ഹരിവരാസനത്തിന് പകരമെന്ന വിശ്വവിസ്മയം?
-----------------
മണ്‍മറഞ്ഞ ഒരു അനുഗൃഹീത ഗായകന്റെ ഓര്‍മ്മ വീണ്ടുമുണര്‍ത്തുന്നു ``വിശ്വവിസ്മയം'' എന്ന ഭക്തിഗീതം; ആഹ്‌ളാദനൊമ്പരങ്ങള്‍ ഇടകലര്‍ന്ന ഓര്‍മ്മ.
ശബരിമലയില്‍ അത്താഴപൂജ കഴിഞ്ഞു അമ്പലം അടയ്ക്കുന്ന വേളയില്‍ ``ഹരിവരാസന''ത്തിന് പകരം യേശുദാസിന്റെ സ്വരത്തില്‍ കേള്‍പ്പിക്കുന്ന അയ്യപ്പ സ്തുതി എന്ന വിശേഷണത്തോടെ സമൂഹ മാധ്യമങ്ങളില്‍ ``വിശ്വവിസ്മയം'' പറന്നുനടക്കാന്‍ തുടങ്ങിയിട്ട് കാലമേറെയായി. അബദ്ധ ഘോഷയാത്രയാണ് ആ വിശേഷണം എന്ന് സാക്ഷ്യപ്പെടുത്തും ആ സ്തുതിയുടെ രചയിതാവും സംഗീത ശില്പിയുമായ കൃഷ്ണദാസ് വാര്യര്‍.
ഒന്ന്, അതൊരു അയ്യപ്പഭക്തിഗാനമല്ല, കൂടല്‍മാണിക്യ സ്തുതിയാണ്. രണ്ട്, ശബരിമലയില്‍ അത് ഇന്നുവരെ കേള്‍പ്പിച്ചിട്ടില്ല. മൂന്ന്, അത് പാടിയത് യേശുദാസ് അല്ല, യശശ്ശരീരനായ സതീഷ് ചന്ദ്രന് എന്ന ഗായകനാണ്.... ``നിര്‍ഭാഗ്യവശാല്‍ ഈ വിശദീകരണങ്ങള്‍ ഒന്നും അധികമാരും ശ്രദ്ധിച്ച മട്ടില്ല..'' വാര്യര്‍ പറയുന്നു. ``ഇല്ലെങ്കില്‍ തെറ്റുകള്‍ ആവര്‍ത്തിക്കപ്പെടില്ലല്ലോ. അകാലത്തില്‍ വിടപറഞ്ഞ പ്രതിഭാശാലിയായ ഒരു യുവഗായകനോടുള്ള അനീതികൂടിയാവുന്നു അത്..''
കവിയും ഗാനരചയിതാവുമായ ഇരിഞ്ഞാലക്കുട സ്വദേശി കെ വി കൃഷ്ണദാസ് വാര്യര്‍ക്ക് ഈ സ്തുതി എഴുതാന്‍ പ്രചോദനമായത് ഹരിവരാസനം തന്നെ. ഭരത (സംഗമേശ്വര) പ്രതിഷ്ഠയുള്ള ഇന്ത്യയിലെ അപൂര്‍വം ആരാധനാലയങ്ങളില്‍ ഒന്നായ കൂടല്‍മാണിക്യ ക്ഷേത്രത്തിലെ ദേവന് ഒരു ഉറക്കുപാട്ട് എന്ന ആശയത്തില്‍ നിന്നാണ് ``വിശ്വവിസ്മയം ദേവ സംഗമേശ്വരം വിമല കോമളം ദിവ്യ ദേവ വിഗ്രഹം'' എന്ന് തുടങ്ങുന്ന കൃതിയുടെ പിറവി. ഹരിവരാസനത്തിന് ദേവരാജന്‍ മാസ്റ്റര്‍ നല്‍കിയ മധ്യമാവതി രാഗസ്പര്‍ശം തന്റെ സൃഷ്ടിക്കും പകര്‍ന്നു നല്‍കി കൃഷ്ണദാസ്. ഗാനഗന്ധര്‍വന്റെ ശബ്ദത്തില്‍ വേണം ഗാനം അനശ്വരമാകാന്‍ എന്നായിരുന്നു കവിയുടെ സ്വപ്നം. പല കാരണങ്ങളാലും അത് പൂവണിയാതെ പോയി..
