29 May 2023, 09:27 PM IST

1 min read

Read later

2018 സിനിമയുടെ പോസ്റ്റർ | ഫോട്ടോ: www.facebook.com/akhilpdharmajan

മലയാളത്തിലെ ഈ വർഷത്തെ മെഗാ ഹിറ്റ് ചിത്രമാണ് 2018. പ്രളയത്തിന്റെ കഥ പറഞ്ഞ ചിത്രം ബോക്സോഫീസിലെ റെക്കോഡുകളെല്ലാം തകർത്തുകൊണ്ട് മുന്നേറുകയാണ്. ഇപ്പോഴിതാ തിയേറ്ററുകളിൽ കുതിക്കുന്ന ഈ ജൂഡ് ആന്തണി ചിത്രം ഒ.ടി.ടി റിലീസിനൊരുങ്ങുകയാണ്.

ജൂൺ ഏഴിന് ചിത്രം ഒ.ടി.ടിയിലെത്തും. സോണി ലിവിലൂടെയാണ് ചിത്രം സ്ട്രീം ചെയ്യുക. സോണി ലിവ് ഫെയ്ബുക്കിലൂടെയാണ് ചിത്രത്തിന്റെ ഒ.ടി.ടി റിലീസ് ഔദ്യോഗികമായി പ്രഖ്യാപിച്ചത്.

സമീപകാലത്ത് ഒരു മലയാള സിനിമയ്ക്കും ലഭിക്കാത്ത തരത്തിലുള്ള പ്രതികരണമാണ് ആദ്യ ദിനം മുതൽ ‘2018’ നേടിയത്. കേരളത്തിന് പുറത്ത് യുഎഇയിലും ജിസിസിയിലുമാണ് മലയാള ചിത്രങ്ങൾ സാധാരണ മികച്ച പ്രതികരണം നേടാറുള്ളത്. എന്നാൽ ‘2018’ യുഎസിലും യൂറോപ്പിലുമൊക്കെ വലിയ വിജയമായി മാറുകയാണ്. സൗത്ത് കൊറിയയിൽ ഈയിടെ ചിത്രം റിലീസ് ചെയ്തിരുന്നു.

ടൊവിനോ തോമസ്, കുഞ്ചാക്കോ ബോബൻ, ആസിഫ് അലി, വിനീത് ശ്രീനിവാസൻ, കലൈയരസൻ, ഇന്ദ്രൻസ്, ലാൽ, നരേൻ, അപർണ്ണ ബാലമുരളി, തൻവി റാം, സുധീഷ്, സിദ്ദിഖ്, അജു വർഗ്ഗീസ്, ജിബിൻ ഗോപിനാഥ്, ഡോക്ടർ റോണി, ശിവദ, വിനിതാ കോശി തുടങ്ങിയവരാണ് പ്രധാനതാരങ്ങൾ. 'കാവ്യാ ഫിലിംസ്', 'പി കെ പ്രൈം പ്രൊഡക്ഷൻസ് 'എന്നിവയുടെ ബാനറിൽ വേണു കുന്നപ്പിള്ളി, സി കെ പത്മകുമാർ, ആന്റോ ജോസഫ് എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. അഖിൽ പി ധർമജന്റെതാണ് സഹതിരക്കഥ.

മെയ് അഞ്ചിനാണ് ചിത്രം റിലീസ് ചെയ്തത്. ആഗോളതലത്തിൽ ഏറ്റവുമധികം കളക്ഷൻ നേടുന്ന മലയാള ചിത്രമെന്ന ഖ്യാതി 2018 നേടിയിരുന്നു.