മുതിർന്ന തെലുഗുനടൻ സത്യനാരായണ അന്തരിച്ചു, Kaikala Satyanarayana passes away at 87 Veteran Telugu actor

24 December 2022, 10:14 AM IST

എൻ.ടി. രാമറാവുവിന്റെ ഡ്യൂപ്പായിട്ടായിരുന്നു സിനിമയിൽ തുടക്കംകുറിച്ചത്. 2009-ൽ പുറത്തിറങ്ങിയ 'അരുന്ധതി'യാണ് അഭിനയിച്ച അവസാനചിത്രം...

കൈകാല സത്യനാരായണ

ഹൈദരാബാദ്: ആറുപതിറ്റാണ്ടിലേറെ തെലുഗുസിനിമയിൽ നിറഞ്ഞുനിന്ന മുതിർന്ന നടൻ കെ. സത്യനാരായണ (കൈകാല സത്യനാരായണ - 87) അന്തരിച്ചു. വെള്ളിയാഴ്ച പുലർച്ചെ ഹൈദരാബാദിലെ വീട്ടിലായിരുന്നു അന്ത്യം. നായകനായും പ്രതിനായകനായും 800-ലേറെ ചിത്രങ്ങളിൽ വേഷമിട്ടു. സിനിമയ്ക്കൊപ്പം സാമൂഹികനാടകങ്ങളിലും അഭിനയിച്ചു. 1996-ൽ ആന്ധ്രയിലെ മസൂലിപട്ടണം മണ്ഡലത്തിൽനിന്ന് തെലുഗുദേശം പാർട്ടിയുടെ എം.പി.യായി. 1935-ൽ കൃഷ്ണ ജില്ലയിലാണ് ജനനം.

എൻ.ടി. രാമറാവുവിന്റെ ഡ്യൂപ്പായിട്ടായിരുന്നു സിനിമയിൽ തുടക്കംകുറിച്ചത്. 1959-ൽ പുറത്തിറങ്ങിയ ചങ്കയ്യയുടെ ‘സിപ്പായി കൂത്തുരു’ ആണ് ആദ്യസിനിമ. തുടർന്ന് നാഗേശ്വരറാവു, കൃഷ്ണ, ശോഭൻ ബാബു, ചിരഞ്ജീവി, നാഗാർജുന, മഹേഷ്‌ ബാബു തുടങ്ങി വിവിധതലമുറകളിലെ അഭിനേതാക്കൾക്കൊപ്പം പ്രധാനവേഷങ്ങളിൽ അഭിനയിച്ചു. 2009-ൽ പുറത്തിറങ്ങിയ 'അരുന്ധതി'യാണ് അഭിനയിച്ച അവസാനചിത്രം. കൊടമ സിംഹം, ബംഗാരുകുടുംബം, മുദ്ദുലുമുഗുഡു എന്നിവ രാമഫിലിംസിന്‍റെ ബാനറിൽ നിർമിച്ചു. 2017-ലെ ഫിലിംഫെയർ ലൈഫ്ടൈം അച്ചീവ്മെന്റ് അവാർഡ്, ആന്ധ്രസർക്കാരിന്‍റെ നന്ദി ഫിലിം അവാർഡ് എന്നിവയുൾപ്പെടെ ഒട്ടേറെ പുരസ്കാരങ്ങൾ ലഭിച്ചു.

മൃതദേഹം ഹൈദരാബാദിലെ ഫിലിംനഗറിലെ വീട്ടി‌ൽ പൊതുദർശനത്തിനുവെച്ചശേഷം ശനിയാഴ്ച സംസ്കരിക്കും. ഭാര്യ: നാഗേശ്വരമ്മ.സത്യനാരായണയുടെ നിര്യാണത്തിൽ തെലങ്കാന മുഖ്യമന്ത്രി കെ. ചന്ദ്രശേഖർ റാവു, ആന്ധ്രാ മുഖ്യമന്ത്രി ജഗൻമോഹൻ റെഡ്ഡി, മുൻ മുഖ്യമന്ത്രി ചന്ദ്രബാബു നായിഡു, നടന്മാരായ ചിരഞ്ജീവി, നാഗാർജുന, മഹേഷ്‌ ബാബു, ജൂനിയർ എൻ.ടി.ആർ. തുടങ്ങി ഒട്ടേറെപ്രമുഖർ അനുശോചിച്ചു.