ടി ആക്രമിക്കപ്പെട്ട സംഭവത്തില്‍ കുറ്റാരാപിതനായ നടന്‍ ദിലീപിനെ താരസംഘടനയായ അമ്മയില്‍ തിരിച്ചെടുത്തതില്‍ പ്രതികരണവുമായി സംവിധായകനും നടനുമായ ജോയ് മാത്യു. ജോയ്മാത്യു.കോം എന്ന വെബ്‌സൈറ്റിലാണ് അദ്ദേഹത്തിന്റെ പ്രതികരണം. സംഘടനയ്ക്കുള്ളിലെ കാര്യങ്ങള്‍ പരസ്യമായി ചര്‍ച്ച ചെയ്യാത്തതില്‍ കുറ്റപ്പെടുത്താന്‍ ആകില്ലെന്നും അതേ സമയം സംഘടനയില്‍ വിശ്വാസമില്ലാത്തവര്‍ക്ക് രാജിവച്ചു പുറത്തു പോകാന്‍ അവകാശമുണ്ടെന്നും ജോയ് മാത്യു വ്യക്തമാക്കുന്നു. 

അമ്മയെ ശക്തമായി വിമര്‍ശിച്ച് കമ്മ്യൂണിസ്റ്റ് നേതാക്കള്‍ രംഗത്ത് വന്ന സാഹചര്യത്തില്‍ ഇടതുപക്ഷ എം.പിയായ ഇന്നസെന്റ്, ഇടതുപക്ഷ എം.എല്‍.എമാരായ മുകേഷ്, ഗണേഷ് കുമാര്‍ എന്നിവര്‍ ഇക്കാര്യത്തില്‍ എന്ത് നിലപാടെടുക്കും എന്നറിയാന്‍ തനിക്ക് താല്‍പര്യമുണ്ടെന്നും ജോയ് മാത്യു കൂട്ടിച്ചേര്‍ത്തു. 

ജോയ് മാത്യുവിന്റെ കുറിപ്പ് വായിക്കാം

'ദാ ഇപ്പൊ ശരിയാക്കിത്തരാം''എന്നത് സിനിമയിലെ കുതിരവട്ടം പപ്പുവിന്റെ ഡയലോഗ് ആയിരിക്കാം എന്നാല്‍ അത് ശരിക്കും നമ്മളെ വിശ്വസിപ്പിച്ചത് എല്ലാം ശരിയാക്കാം എന്ന് ഇടതുപക്ഷം പറഞ്ഞപ്പോഴാണ്. ഞാനും അത് വിശ്വസിച്ച് അതോടൊപ്പം നിന്നു. അതാണല്ലോ അതിന്റെ ഒരു ശരി.

''അമ്മ'' എന്നത് ഞാന്‍ കൂടി തൊഴിലെടുക്കുന്ന മേഖലയിലെ ഒരു സംഘടനയാണ്. അതില്‍ മുതലാളിമാര്‍ മുതല്‍ ക്ലാസ് ഫോര്‍ ജീവനക്കാര്‍ വരെയുണ്ട്, നമ്മുടെ രാഷ്ട്രീയ പാര്‍ട്ടികളെപ്പോലെയൊക്കെത്തന്നെ. അംഗങ്ങളുടെ ക്ഷേമപ്രവര്‍ത്തനങ്ങള്‍ക്ക് വേണ്ടി നിലകൊള്ളുന്ന ഒരു സംഘടനയാണ് അത് - സംഘടനക്കുള്ളിലെ പ്രശ്‌നങ്ങള്‍ സംഘടനക്കുള്ളില്‍ അവതരിപ്പിക്കുകയും ചര്‍ച്ച ചെയ്യുകയും പരിഹരിക്കുകയും ചെയ്യലാണല്ലോ ജനാധിപത്യരീതി. രാഷ്ട്രീയ പാര്‍ട്ടികള്‍ തുടങ്ങി പത്രപ്രവത്തക യൂണിയനില്‍ വരെ നടക്കുന്ന കാര്യങ്ങള്‍ സംഘടനക്കു പുറത്ത് ചര്‍ച്ച ചെയ്യാറില്ലല്ലോ. ഇതും അതുപോലെ കണ്ടാല്‍ മതി. സംഘടനയില്‍ വിശ്വാസമില്ലാത്തവര്‍ക്ക് രാജിവെക്കുന്നതിനും അവകാശമുണ്ട്.

അങ്ങിനെ ''അമ്മ'' യിലെ നാല് അംഗങ്ങള്‍ രാജി വെച്ചതിന്റെ പശ്ചാത്തലത്തില്‍ എന്റെ പ്രതികരണം എന്തുകൊണ്ട് വന്നില്ല എന്ന് സ്വാഭാവികമായും എന്നെ അറിയുന്നവരും ചൊറിയുന്നവരും ചോദിച്ചു. അതിന്റെ അടിസ്ഥാനത്തില്‍ എനിക്ക് പറയുവാനുള്ളത് ഇതാണ്. നേരത്തെ ഞാന്‍ പറഞ്ഞല്ലോ, എല്ലാം ശരിയാവും എന്ന് വിശ്വസിച്ച് പോയ ഒരാളെന്ന നിലക്ക് രാജിവെച്ച്  പുറത്തുപോയ നടികളെ അനുമോദിച്ചും പിന്തുണച്ചും മുതിര്‍ന്ന കമ്മ്യൂണിസ്‌റ് നേതാവ് ബഹുമാനപ്പെട്ട വി.എസ്, പാര്‍ട്ടി സഖാക്കളായ എം.എ ബേബി, ധനകാര്യ മന്ത്രി ശ്രീ തോമസ് ഐസക്, ശ്രീ കാനം രാജേന്ദ്രന്‍ തുടങ്ങിയവര്‍ രാജിവെച്ച നടികള്‍ക്ക് പിന്തുണയുമായി രംഗത്ത് വന്നു.

ഇത്തരുണത്തില്‍ സംഘടനയുടെ പ്രസിഡന്റ് കൂടിയായിരുന്ന ഇടതുപക്ഷ എം.പി യായ സഖാവ് ഇന്നസെന്റ്, ഇടതുപക്ഷ എം.എല്‍.എമാരായ ശ്രീ മുകേഷ്, ശ്രീ ഗണേഷ് കുമാര്‍ എന്നിവര്‍ ഇക്കാര്യത്തില്‍ എന്ത് നിലപാടെടുക്കും എന്ന് ഉറ്റു നോക്കുന്ന ഒരു ക്ലാസ് ഫോര്‍ ജീവനക്കാരനാണ് ഞാന്‍. അവര്‍ എടുക്കുന്ന നിലപാട് അറിഞ്ഞിട്ടു വേണം എനിക്കൊരു തീരുമാനമെടുക്കാന്‍. താമസിയാതെ അതുണ്ടാവും എന്ന് മാത്രം ഇപ്പോള്‍ പറയാം.