01 June 2023, 04:33 PM IST

1 min read

Read later

റാണ ദഗ്ഗുബട്ടി, ദുൽഖർ സൽമാൻ | ഫോട്ടോ: www.facebook.com/RanaDaggubati, ഷാനി ഷാകി | മാതൃഭൂമി

സീതാരാമം സൂപ്പർ ഹിറ്റായതോടെ കൂടുതൽ അന്യഭാഷാ ചിത്രങ്ങൾ ദുൽഖർ സൽമാനെ തേടിവരികയാണ്. തമിഴിലും തെലുങ്കിലും ഒരേസമയം ചിത്രീകരിക്കുന്ന ഒരു വമ്പൻ ചിത്രത്തിൽ ദുൽഖർ നായകനാവുന്നു എന്ന വാർത്തയാണ് ഇപ്പോൾ പുറത്തുവരുന്നത്. ദേശീയ മാധ്യമങ്ങൾ പുറത്തുവിട്ടതാണ് ഇക്കാര്യം.

മലയാളികൾക്കും സുപരിചിതനായ തെലുങ്ക് താരം റാണാ ദഗ്ഗുബട്ടിയും ദുൽഖർ സൽമാനും ആദ്യമായി ഒരുമിക്കുന്ന ചിത്രമാണ് ഇത്. പക്ഷേ ചിത്രത്തിൽ റാണ അഭിനേതാവല്ല, നിർമാതാവാണെന്നുമാത്രം. റാണയുടെ നിർമാണക്കമ്പനിയായ സ്പിരിറ്റ് മീഡിയ നിർമിക്കുന്ന ചിത്രത്തിലാണ് ദുൽഖർ നായകനാവുന്നത്. തമിഴിലെ പ്രശസ്ത നടനും സംവിധായകനുമായ സമുദ്രക്കനിയാണ് ചിത്രത്തിലെ മറ്റൊരു നിർണായകവേഷത്തിലെത്തുന്നത്.

സിനിമയുടെ ഔദ്യോഗിക പ്രഖ്യാപനം റാണയുടെ മുത്തച്ഛനും ചലച്ചിത്രനിർമാതാവുമായ ഡി. രാമനായിഡുവിന്റെ ജന്മദിനമായ ജൂൺ ആറിനുണ്ടാവുമെന്നാണ് റിപ്പോർട്ട്. ഏറ്റവും കൂടുതൽ ചിത്രങ്ങൾ നിർമിച്ചയാളെന്ന പേരിൽ ഗിന്നസ് ബുക്കിൽ ഇടംപിടിച്ചയാളാണ് രാമനായിഡു. അഭിലാഷ് ജോഷി സംവിധാനം ചെയ്യുന്ന കിംഗ് ഓഫ് കൊത്തയുടെ ജോലികൾ പൂർത്തിയായാലുടൻ ദുൽഖർ ചെയ്യുന്നത് ഈ ചിത്രമായിരിക്കുമെന്നാണ് വിവരം.

നിലവിൽ പരേശാൻ എന്ന ചിത്രത്തിന്റെ റിലീസുമായി ബന്ധപ്പെട്ട തിരക്കുകളിലാണ് റാണ. സ്പിരിറ്റ് മീഡിയ നിർമിക്കുന്ന ചിത്രം രൂപക് റൊണാൾഡ്സൺ ആണ് സംവിധാനം ചെയ്യുന്നത്. പവനി കാരണം, തിരുവീർ, ബണ്ണി അബിരാൻ, സായി പ്രസന്ന എന്നിവരാണ് പരേശാനിലെ മറ്റുതാരങ്ങൾ. ചിത്രം ഈ മാസം രണ്ടിന് തിയേറ്ററുകളിലെത്തും.