നിവിന്‍ പോളിയെയും ആസിഫലിയും പ്രധാന കഥാപാത്രങ്ങളാക്കി എബ്രിഡ് ഷൈന്‍ ഒരുക്കുന്ന മഹാവീര്യര്‍ എന്ന ചിത്രത്തിന്റെ ചിത്രീകരണത്തിന് രാജസ്ഥാനില്‍ തുടക്കമായി. നര്‍മത്തില്‍ ചാലിച്ചു പറയുന്ന കഥയാണിത്.

ഏതാനും ഗാനരംഗങ്ങളാണ് പ്രധാനമായും രാജസ്ഥാനില്‍ ചിത്രീകരിക്കുന്നത്. ശാന്തി മാസ്റ്ററാണ് കോറിയോഗ്രാഫര്‍. തൃപ്പൂണിത്തുറയാണ് മറ്റൊരു ലൊക്കേഷന്‍.

എം.മുകുന്ദന്റെ കഥയ്ക്ക് തിരക്കഥയൊരുക്കുന്നത് എബ്രിഡ് ഷൈന്‍ തന്നയാണ്. പോളി ജൂനിയര്‍ ആന്‍ഡ് ഇന്തളന്‍ മൂവി മേക്കേഴ്‌സിന്റെ ബാനറില്‍ നിവിന്‍ പോളിയും ഷംനാസും ചേര്‍ന്നാണ് ചിത്രം നിര്‍മിക്കുക്കുന്നത്. കന്നഡയിലും തെലുങ്കിലും തിളങ്ങുന്ന ഷാന്‍വി ശ്രീവാസ്തവയാണ് നായിക.

പത്ത് വര്‍ഷത്തിനുശേഷമാണ് എബ്രിഡ് ഷൈനും നിവിന്‍ പോളിയും ആസിഫലിയും ഒരു ചിത്രത്തിനുവേണ്ടി ഒന്നിക്കുന്നത്. ആക്ഷന്‍ ഹീറോ ബിജുവിനുശേഷം ഇതാദ്യമായാണ് നിവിനും എബ്രിഡ് ഷൈനും ഒന്നിച്ച് ഒരു ചിത്രം ചെയ്യുന്നത്.

 സേതു സംവിധാനം ചെയ്യുന്ന മഹേഷും മാരുതിയും എന്ന ചിത്രത്തിനുശേഷമാവും ആസിഫലി എബ്രിഡ് ഷൈന്റെ ചിത്രത്തില്‍ ചേരുക.