17 May 2023, 10:30 AM IST

1 min read

Read later

പി.കെ.ആർ പിള്ള | PHOTO: FACEBOOK / MADHUPAL KANNAMBATH

മുംബൈ : പി.കെ.ആർ. പിള്ളയെ സിനിമാ നിർമാതാവാക്കി വളർത്തിയനഗരമാണ് മുംബൈ. വൻ ഹിറ്റുകൾ മലയാളത്തിന് സമ്മാനിച്ച പി.കെ.ആർ. പിള്ളയെ കൊണ്ടാടിയ സിനിമാലോകം തന്നെയാണ് അദ്ദേഹത്തെ അവസാനനാളുകളിൽ കൈയൊഴിഞ്ഞത്.

തൃശ്ശൂർ ജില്ലയിലെ പീച്ചിയിൽ ചൊവ്വാഴ്ചയാണ് അദ്ദേഹം അന്തരിച്ചത്. ശിർദി സായിബാബയുടെ ഭക്തനായിരുന്ന പിള്ള ആ പേരിലാണ് നിർമാണ കമ്പനിയൊരുക്കിയത് - ശിർദി സായി ക്രിയേഷൻസ്.

അവസാന കാലത്ത് അദ്ദേഹം അനുഭവിച്ചത് ദാരിദ്ര്യവും ഒറ്റപ്പെടലുമാണെന്ന് മുംബൈയിലെ അടുത്ത സുഹൃത്തുക്കൾ പറയുന്നു. എറണാകുളം കൂത്താട്ടുകുളം സ്വദേശിയായ പി.കെ.ആർ. പിള്ള വ്യാപാരാവശ്യങ്ങൾക്കായാണ് മുംബൈയിലെത്തിയത്. പിന്നീട് ഇൗ നഗരത്തിന്റെ ഭാഗമാകുകയായിരുന്നു. മുംബൈ മുനിസിപ്പാലിറ്റിയിലേക്ക് കോൺഗ്രസ് സ്ഥാനാർഥിയായി അദ്ദേഹം മത്സരിച്ചിട്ടുണ്ട്.

മുൻ പ്രധാനമന്ത്രി ഇന്ദിരാഗാന്ധിയുൾപ്പെടെയുള്ളവരോട് അദ്ദേഹംഅടുത്തബന്ധം പുലർത്തിയിരുന്നു.

സിനിമാ ഭ്രമംമൂലമാണ് മുംബൈ അന്ധേരിയിലുള്ള ഫാക്ടറി അദ്ദേഹത്തിന് നഷ്ടമായത്. സിനിമ നിർമിക്കാനായി ഫാക്ടറിയും അഞ്ചുനില ഒാഫീസ് ഉൾപ്പെടുന്ന കെട്ടിടസമുച്ചയവും വിൽക്കുകയായിരുന്നു. ഇന്ന് കോടികളാണ് ഇതിന്റെ വിപണി മൂല്യം. മുംബൈയിൽ അദ്ദേഹത്തിന് വീടും ഉണ്ടായിരുന്നു. സിനിമയോടൊപ്പം കുതിരപ്പന്തയത്തിലും ഒരുപോലെ മുഴുകിയത് പിള്ളയ്ക്ക് കനത്തസാമ്പത്തിക തിരിച്ചടിയുണ്ടാക്കിയതായി സുഹൃത്തുക്കൾ പറയുന്നു. സ്വത്തുകൾ എല്ലാം നഷ്ടമാവുകയും സാമ്പത്തിക പ്രതിസന്ധിയിൽ കുടുങ്ങുകയും ചെയ്തതോടെയാണ് പി.കെ.ആർ പിള്ള മുംബൈ വിട്ടത്.