ഒരു കാലത്ത് മിമിക്രി വേദികളിലെ നിറസാന്നിദ്ധ്യമായിരുന്ന ശബ്ദഗാംഭീര്യം. നടനും, മിമിക്രി താരവുമായിരുന്ന അബിയുടെ അടുത്ത സുഹൃത്തും സന്തത സഹചാരിയുമായിരുന്ന അന്‍വറിനെ ശബ്ദത്തിന്റെ പൗരുഷം കണ്ട് അബി തന്നെയാണ് മിമിക്രി വേദിയിലേക്ക് കൈപിടിച്ച് നടത്തിയത്. തുടക്കം കൊച്ചിന്‍ സാഗറില്‍, പിന്നീട് കൊച്ചിന്‍ രസിക!
പതിമ്മൂന്ന് വര്‍ഷം നിറഞ്ഞ വേദികളില്‍!
ഇതിനിടെ പാരഡി കാസറ്റുകള്‍ക്കായി എഴുതുകയും, പാടുകയും ചെയ്തു. എഴുപതോളം കാസറ്റുകളില്‍ അന്‍വറിന്റെ ശബ്ദം മുഴങ്ങി. അബിയോടൊപ്പം ചെയ്ത ദേ മമ്മാലി കൊമ്പത്ത് എന്ന കാസറ്റ് സൂപ്പര്‍ ഹിറ്റായിരുന്നു. അങ്ങനെ വേറിട്ട ശബ്ദം കൊണ്ട് ശ്രദ്ധേയമായപ്പോഴാണ് ഡബ്ബിംഗിലേക്ക് ക്ഷണം വരുന്നത്.
കിരണ്‍ ബേദി IPS എന്ന തെലുങ്ക് ചിത്രം മലയാളത്തിലേക്ക് ഡബ്ബ് ചെയ്തപ്പോള്‍ വില്ലന്‍ സംസാരിച്ചത് അന്‍വറിന്റെ മുഴങ്ങുന്ന ശബ്ദത്തില്‍. പിന്നീട് ബാഹുബലി, സാഹോ, ചെന്നൈ എക്‌സ്പ്രസ് തുടങ്ങി തമിഴ്, തെലുങ്ക്, കന്നട, ഹിന്ദി, ഇംഗ്ലീഷ് ഭാഷകളില്‍ നിന്നും മലയാളത്തിലേക്ക് മൊഴിമാറ്റം ചെയ്യുന്ന ചിത്രങ്ങളില്‍ അന്‍വര്‍ ശബ്ദ സാന്നിദ്ധ്യമായി! ചെറുതും വലുതുമായി നാനൂറോളം സിനിമകളില്‍!
നിലവിളക്ക്, പറയിപെറ്റ പന്തിരുകുലം, നന്ദിനി, കൈലാസനാഥന്‍, മഹാഭാരതം തുടങ്ങി ഇരുപതോളം സീരിയലുകളില്‍! മുപ്പതോളം പരസ്യ ചിത്രങ്ങളില്‍!
ഈയടുത്ത് പുറത്തിറങ്ങിയ മഞ്ജു വാര്യരും ധനുഷും അഭിനയിച്ച അസുരന്‍ എന്ന ചിത്രത്തില്‍ തമിഴ് താരം പശുപതിക്ക് ശബ്ദം നല്‍കിയതും മറ്റാരുമല്ല! കൊച്ചു ടി.വി. തുടങ്ങിയ കാലം മുതല്‍ കാര്‍ട്ടൂണ്‍ കഥാപാത്രങ്ങള്‍ക്ക് അന്‍വര്‍ ശബ്ദം നല്‍കി വരുന്നു. ഡിസ്‌ക്കവറി ചാനലിലെ ഫുഡ് ഫാക്ടറി, വാക്കിംഗ് റ്റു ഹിമാലയ എന്നീ പ്രോഗ്രാമുകളുടെ നരേഷനും ഈ പെരുമ്പാവൂരുകാരന്റെ ശബ്ദ ഗാംഭീര്യം!
ടെര്‍മിനേറ്റര്‍ എന്ന വേള്‍ഡ് ഹിറ്റ് സിനിമ മൊഴി മാറ്റി മലയാളത്തില്‍ എത്തിയപ്പോള്‍, കേരളത്തിലെ വെള്ളിത്തിരയില്‍ സാക്ഷാല്‍ ആര്‍നോള്‍ഡ് മലയാളം പറഞ്ഞത് അന്‍വറിന്റെ DTS ശബ്ദത്തില്‍!
ഫെഫ്ക്ക ഡബ്ബിംഗ് ആര്‍ട്ടിസ്റ്റ് അസോസിയേഷന്റെ മെംബര്‍ കൂടിയായ അന്‍വര്‍, ഭാര്യ സജീന അന്‍വറിനും , മകന്‍ അജ്മല്‍ അന്‍വറിനും ഒപ്പം പെരുമ്പാവൂര്‍ ചേലമല വീട്ടില്‍ സന്തോഷമായി കഴിയുന്നു. അഭിനയത്തിന്റെ അത്രയും പ്രാധാന്യം ശബ്ദത്തിനും ആവശ്യമുണ്ട് സിനിമയില്‍. കഥാപാത്രം പൂര്‍ണമാകുന്നത് അഭിനയത്തോടൊപ്പം ശബ്ദവും കൃത്യമായി ഇഴുകി ചേരുമ്പോഴാണ് !
കയ്യില്‍ കിട്ടുന്ന കഥാപാത്രത്തിനനുസരിച്ച് തന്റെ ശബ്ദത്തെ മെരുക്കിയെടുക്കുവാന്‍ അസാമാന്യമായ ഒരു പ്രതിഭ അന്‍വറിലുണ്ട്! അത് കൊണ്ട് തന്നെ ഇന്ന് സ്റ്റുഡിയോകളില്‍ നിന്നും സ്റ്റുഡിയോകളിലേക്ക് തിരക്കിട്ട് പായുകയാണ് അന്‍വര്‍ !
അതിന് ഒരു കാരണം കൂടിയുണ്ട്! ഈ ഉറച്ച ശബ്ദത്തിനു പിന്നിലെ സൗമ്യമായൊരു മനസ്സും, വിനയം നിറഞ്ഞ പെരുമാറ്റവും! അത് കൊണ്ട് തന്നെ ഒരിക്കല്‍ പരിചയപ്പെടുന്നവര്‍,
ഒരിക്കല്‍ വര്‍ക്കിന് വിളിക്കുന്നവര്‍ വീണ്ടും അന്‍വറിനെ വിളിക്കുന്നു. തിരക്കില്‍ നിന്നും തിരക്കിലേക്ക് അന്‍വറും.
Content Highlights : Anwar Mimicry Dubbing Artist
