അങ്കമാലി ഡയറീസിനുശേഷം മലയാളത്തെ ഞെട്ടിക്കാന്‍ വീണ്ടും വരികയാണ് ലിജോ ജോസ് പെല്ലിശ്ശേരി. ഒരു കൊച്ചു ചിത്രം എന്നാണ് അവകാശവാദമെങ്കിലും ഞെട്ടിക്കുന്നൊരു പേരു തന്നെയാണ് തന്റെ ആറാമത്തെ ചിത്രത്തിന് പെല്ലിശ്ശേരി നല്‍കിയിരിക്കുന്നത്. 'ഈ മ യൗ'. ഈശോ മറിയം ഔസേപ്പിന്റെ ചുരുക്കം.
പേരു മാത്രമല്ല, ചിത്രത്തിന്റെ പോസ്റ്ററും ഏറെ ശ്രദ്ധേയമാണ്. മീന്‍പിടുത്തക്കാരുടെ കഥയാണ് പറയുന്നത് എന്ന സൂചന നല്‍കുന്ന പോസ്റ്ററില്‍ തീരത്തെ മത്സ്യബന്ധന ബോട്ടുകള്‍ക്കൊപ്പം ഒരു പടുകൂറ്റന്‍ ശവപ്പെട്ടിയും കിടക്കുന്നതാണ് പോസ്റ്ററില്‍ കാണിച്ചിരിക്കുന്നത്. ഇതിനൊപ്പം ലിജോ കുറിച്ചു: പുതിയ സിനിമ തുടങ്ങി. ഒരു കൊച്ചു സിനിമ. ഒരുപാട് ഇഷ്ടമുള്ള സിനിമ.
ചെമ്പന്‍ വിനോദ്, വിനായകന്‍, ദിലീഷ് പോത്തന്‍ എന്നിവരാണ് ചിത്രത്തിലെ പ്രധാന താരങ്ങള്‍. രാജേഷ് ജോര്‍ജ് കുളങ്ങര നിര്‍മിക്കുന്ന ചിത്രത്തിന്റെ രചന പി.എഫ്. മാത്യൂസാണ്. ഷൈജു ഖാലിദാണ് ക്യാമറ. പ്രശാന്ത് പിള്ളയാണ് സംഗീത സംവിധായകന്‍.