``ഒടുവില്‍, തികച്ചും യാദൃച്ഛികമായാണ് ആ കൃതി മറ്റൊരു ഗായകന്റെ ശബ്ദത്തില്‍ റെക്കോര്‍ഡ് ചെയ്യപ്പെട്ടത്.''-- കൃഷ്ണദാസ് പറയുന്നു. ``ഒരു നാള്‍ കൂടല്‍മാണിക്യ ക്ഷേത്ര നടയില്‍ നില്‍ക്കുമ്പോള്‍ കാറ്റില്‍ ആ ശബ്ദം കാതില്‍ ഒഴുകിയെത്തുകയായിരുന്നു. സമീപത്തെവിടെയോ നിന്നുള്ള ഒരു സപ്താഹവേദിയില്‍ നിന്നാണ്. ആദ്യ കേള്‍വിയില്‍ സാക്ഷാല്‍ യേശുദാസ് ആണെന്ന് തോന്നി. അത്രയ്ക്കുണ്ട് ശബ്ദസാമ്യം. സപ്താഹ വേദി തേടി ചെന്നപ്പോഴാണ് സത്യം മനസ്സിലായത്. ചെറുപ്പക്കാരനായ ഒരു ഗായകന് ഇരുന്ന് പാടുന്നു. ഭാവഗാംഭീര്യമാര്‍ന്ന ശബ്ദത്തില്‍, നല്ല ഉച്ചാരണശുദ്ധിയോടെ; ഭക്തിപൂര്‍ണ്ണതയോടെ. എന്റെ വിശ്വവിസ്മയം പാടാന്‍ ഭഗവാന്‍ അയച്ചതാവണം ഇയാളെ എന്ന് ആ നിമിഷം മനസ്സ് പറഞ്ഞു..''
ചങ്ങനാശേരിക്കാരനാണ് ഗായകന്. പേര് സതീഷ് ചന്ദ്രന്. മധ്യകേരളത്തിലെ ഭക്തിഗാനമേളകളില്‍ സ്ഥിരമായി പാടാറുണ്ട്. എന്നാല്‍ ഇരിഞ്ഞാലക്കുടയില്‍ ഇതാദ്യം. ``വിശ്വവിസ്മയത്തിന് ശബ്ദം പകരാന്‍ പൂര്‍ണ്ണസമ്മതമായിരുന്നു സതീഷ് ചന്ദ്രന് . ഇരിഞ്ഞാലക്കുടക്ക് അടുത്തുള്ള കാട്ടൂരിലെ ഒരു സ്റ്റുഡിയോയില്‍ അടുത്ത ദിവസം തന്നെ ഗാനം റെക്കോര്‍ഡ് ചെയ്യപ്പെടുന്നു. മനോഹരമായിത്തന്നെ അയാള്‍ പാടി. '' പാട്ട് ജനങ്ങളില്‍ എത്തിക്കുക എന്നതായിരുന്നു അടുത്ത വെല്ലുവിളി. ആല്‍ബങ്ങളുടെ സുവര്‍ണ്ണകാലം അതിനകം അസ്തമിച്ചിരുന്നു. ഫേസ്ബുക്ക് ആണ് അടുത്ത ഉപാധി. ഫേസ് ബുക്കും വാട്‌സ്ആപ്പും ഉള്‍പ്പെടെയുള്ള സമൂഹ മാധ്യമങ്ങളാണ് വിശ്വവിസ്മയത്തെ ജനകീയമാക്കി മാറ്റിയത് എന്നോര്‍ക്കുന്നു കൃഷ്ണദാസ്.
പാട്ട് ജനപ്രീതി നേടിയെങ്കിലും അണിയറയില്‍ അജ്ഞാതനായി മറഞ്ഞിരിക്കാനായിരുന്നു ഗായകന് യോഗം. കേട്ടവര്‍ പലരും അത് യേശുദാസിന്റെ ശബ്ദമായി തെറ്റിദ്ധരിച്ചത് തന്നെ പ്രധാന കാരണം. പാട്ട് റെക്കോര്‍ഡ് ചെയ്ത് അധികകാലം കഴിയും മുന്‍പ് ഒരു ബൈക്ക് അപകടത്തില്‍ സതീഷ് ചന്ദ്രന് മരണത്തിന് കീഴടങ്ങുന്നു. വലിയ വാര്‍ത്താപ്രാധാന്യമൊന്നും നേടാതെ പോയ, വേദനാജനകമായ വേര്‍പാട്. ``നല്ല ഭാവിയുള്ള ഗായകനായിരുന്നു. എന്തു ചെയ്യാം. വിധിയുടെ നിശ്ചയം തടുക്കാനാവില്ലല്ലോ..'' -- കൃഷ്ണദാസ്.
വിവാദവിഷയമായിട്ടാണെങ്കിലും വിശ്വവിസ്മയം വീണ്ടും മാധ്യമങ്ങളില്‍ നിറയുമ്പോള്‍ സതീഷ് ചന്ദ്രന് ഒരിക്കല്‍ കൂടി ഓര്‍ക്കപ്പെടുന്നു. അദ്ദേഹം ഹൃദയം നല്‍കി പാടിയ ഗാനവും....
Content Highlights : Harivarasanam Song Viswavismayam Singer Satheesh Chandran Yesudas Ravimenon Pattuvazhiyorath
