ദിലീഷ് പോത്തന്‍ സംവിധാനം ചെയ്ത തൊണ്ടിമുതലും ദൃക്‌സാക്ഷിയും എന്ന ചിത്രത്തെ പ്രശംസിച്ച് സംവിധായകന്‍ സത്യന്‍ അന്തിക്കാട്. മലയാള സിനിമക്കെതിരെ പലരും ഉറഞ്ഞുതുള്ളുന്ന അവസ്ഥയില്‍ പ്രേക്ഷകര്‍ സിനിമ ഉപേക്ഷിക്കുമോ എന്ന് പേടിച്ചിരിക്കുമ്പോഴാണ് ചിത്രം കണ്ടതെന്ന് സത്യന്‍ അന്തിക്കാട് പറയുന്നു. തന്റെ ഫെയ്‌സ്ബുക്ക് പേജിലാണ് ചിത്രത്തിന്റെ അണിയറ പ്രവര്‍ത്തകരെയും ഫഹദ് ഫാസിലിനെയും പ്രശംസിച്ച് അന്തിക്കാട് രംഗത്ത് വന്നത്. ഫഹദ് ഫാസിലിന്റെ കള്ളനെ കണ്ടപ്പോള്‍ നോട്ടത്തിലും ഭാവത്തിലും ചലനത്തിലും ഇത്രയും കള്ളത്തരങ്ങള്‍ ഇവനെങ്ങനെ പഠിച്ചുവെന്ന് ഞാന്‍ അമ്പരന്നു. ലോക നിലവാരത്തിലേക്കുയരുന്ന പ്രകടനമാണ് ഫഹദിന്റേത്. സുരാജ്, നിമിഷ, അലന്‍സിയര്‍ എന്നിവര്‍ക്കൊപ്പം കാക്കിക്കുള്ളിലെ കലാകാരന്മാരും അഭിനയത്തിന്റെ അപൂര്‍വ തലങ്ങള്‍ കാണിച്ചു തന്നു-സത്യൻ അന്തിക്കാട് ഫെയ്സ്ബുക്കിൽ കുറിച്ചു.

സത്യന്‍ അന്തിക്കാടിന്റെ ഫെയ്‌സ്ബുക്ക് പോസ്റ്റ് 

ചില 'കാഴ്ച' പ്രശ്‌നങ്ങള്‍ കാരണം അല്‍പ്പം വൈകിയാണ് തൊണ്ടിമുതല്‍ കണ്ടത്. സന്ധ്യ കഴിഞ്ഞാല്‍ നമ്മുടെ സ്വീകരണ മുറികള്‍ ചാനല്‍ ചര്‍ച്ചകള്‍ കൊണ്ട് ചന്തപ്പറമ്പാകുന്ന കാലമാണ്. വാളും ചിലമ്പും കൊടുത്താല്‍ മദമിളകിയ ചിലര്‍ മലയാള സിനിമയ്ക്കെതിരെ ഉറഞ്ഞു തുള്ളുന്ന അവസ്ഥ. ഈ കോലാഹലം കണ്ട് സിനിമ കാണല്‍ തന്നെ മലയാളികള്‍ ഉപേക്ഷിക്കുമോ എന്ന് പേടിച്ചിരിക്കുമ്പോഴാണ് തൊണ്ടിമുതലിന്റെ വരവ്. 

കണ്ടപ്പോള്‍ മനസ്സില്‍ നിലാവ് പരന്നു. സിനിമ കഴിഞ്ഞപ്പോള്‍ കേട്ട കരഘോഷം തെളിയിച്ചത് പ്രേക്ഷകര്‍ ഇപ്പോഴും നല്ല സിനിമയ്ക്കൊപ്പമുണ്ട് എന്ന് തന്നെയാണ്. 'തൊണ്ടിമുതലും ദൃക്സാക്ഷിയും' എന്നെ അതിശയിപ്പിക്കുകയും ആഹ്ളാദിപ്പിക്കുകയും ചെയ്തു. അതിശയിപ്പിച്ചത് ഇത്ര ചെറിയ ഒരു വിഷയത്തില്‍ നിന്ന് ഒരു സിനിമയുണ്ടാക്കാന്‍ ദിലീഷ് പോത്തന്‍ കാണിച്ച ധൈര്യമോര്‍ത്താണ്. ആഹ്ളാദിപ്പിച്ചത് വി.കെ.എന്നിന്റെ ഭാഷയില്‍ പറഞ്ഞാല്‍, 'അവന്‍ അഭ്രത്തില്‍ ഒരു കാവ്യമായി മാറി' എന്നത് കൊണ്ടും. ദിലീഷ് പോത്തനും ശ്യാം പുഷ്‌കരനും രാജീവ് രവിയും സജീവ് പാഴൂരും ബിജിബാലും സന്ദീപ് സേനനുമൊക്കെ മലയാള സിനിമയ്ക്ക് നല്‍കിയത് വല്ലാത്തൊരു കരുത്താണ്.

ഫഹദ് ഫാസിലിന്റെ കള്ളനെ കണ്ടപ്പോള്‍ നോട്ടത്തിലും ഭാവത്തിലും ചലനത്തിലും ഇത്രയും കള്ളത്തരങ്ങള്‍ ഇവനെങ്ങനെ പഠിച്ചുവെന്ന് ഞാന്‍ അമ്പരന്നു. ലോക നിലവാരത്തിലേക്കുയരുന്ന പ്രകടനമാണ് ഫഹദിന്റേത്. സുരാജ്, നിമിഷ, അലന്‍സിയര്‍ എന്നിവര്‍ക്കൊപ്പം കാക്കിക്കുള്ളിലെ കലാകാരന്മാരും അഭിനയത്തിന്റെ അപൂര്‍വ തലങ്ങള്‍ കാണിച്ചു തന്നു. എണ്ണിയെണ്ണി പറയുന്നില്ല. മികച്ചതല്ലാത്ത ഒന്നുമില്ല ഈ സിനിമയില്‍. നന്ദി, ദിലീഷ് പോത്തന്‍ ! ഒരു മനോഹര സിനിമ കൊണ്ട് മനസ്സുണര്‍ത്തിയതിന്. ആരൊക്കെ എങ്ങനെയൊക്കെ തളര്‍ത്താന്‍ ശ്രമിച്ചാലും മലയാള സിനിമ മുന്നോട്ടു തന്നെ, എന്ന് പറയാതെ പറഞ്ഞതിന്.