ഫോട്ടോ എഡിറ്റിങ് സോഫ്റ്റ്വെയറായ ഫോട്ടോഷോപ്പിന്റെ അനന്തസാധ്യതകള്‍ ഏറെയാണ്.  മാഗസിനുകളുടെയും മറ്റും കവര്‍ ഫോട്ടോകളില്‍  ഒരു പിഴവും കണ്ടെത്താന്‍ കഴിയാത്ത ജ്വലിക്കുന്ന സൗന്ദര്യത്തോടെയുള്ള താരങ്ങളുടെ ചിത്രങ്ങള്‍ കണ്ട് അസൂയപ്പെടാത്തവര്‍ കുറവാണ്. ഫോട്ടോഷോപ്പിന്റെ ഗുണമാണ് കാണുന്നതെന്ന് പലപ്പോഴും നമ്മളാരും ചിന്തിക്കാറ് പോലുമില്ല. എന്നാല്‍ ഫോട്ടോഷോപ്പിങ് അല്പം കൂടിയ പോയതിന്റെ പേരില്‍ ഓണ്‍ലൈനില്‍ പഴി കേള്‍ക്കുകയാണ് പ്രമുഖ ഫാഷന്‍ മാഗസിന്‍ ആയ വോഗ് ഇന്ത്യ. അതിന് ഇരയായത് ബോളിവുഡിന്റെ സ്വന്തം ബേബോ കരീന കപൂറും.

വോഗിന്റെ ഇന്‍സ്റ്റാഗ്രാം അക്കൗണ്ടില്‍ പോസ്റ്റ് ചെയ്ത ചിത്രത്തില്‍ ഓറഞ്ച് ബിക്കിനി അണിഞ്ഞ് സെക്‌സി ലുക്കിലാണ് കരീന പ്രത്യക്ഷപ്പെടുന്നത്. എന്നാല്‍, ചിത്രം കൂടുതല്‍ നന്നാക്കുക എന്ന ഉദ്ദേശത്തോടെ ഫോട്ടോഷോപ്പിലൂടെ പ്രസവാനന്തരമുണ്ടായ സ്ട്രെച്ച് മാര്‍ക്കുകള്‍  വരെ മായ്ച്ച് കളഞ്ഞിരുന്നു. ഇതാണ് ആരാധകരെ ചൊടിപ്പിച്ചത്. അടുത്തിടെ ഒരു കുഞ്ഞിന് ജന്മം നല്‍കിയ സ്ത്രീയ്ക്ക് ഒരിക്കലും ഇങ്ങനെ കോട്ടം തട്ടാതെ നില്‍ക്കാനാകില്ലെന്നും ഈ ചിത്രത്തില്‍ സ്ട്രെച്ച് മാര്‍ക്കുകളോ ചെറിയ രീതിയിലെങ്കിലും ചാടിയ വയറോ കാണാനില്ലെന്നാണ് ആരാധകര്‍ ചൂണ്ടി കാണിക്കുന്നത്. 

മാഗസിന്റെ കവറിന് വേണ്ടി ചിത്രം നന്നാക്കാം പക്ഷെ ഈ പ്രവര്‍ത്തി സമൂഹത്തില്‍ തെറ്റായസന്ദേശമാണ് നല്‍കുക എന്നും പ്രസവ ശേഷമുള്ള അമിതമായ വയറും തടിയും കളയാന്‍ കഷ്ടപ്പെടുന്ന അമ്മമാര്‍ക്ക് അത് മനഃപ്രയാസമുണ്ടാക്കുമെന്നും ചിലര്‍ ചൂണ്ടി കാണിക്കുന്നു. ഈ ചിത്രത്തിന് പകരം പ്രസവ ശേഷം തന്റെ ശരീരത്തിന് സംഭവിച്ച മാറ്റങ്ങളെ അതേ പോലെ അഭിമാനത്തോടെ  ലോകത്തെ കാണിക്കുന്ന ഒരമ്മയുടെ ചിത്രമായിരുന്നെങ്കില്‍ എത്ര നന്നായെന്നും ചിലര്‍ ചോദിക്കുന്നു.

ഇതാണ് നിങ്ങളുടെ കാഴ്ചപ്പാടില്‍ ഒരു യഥാര്‍ത്ഥ അമ്മയെങ്കില്‍ നിങ്ങള്‍ക്ക് നിങ്ങളുടെ അമ്മയെക്കുറിച്ചോര്‍ത്ത് വരെ നാണക്കേടായിരിക്കാമെന്നും നിങ്ങളെ ഓര്‍ത്ത് ലജ്ജ തോന്നുന്നുവെന്നും ഒരിക്കലും വോഗില്‍നിന്നും ഇത്തരം ഒരു പ്രവര്‍ത്തി പ്രതീക്ഷിച്ചില്ലെന്നുമാണ് പ്രേക്ഷകരുടെ പ്രതികരണം.

2016 ഡിസംബരിലാണ് കരീന തൈമൂറിന് ജന്മം നല്‍കിയത്. പ്രസവശേഷം പഴയ രൂപത്തിലേക്ക് തിരിച്ചു വരാന്‍ കഠിനമായ പരിശീലനം നടത്തിയിരുന്നു കരീന. ദിവസം പത്തു മണിക്കൂര്‍ വരെ കരീന വര്‍ക്ക് ഔട്ട് ചെയ്തിരുന്നുവെന്ന് മാധ്യമങ്ങള്‍ റിപ്പോര്‍ട്ട് ചെയ്തിരുന്നു. അതിനാല്‍ തന്നെ യാതൊരു ഉടവും തട്ടാതെയുള്ള ഈ ചിത്രം ഫോട്ടോഷോപ്പല്ലെന്ന് വാദിക്കുന്നവരുണ്ട്. എങ്കില്‍ പോലും ഒരു പ്രസവം കഴിഞ്ഞതിന്റെ യാതൊരു അടയാളവും ഇല്ലാതിരിക്കുക എന്നത് അസാധ്യമാണെന്നാണ് ഇതിനെതിരെ ഉയരുന്ന വാദം. എന്ത് തന്നെ ആയാലും ഈ വിഷയത്തില്‍ വോഗ് ഇന്ത്യയോ കരീനയോ ഇത് വരെ പ്രതികരണവുമായി വന്നിട്ടില്ല. 

Content Highlights : kareena kapoor sexy photoshoot vogue india faces fire online for heavily photoshopping stretch marks