``കരഞ്ഞോളൂ; പക്ഷെ ശബ്ദം പുറത്തുകേൾക്കരുത്. നേർത്ത മഴയായി അകത്ത് പെയ്തുകൊള്ളട്ടെ കണ്ണീർ. ''-- എ വി എം സ്റ്റുഡിയോയിലെ മൈക്കിന് മുന്നിൽ പാടാനൊരുങ്ങിനിന്ന ഗായികയോട് അത്രയേ പറഞ്ഞുള്ളൂ സംഗീതസംവിധായകൻ ജോൺസൺ മാസ്റ്റർ.

പക്ഷേ എസ് ജാനകി കരഞ്ഞില്ല. കരഞ്ഞത് നമ്മളാണ്; സംഗീതാസ്വാദകർ. നിശ്ശബ്ദഗദ്ഗഗം ഉള്ളിലൊതുക്കി ജാനകി അന്ന് പാടിയ വിഷാദഗാനം ഇന്നും മലയാളികളുടെ ഹൃദയങ്ങളെ ആർദ്രമാക്കുന്നു; കണ്ണുകൾ ഈറനാക്കുന്നു: ``സ്വർണ്ണമുകിലേ സ്വർണ്ണമുകിലേ സ്വപ്നം കാണാറുണ്ടോ, കണ്ണുനീർക്കുടം തലയിലേന്തി വിണ്ണിൻ വീഥിയിൽ നടക്കുമ്പോൾ സ്വർണ്ണച്ചിറകുകൾ ചുരുക്കിയൊതുക്കി വസന്തരാത്രി മയങ്ങുമ്പോൾ, സ്വർണ്ണമുകിലേ സ്വർണ്ണമുകിലേ സ്വപ്നം കാണാറുണ്ടോ....'' ഇത് ഞങ്ങളുടെ കഥ (1982) എന്ന ചിത്രത്തിനു വേണ്ടി പി ഭാസ്കരൻ എഴുതിയ ഗാനം.

മാന്ത്രികമായ ഈ പകർന്നാട്ടത്തിന്റെ പൊരുളെന്തെന്ന് ചോദിച്ചുനോക്കിയിട്ടുണ്ട് പ്രിയഗായികയോട്. വരികൾക്കും വാക്കുകൾക്കും മാത്രമല്ല അക്ഷരങ്ങൾക്ക് പോലും അനുയോജ്യമായ ഭാവം ഞൊടിയിടയിൽ പകർന്നുനൽകാൻ എങ്ങനെ കഴിയുന്നു -- പാടുന്നത് മാതൃഭാഷയിൽ അല്ലാതിരുന്നിട്ടു പോലും?: ``അറിയില്ല. എല്ലാം ഭഗവാൻ കൃഷ്ണന്റെ കൃപ.''-- കണ്ണുകൾ ചിമ്മി തൊഴുകൈയോടെ തെന്നിന്ത്യയുടെ വാനമ്പാടി പറയും. ``വരികൾ വായിച്ചുകേൾക്കുമ്പോഴേ പാട്ടിന് ഇണങ്ങുന്ന മൂഡ് മനസ്സിൽ വന്നു നിറഞ്ഞിരിക്കും. പിന്നീടു നടക്കുന്നതൊന്നും എന്റെ നിയന്ത്രണത്തിലുള്ള കാര്യങ്ങളല്ല. പൊതുവെ ഇമോഷണൽ ആണ് ഞാൻ. ചിരിയും കരച്ചിലുമൊക്കെ പെട്ടെന്നാണ് പൊട്ടിപ്പുറപ്പെടുക; മായുന്നതും അതേ വേഗത്തിൽ തന്നെ. പാട്ടിനോട് നമ്മൾ ആത്മബന്ധം സ്ഥാപിച്ചുകഴിഞ്ഞാൽ പിന്നീടെല്ലാം തനിയെ വന്നുകൊള്ളും. ധാരാളം സ്വാതന്ത്ര്യം അനുവദിക്കുന്ന സംഗീതസംവിധായകർ ആണെങ്കിൽ ആ ദൗത്യം കൂടുതൽ എളുപ്പമാകുമെന്നു മാത്രം....ബാബുരാജ്, പുകഴേന്തി, എ ടി ഉമ്മർ, ജോൺസൺ ഒക്കെ സ്നേഹപൂർവ്വം ആ സ്വാതന്ത്ര്യം അനുവദിച്ചവരാണ്..''

