എല്ലാം കള്ളക്കണക്കുകള്‍; 'ബ്രഹ്മാസ്ത്രയ്‌ക്കെ'തിരേ കങ്കണ 

ബോക്‌സ് ഓഫീസ് ഇന്ത്യ തനിക്കെതിരേ കാമ്പയിന്‍ നടത്തുകയാണ്. ബ്രഹ്മാസ്ത്ര ഒരു ദിവസം കൊണ്ട് അവര്‍ ഹിറ്റാക്കി. തിയേറ്ററില്‍ വിജയമായ മണികര്‍ണിക എന്ന ചിത്രത്തെ പരാജയമായി ചിത്രീകരിച്ചു. തലൈവിയെയും സമാനമായി ചിത്രീകരിച്ചു. ധാക്കട് റിലീസ് ചെയ്തപ്പോഴും അത് തുടര്‍ന്നു. എനിക്ക് ഈ കണക്കുകള്‍ മനസ്സിലാകുന്നില്ല. ഞാന്‍ ഗൂഢാലോചനയില്‍ പങ്കാളിയാകാറില്ല, മറ്റുള്ളവരെ പിറകില്‍ നിന്ന് കുത്തുകയുമില്ല- കങ്കണ കൂട്ടിച്ചേര്‍ത്തു.

നേരത്തേയും ബ്രഹ്മാസ്ത്രയ്‌ക്കെതിരേ കങ്കണ രംഗത്ത് വന്നിരുന്നു. സംവിധായകന്‍ 600 കോടിരൂപ ചാരമാക്കിയെന്നാണ് കങ്കണ പറഞ്ഞത്.
നിര്‍മാതാവ് കരണ്‍ ജോഹറിനെയാണ് അവര്‍ ആദ്യം കടന്നാക്രമിച്ചത്. സ്വഭാവത്തിന്റെ കാര്യത്തില്‍ കരണ്‍ ജോഹറിനേപ്പോലെയുള്ളവരെ ആദ്യം ചോദ്യം ചെയ്യണം. അദ്ദേഹത്തിന് തിരക്കഥയേക്കാള്‍ മറ്റുള്ളവരുടെ ലൈംഗിക ജീവിതത്തേക്കുറിച്ചറിയാനാണ് താത്പര്യം. വ്യാജ കളക്ഷന്‍ കണക്കുകളുണ്ടാക്കുകയും സിനിമയുടെ പ്രചാരണത്തിനെ ദക്ഷിണേന്ത്യയില്‍ നിന്നുള്ള താരങ്ങളെ കൂട്ടുപിടിക്കുകയും ചെയ്യുന്നുവെന്നും കങ്കണ പറഞ്ഞു.

നല്ലൊരു എഴുത്തുകാരനെയോ സംവിധായകനെയോ താരങ്ങളെയോ മറ്റു പ്രതിഭാധനരയോ വിലക്കെടുക്കുന്നത് ഒഴിച്ച് അവര്‍ വേറെയെന്തും ചെയ്യും. യാചിക്കാന്‍ പോകുന്നതിന് പകരം അവര്‍ എന്തുകൊണ്ട് ബ്രഹ്മാസ്ത്രയെ പോലെ ഒരു ദുരന്തത്തിലെ പ്രശ്‌നങ്ങള്‍ പരിഹരിച്ചില്ലെന്നും കങ്കണ ചോദിച്ചു.

സംവിധായകന്‍ അയാന്‍ മുഖര്‍ജിയേയും കങ്കണ രൂക്ഷമായി വിമര്‍ശിച്ചു. അയാന്‍ മുഖര്‍ജിയെ ജീനിയസ് എന്നുവിളിക്കുന്നവരെയെല്ലാം എത്രയും പെട്ടന്ന് ജയിലിലടക്കണമെന്ന് അവര്‍ പറഞ്ഞു. 12 വര്‍ഷമാണ് ഈ സിനിമ പൂര്‍ത്തിയാക്കാന്‍ അയാന്‍ എടുത്തത്. 400 ദിവസമെടുത്തു ചിത്രീകരിക്കാന്‍. ഇതിനിടയില്‍ 14 ഛായാഗ്രാഹകരെ മാറി പരീക്ഷിച്ചു. എന്നിട്ട് 600 കോടി ചാരമാക്കി. മതവികാരം മുതലെടുക്കാന്‍ 'ജലാലുദ്ദീന്‍ റൂമി' എന്നതില്‍ നിന്നും 'ശിവ' എന്നതിലേക്ക് അവസാന നിമിഷം പേര് മാറ്റി. ബാഹുബലിയുടെ വിജയമാണ് ഇതിന് കാരണം. ഇത്തരം അവസരവാദികളെ, സര്‍ഗ്ഗാത്മക ദാരിദ്രം പിടിച്ചവരെ, വിജയം തലക്കുപിടിച്ച സ്വാര്‍ത്ഥരായ മനുഷ്യരെ പ്രതിഭയെന്ന് വിളിച്ചാല്‍ അത് പകലിനെ രാത്രിയെന്നും രാത്രിയെ പകലെന്നും വിളിക്കുന്നതിന് തുല്യമാണ്.

നമ്മുടെ സിനിമകളുമായി സമീപിക്കാന്‍ ഇന്നീ രാജ്യത്ത് ഒരൊറ്റ അന്താരാഷ്ട്ര സ്റ്റുഡിയോയും നിലവിലില്ല. സിനിമാ മാഫിയാ സംഘം ഈ വ്യവസ്ഥിതി മുഴുവനായും കൈയ്യടക്കി എല്ലാം തരിപ്പണമാക്കിയെന്നും അവര്‍ പറഞ്ഞു. ഫോക്‌സ് സ്റ്റാര്‍ സ്റ്റുഡിയോ ഈ സിനിമയ്ക്കുവേണ്ടി എല്ലാം നഷ്ടപ്പെടുത്തിയെന്നും ഇനിയും എത്ര സ്റ്റുഡിയോകള്‍ ഈ കോമാളികള്‍ കാരണം പൂട്ടുമെന്നും ഫിലിം അനലിസ്റ്റ് സുമിത് കേഡലിന്റെ ട്വീറ്റ് പങ്കുവെച്ചുകൊണ്ട് കങ്കണ ചോദിച്ചു. എന്നാല്‍ ഈ ട്വീറ്റ് വ്യാജമാണെന്ന് വ്യക്തമാക്കി സുമിത് രംഗത്തെത്തുകയും ചെയ്തു.

എമര്‍ജന്‍സിയാണ് കങ്കണയുടേതായി വരാനിരിക്കുന്ന ചിത്രം. നടി തന്നെയാണ് ഈ ചിത്രം സംവിധാനം ചെയ്യുന്നത്. ഇന്ദിരാഗാന്ധിയായാണ് കങ്കണ എമര്‍ജന്‍സിയിലെത്തുന്നത്.