27 May 2023, 02:38 PM IST

1 min read

Read later

ലൊക്കേഷനിൽ നിന്നും, 2018 പോസ്റ്റർ | PHOTO: FACEBOOK / JUDE ANTHANY

ബോക്സോഫീസിൽ ചരിത്രമെഴുതി ജൂഡ് ആന്തണി ചിത്രം '2018 Everyone Is A Hero'. ആഗോളതലത്തിൽ ബോക്സോഫീസിൽ നിന്ന് 150 കോടി രൂപ നേടുന്ന ആദ്യ മലയാള ചിത്രമെന്ന് നേട്ടം '2018' സ്വന്തമാക്കിയിരിക്കുകയാണ്. റിലീസ് ചെയ്ത് മൂന്ന് വാരം പിന്നിടുമ്പോഴാണ് ഈ ചരിത്ര നേട്ടം.

2018-ന്റെ നിർമാതാവ് വേണു കുന്നപ്പിള്ളിയാണ് ചിത്രത്തിന്റെ നേട്ടത്തെക്കുറിച്ച് ഫെയ്സ്ബുക്കിൽ പങ്കുവെച്ചത്. 150 കോടിക്കൊപ്പം നിൽക്കുമ്പോഴും താൻ തലകുനിച്ചു കൈകൂപ്പി പ്രേക്ഷകരെ വന്ദിക്കുന്നുവെന്ന് വേണു കുറിച്ചു. അതിരുകടന്ന ആഹ്ലാദമോ അഹങ്കാരമോ ഇല്ലെന്നും ഇതെല്ലാം ദെെവ നിശ്ചയമാണെന്നും നിർമാതാവ് പറഞ്ഞുയ

നേരത്തെ ലോകമൊട്ടാകെ ഏറ്റവുമധികം കളക്ഷൻ നേടുന്ന മലയാള ചിത്രമെന്ന നേട്ടം പുലിമുരുകനിൽ നിന്നും 2018 സ്വന്തമാക്കിയിരുന്നു. റിപ്പോർട്ടുകൾ പ്രകാരം 146 കോടി രൂപയാണ് പുലിമുരുകന്റെ കളക്ഷൻ. 2018 ഇൻഡസ്ട്രി ഹിറ്റിലേയ്ക്ക് നീങ്ങുന്ന കാഴ്ചയ്ക്കാണ് ബോക്സോഫീസ് സാക്ഷ്യം വഹിച്ചുകൊണ്ടിരിക്കുന്നത്. പുലിമുരുകന്റെ കേരള ഗ്രോസ് ദിവസങ്ങൾക്കുള്ളിൽ 2018 മറികടക്കുമെന്നാണ് ആരാധകരുടെ പ്രതീക്ഷ.

ടൊവിനോ തോമസ്, കുഞ്ചാക്കോ ബോബൻ, ആസിഫ് അലി, വിനീത് ശ്രീനിവാസൻ, ഇന്ദ്രൻസ്, ലാൽ, നരേൻ, അപർണ്ണ ബാലമുരളി, തൻവി റാം, സുധീഷ്, സിദ്ദിഖ്, രഞ്ജി പണിക്കർ, ജാഫർ ഇടുക്കി, അജു വർഗ്ഗീസ്, ജിബിൻ ഗോപിനാഥ്, ഡോക്ടർ റോണി, ശിവദ, വിനിതാ കോശി തുടങ്ങി മലയാളത്തിലെ മുൻനിരതാരങ്ങളെ അണിനിരത്തി നടനും സംവിധായകവനും നിർമ്മാതാവുമായ ജൂഡ് ആന്തണി ജോസഫ് സംവിധാനം നിർവ്വഹിച്ച '2018 Everyone Is A Hero' മെയ് അഞ്ചിനാണ് തിയേറ്ററുകളിൽ എത്തിയത്.

'കാവ്യാ ഫിലിംസ്', 'പി കെ പ്രൈം പ്രൊഡക്ഷൻസ് 'എന്നിവയുടെ ബാനറിൽ വേണു കുന്നപ്പള്ളി, സി കെ പത്മകുമാർ, ആന്റോ ജോസഫ് എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. അഖിൽ പി ധർമജന്റെതാണ് സഹതിരക്കഥ. അഖിൽ ജോർജ്ജാണ് ഛായാഗ്രാഹകൻ. ചമൻ ചാക്കോ ചിത്രസംയോജനം നിർവ്വഹിക്കുന്ന ചിത്രത്തിന്റെ സംഗീതം നോബിൻ പോളും സൗണ്ട് ഡിസൈൻ വിഷ്ണു ഗോവിന്ദുമാണ് കൈകാര്യം ചെയ്തിരിക്കുന്നത്.