ജാനകിയുടെ സ്വർഗീയനാദത്തിൽ അനശ്വരമായ പി ഭാസ്കരന്റെ തന്നെ മറ്റൊരു ക്ലാസിക്ക് രചനയുടെ പിറവിയുടെ കഥ പുകഴേന്തി പങ്കുവെച്ചതോർക്കുന്നു-- ``സ്നേഹദീപമേ മിഴിതുറക്കൂ'' എന്ന ചിത്രത്തിലെ ലോകം മുഴുവൻ സുഖം പകരാനായി എന്ന ഗാനം. മുട്ടുകുത്തിക്കൊണ്ടും പൂജാമുറിയിൽ തൊഴുതുനിന്നും ചമ്രം പടിഞ്ഞിരുന്നുമൊക്കെ പാടാവുന്ന ഒരു പാട്ടാവണം ഇത് എന്ന ആമുഖത്തോടെയാണ് ഭാസ്കരൻ മാഷ് പാട്ടെഴുതിത്തന്നത്. ആർക്കും പാടാവുന്ന ലളിതവും മതാതീതവുമായ ഒരു പ്രാർത്ഥനാഗീതം. വരികൾ വായിച്ചുകേട്ടപ്പോഴേ വികാരാധീനയായി ജാനകി. ചരണത്തിലെ ``പരീക്ഷണത്തിൻ വാൾമുനയേറ്റി പടനിലത്തിൽ ഞങ്ങൾ വീഴുമ്പോൾ ഹൃദയക്ഷതിയാൽ രക്തം ചിന്തി മിഴിനീർപ്പുഴയിൽ നീന്തുമ്പോൾ താങ്ങായ് തണലായ് ദിവ്യ ഔഷധിയായ് താതാ നാഥാ കരം പിടിക്കൂ...'' എന്ന വരി അവരുടെ കണ്ണുകളിൽ നനവ് പടർത്തി. കൈകൂപ്പി, കണ്ണുകൾ ചിമ്മി പ്രാർത്ഥനാനിരതയായാണ് ജാനകി ആ പാട്ട് പാടിത്തീർത്തതെന്ന് പുകഴേന്തി. പാട്ടെഴുതിയ കടലാസ്സിൽ ഒന്ന് നോക്കേണ്ടി പോലും വന്നില്ല അവർക്ക്. അത്രകണ്ടു മനസ്സിൽ പതിഞ്ഞുപോയിരിക്കണം ആ വരികളും അവയുടെ ഈണവും.

``റെക്കോഡിംഗ് കഴിഞ്ഞു പുറത്തുവന്ന് എന്നെ തൊഴുതുകൊണ്ട് അവർ പറഞ്ഞു: ഈശ്വരനോട് നേരിട്ട് സംസാരിക്കുന്നതുപോലെ തോന്നി. ഇത്രയും മനോഹരമായ ഒരു പാട്ട് എനിക്ക് വേണ്ടി കരുതിവെച്ചതിന് നന്ദി.'' എന്ത് മറുപടി പറയണമെന്നറിയാതെ തരിച്ചുനിന്നു പുകഴേന്തി.
``അതാണ് ജാനകി. സംഗീത സംവിധായകന്റെ സങ്കൽപ്പങ്ങൾക്ക് അപ്പുറത്തേക്ക് ഗാനത്തെ ഉയർത്താൻ കഴിവുള്ള ഗായിക,''-- പുകഴേന്തിയുടെ വാക്കുകൾ.

content highlights : s janaki Ithu njangalude katha movie song swarnamukile Johnson P Bhaskaran