോട് പ്രകടിപ്പിച്ചത്. എന്നെ വല്ലാതെ ദേഷ്യം പിടിപ്പിച്ചപ്പോഴാണ് ഞാന്‍ അദ്ദേഹവുമായി വഴക്കിട്ടത്. അവിടെ ഞാന്‍ തെറ്റിദ്ധരിക്കപ്പെട്ടു. എനിക്കൊരിക്കലും അഭിനയിക്കാന്‍ സാധിക്കുകയില്ല.'
പേളിയുടെ സ്വഭാവം ഒരുപാട് മാറിപ്പോയതായി തോന്നിയെന്നും ഹിമ പറഞ്ഞു.
'ഞാന്‍ ആദ്യം കണ്ട പേളിയെയല്ല തിരിച്ചു വന്നപ്പോള്‍ കണ്ടത്. അവര്‍ ആകെ മാറിപ്പോയിരിക്കുന്നു. വല്ലാതെ കണക്കുകൂട്ടി കളിക്കുന്ന ഒരു പ്ലെയര്‍ ആയി മാറിയിരിക്കുന്നു. പേളിയും ശ്രീനിഷും തമ്മില്‍ ശരിക്കും പ്രണയമുണ്ടോ എന്നൊന്നും എനിക്കറിയില്ല. അത് അവരുടെ കാര്യം'- ഹിമ പറഞ്ഞു.
