സംഗീതത്തിലൂടെ സാന്ത്വനം, 'നിർവാണ'യുമായി ശങ്കർ മഹാദേവൻ

ശങ്കർ മഹാദേവന്റെ നേതൃത്വത്തിൽ ഇതിനകം 125 പരിപാടികൾ നടത്തുകയും മൂന്നര ലക്ഷത്തിലധികം രോഗികൾക്ക് സാന്ത്വനം നൽകുകയും ചെയ്തിട്ടുണ്ട്. എഴുപതിലധികം എൻജി.ഒകളിലൂടെയും അഭയകേന്ദ്രങ്ങളിലൂടെയും സാമൂഹികകേന്ദ്രങ്ങളിലൂടെയും 78 കലാകാരന്മാർ ഇതിനകം സംഗീതമേള നടത്തുകയുണ്ടായി.

മരണകാരണമാകാവുന്ന രോഗങ്ങളുമായി മല്ലിട്ട് അഭയകേന്ദ്രങ്ങളിൽ കഴിയുന്നവർ, കാൻസർ ബാധിതരും കാൻസർ മുക്തരും, ഓൾഡ് ഏജ് ഹോമിൽ കഴിയുന്നവർ, കുടുംബത്തിന്റെയോ സമൂഹത്തിന്റെയോ പിന്തുണയില്ലാത്ത കുട്ടികൾ, ശാരീരികമോ മാനസികമോ ആയി ബുദ്ധിമുട്ട് അനുഭവിക്കുവർ, വിഷാദരോഗികൾ, മാനസികരോഗികൾ, സെക്‌സ് വർക്കേഴ്‌സിന്റെ മക്കൾ, കുടുംബത്തിൽനിന്നോ സമൂഹത്തിൽനിന്നോ സുഹൃത്തുക്കളിൽനിന്നോ ഒറ്റപ്പെട്ടുപോയ മുതിർന്നവർ തുടങ്ങിയവർക്ക് സംഗീതത്തിലൂടെ സ്വാന്ത്വനം നൽകുകയാണ് ഈ സംഗീത പരിപാടിയിലൂടെ ലക്ഷ്യമിടുന്നത്.

ആരോഗ്യമേഖലയിൽ പ്രവർത്തിക്കുന്ന എൻ.ജി.ഒകളുമായി ചേർന്നാണ് നിർവാണയുടെ പ്രവർത്തനം. രോഗികളെയും ഒറ്റപ്പെട്ടവരെയും കണ്ടെത്തി വലിയ ടെലിവിഷനും സ്പീക്കറുകളുമുള്ള മുറിയിലേക്ക് ഇവരെ എത്തിക്കേണ്ടത് എൻ.ജി.ഒയുടെ ചുമതലയാണ്. ഒരു വർഷത്തേക്കുള്ള സംഗീത പരിപാടികൾ മുൻകൂട്ടി തയ്യാറാക്കിയാണ് ഓൺലൈൻ വഴി അവതരിപ്പിക്കുക. ശങ്കർ മഹാദേവൻ അക്കാദമി(എസ്.എം.എ.) ട്രസ്റ്റിന്റെ നേതൃത്വത്തിലാണ് എസ്.എം.എ. നിർവാണ പ്രവർത്തിക്കുന്നത്- https://www.shankarmahadevanacademy.org/SMANirvana/

നമ്മുടെ ജീവിതത്തിലൂടെ മാനവികബന്ധം ഊട്ടിയുറപ്പിക്കയാണ് സംഘടനയുടെ അടിസ്ഥാനതത്വം. സംഗീതത്തിലൂടെ ബന്ധങ്ങൾ മെച്ചപ്പെടുത്തുകയും ആനന്ദവും ആഹ്ളാദവും കൈവരിക്കുകയുമാണ് ലക്ഷ്യം. വേദനയും ഒറ്റപ്പെടലും പീഡനവും മറന്ന് സംഗീതത്തിലൂടെ ഒത്തൊരുമിക്കുക എന്ന മഹത്തായ മാനവികബോധമാണ് എസ്.എം.എ. നിർവാണയെ നയിക്കുന്നത്. പൊയ്‌പ്പോയ ജീവിതത്തിന്റെ സുഗന്ധമുള്ള ഓർമ്മകളിലൂടെ ഒരു മണിക്കൂറെങ്കിലും വേദന മറന്ന് ജീവിതത്തിൽ പുതിയ പ്രത്യാശ പകരുമ്പോൾ സംഗീതം മറ്റെല്ലാറ്റിനും മുകളിൽ കരുത്താവുന്നു.

സംഭാവനകളിലൂടെയാണ് എസ്.എം.എ. നിർവാണ പ്രവർത്തിക്കുന്നത്. ഇപ്പോൾ പ്രതിമാസം 20-25 പരിപാടികൾ അവതരിപ്പിക്കുന്നുണ്ടെങ്കിലും എല്ലാ ദിവസവും സംഗീതം എന്ന ലക്ഷ്യത്തിലേക്ക് അടുക്കുകയാണ് ഇവർ. പരിമിതികളിലാത്ത സംഗീതത്തിലൂടെ കർണാട്ടിക്- ഹിന്ദുസ്ഥാനി ക്ലാസിക്കൽ, സെമി ക്ലാസിക്കൽ, ഭക്തിഗാനങ്ങൾ, ചലച്ചിത്ര ഗാനങ്ങൾ തുടങ്ങിയവ സദസിന്റെ ഇഷ്ടാനുസരണം അവതരിപ്പിക്കും. സദസിലുള്ളവർക്കും പാടാനുള്ള അവസരം നൽകും. ഇതിനായി മുൻകൂട്ടി അറിയിക്കണമെന്നു മാത്രം. തീർത്തും സൗജന്യമാണ് സംഗീത പരിപാടി. പാടാനും സംഗീതോപകരണങ്ങൾ വായിക്കാനും അറിയുന്നവർക്കും ഇതിന്റെ ഭാഗമാവാം. ഓഡിഷനിലൂടെയാണ് അവസരം ലഭിക്കുക.