02 June 2023, 03:40 PM IST

1 min read

Read later

മണിരത്നവും കമൽ ഹാസനും | ഫോട്ടോ: twitter.com/ikamalhaasan

അറുപത്തേഴാം പിറന്നാളാഘോഷിക്കുകയാണ് തെന്നിന്ത്യയുടെ പ്രിയസംവിധായകൻ മണിരത്നം. ചലച്ചിത്രരംഗത്തുനിന്നും നിരവധി പേരാണ് സംവിധായകന് പിറന്നാളാശംസകളുമായെത്തിയത്. അക്കൂട്ടത്തിൽ ഉലകനായകൻ കമൽ ഹാസൻ പിറന്നാളാശംസകൾ നേർന്നുകൊണ്ട് ട്വീറ്റ് ചെയ്ത കുറിപ്പ് ശ്രദ്ധനേടുകയാണ്.

ഒരാൾ അയാൾക്ക് ചുറ്റും സൃഷ്ടിക്കുന്ന സന്തോഷം കൊണ്ട് ജീവിതത്തെ കണക്കാക്കുകയാണെങ്കിൽ, നിങ്ങളുടെ ചുറ്റുമുള്ള സുഹൃത്തുക്കളാണ് പ്രായം കണക്കാക്കുന്നതെങ്കിൽ, എന്റെ പ്രിയപ്പെട്ട മണിരത്നം നിങ്ങൾ ഇന്ന് കൂടുതൽ പ്രായമുള്ള ഒരു മനുഷ്യനാകാൻ പോകുന്നുവെന്ന് കമൽ ട്വീറ്റ് ചെയ്തു. തന്റെ കലയിലൂടെ ദശലക്ഷക്കണക്കിന് ആളുകളുടെ ഹൃദയത്തെ സ്പർശിച്ച ഇന്ത്യൻ സിനിമയിലെ ഒരു കാരണവരെന്നും സംഭാഷണങ്ങളെ മനോഹരമായ ദൃശ്യാനുഭവമാക്കി മാറ്റിയ ഒരാളെന്നും കമൽ മണിരത്നത്തെ വിശേഷിപ്പിച്ചു.

"നിരന്തരമായി പഠിച്ചുകൊണ്ട് വെല്ലുവിളിയുടെ തോത് ശ്രദ്ധിക്കാതെ നിങ്ങൾ സിനിമയുടെ അതിരുകൾ നിരന്തരം ഭേദിച്ചു. ഇന്ന് നിങ്ങൾ അടുത്ത തലമുറയിലെ ചലച്ചിത്ര പ്രവർത്തകരെ പ്രചോദിപ്പിക്കുന്ന ഒരു മാസ്റ്ററാണ്. അവരിലൂടെ നിങ്ങളുടെ പൈതൃകം ശാശ്വതമായി പ്രതിഫലിക്കും. നായകൻ മുതൽ കമൽഹാസൻ 234 വരെയുള്ള ഞങ്ങളുടെ ഒരുമിച്ചുള്ള യാത്ര എനിക്ക് വ്യക്തിപരമായി ഒരു ബഹുമതിയാണ്." കമൽഹാസൻ കൂട്ടിച്ചേർത്തു.

2 ഭാഗങ്ങളിലായിറങ്ങിയ പൊന്നിയിൻ സെൽവൻ ആണ് മണിരത്നം സംവിധാനം ചെയ്ത ഒടുവിലത്തെ ചിത്രങ്ങൾ. കമൽ ഹാസൻ നായകനാവുന്ന കമൽഹാസൻ 234 ആണ് അദ്ദേഹത്തിന്റെ സംവിധാനത്തിൽ ഉടൻ ചിത്രീകരണം ആരംഭിക്കാനിരിക്കുന്ന ചിത്രം. 36 വർഷങ്ങൾക്കുശേഷം മണിരത്നവും കമൽഹാസനും ഒന്നിക്കുന്ന ചിത്രമാണിത്.