വിപണിയുടെ മനോഗതം അറിയാം;  കുതിപ്പും കിതപ്പും മനസിലാക്കാം

ഹ്രസ്വകാലം മുതല്‍ ഇടക്കാലം വരെ അടിസ്ഥാന, അടിസ്ഥാനേതര ഘടകങ്ങള്‍ക്ക് തുല്യ പ്രാധാന്യമുണ്ട്. ഭാവി വളര്‍ച്ചയുടേയും തളര്‍ച്ചയുടേയും പ്രധാന ചാലക ശക്തി എന്നനിലയില്‍ അടിസ്ഥാന ഘടകങ്ങള്‍ക്കാണ് മേല്‍ക്കൈ. അടിസ്ഥാന ഘടകങ്ങള്‍ക്ക് ഗതിവേഗം നിലനിര്‍ത്താന്‍ കഴിയുകയോ അങ്ങനെ അല്ലാതാവുകയോ ചെയ്താല്‍ അടിസ്ഥാനേതര ഘടകങ്ങള്‍ അതിനെ പിന്തുടരും.

അസ്ഥിരതയുടെ സൂചിക, പുട്ട് / കോള്‍ അനുപാതം, ചലന ശരാശരി തുടങ്ങിയ സാങ്കേതിക കാര്യങ്ങള്‍ ഓഹരി വിപണിയുടേയും വിശാല വിപണിയുടേയും മനോഗതം വിലയിരുത്താനായി ഉപയോഗിക്കാം. വിപണിയിലെ പ്രവണത തളര്‍ന്ന നിലയിലോ നല്ലനിലയിലോ എന്നും വില്‍പന കൂടുതലോ കുറവോ എന്നും തുടങ്ങിയ കാര്യങ്ങള്‍ മനസിലാക്കാന്‍ ഈ കണക്കുകള്‍ സഹായിക്കും. വിശാല വിപണിയുടെ പ്രതിദിന നില മനസിലാക്കാന്‍ A/D അനുപാതം ഉപയോഗിക്കാം. വിപണിയുടെ വൈപുല്യവും നീക്കങ്ങളും അതിലൂടെ ലഭ്യമാവും. അനുപാതം കൂടുതലാണെങ്കില്‍ കുതിപ്പും താഴെയാണെങ്കില്‍ കിതപ്പുമാണ് സൂചിപ്പിക്കുന്നത്.

നിഫ്റ്റി 500 സൂചികയുടെ പ്രതിവാര A/ D അനുപാതം ഇപ്പോള്‍ 0.24 x ആണ്. പത്തുവര്‍ഷ ശരാശരി 1.35 x ആണ്. 2022 ഡിസമ്പര്‍ 25ന് താഴ്ന്ന നിലയില്‍ 0.03 x ഉം 2022 ഫെബ്രുവരി 27 ന് കൂടിയ നിലയില്‍ 16.9 x ഉം ആയിരുന്നു. ഈ അനുപാതം കൂടിയ അസ്ഥിരതയുടേതാണ്. വിപണി ദുര്‍ബലമായിരിക്കുമ്പോള്‍ കണക്കാക്കിയതാണ് ഈ ഉയര്‍ച്ച താഴ്ചകള്‍. വിപണിയുടെ മനോഗതത്തിന്റെ ഉയര്‍ച്ച താഴ്ചകള്‍ വിലയിരുത്താന്‍ ഈ കണക്കുകള്‍ പര്യാപ്തമല്ല. പ്രതിദിന അടിസ്ഥാനത്തിലുള്ള വിപണിയുടെ നില മനസിലാക്കാന്‍ മാത്രമേ ഇതുപകരിക്കൂ. ഇന്ത്യയുടെ ദീര്‍ഘകാല പ്രവണതകളുടെ അടിസ്ഥാനത്തില്‍ ഒന്നിനേക്കാള്‍ കൂടുതലുള്ള അനുപാതം വിപണിയുടെ ഗുണകരമായ അവസ്ഥയെയാണ് കാണിക്കുന്നത്.

A/D ഒന്നിനേക്കാള്‍ താഴെയാണെങ്കില്‍ പോലും ഓഹരികളുടെ വെയിറ്റേജും വളര്‍ച്ചയുമനുസരിച്ച് വിപണിക്ക് ഗുണകരമായ ലാഭം നല്‍കാന്‍ കഴിയും. എന്നാല്‍ A/D സ്ഥിരമായി ഉയര്‍ന്നും താഴ്ന്നും നില്‍ക്കുകയാണെങ്കില്‍ അത് നിലവിലും ഭാവിയിലുമുള്ള വിപണിയുടെ പ്രവണതയെയാവും നിര്‍ണയിക്കുക.

A/D അനുപാതത്തിന്റെ ഇപ്പോഴത്തെ താഴ്ന്ന നിലയ്ക്കു കാരണം നിഫ്റ്റി 500 ന്റെ ദുര്‍ബ്ബലമായ കണക്കുകളാണ്. 50 ശതമാനത്തിലേറെ ഓഹരികള്‍ 200 ദിവസത്തെ ചലന ശരാശരിയേക്കാള്‍ താഴയായാണ് ട്രേഡിംഗ് നടത്തുന്നത്. ഈ കുറഞ്ഞ അനുപാതം സമീപ കാലത്തു തുടര്‍ന്നേക്കും. എന്നാല്‍ ഇടക്കാലം മുതല്‍ ദീര്‍ഘകാലം വരെ ഈ അനുപാതം ഗുണപരമായ വ്യതിയാനം പ്രദര്‍ശിപ്പിച്ചുകൊണ്ട് ദീര്‍ഘകാല ശരാശരിയിലേക്കു നീങ്ങും.

വിപണിയുടെ ഭാവി അളക്കുന്നതില്‍ പ്രധാനപ്പെട്ട അടിസ്ഥാനേതര വിവരങ്ങളിലൊന്ന് സമ്പദ് വ്യവസ്ഥയിലെ പണത്തിന്റെ സാന്നിധ്യമാണ്. ഉറച്ച സമ്പദ് വ്യവസ്ഥകളില്‍ പണത്തിന്റെ ഒഴുക്ക് സാമ്പത്തിക വളര്‍ച്ചയെ ത്വരിതപ്പെടുത്തുകയും അത് ഓഹരി വിപണിയില്‍ പ്രതിഫലിക്കുകയും ചെയ്യും. ആര്‍ബിഐ നല്‍കുന്ന M3 സ്ഥിതിവിവരം സമ്പദ് വ്യവസ്ഥയില്‍ നിലവിലുള്ളതും ബാങ്കുകളില്‍ നിക്ഷേപിച്ചിട്ടുള്ളതുമായ പണത്തിന്റെ മൊത്തം കണക്കു നല്‍കുന്നുണ്ട്. സാമ്പത്തികനിലയുടെ ആരോഗ്യമാണ് അതു പ്രതിഫലിപ്പിക്കുന്നത്. സമ്പദ് വ്യവസ്ഥയില്‍ സാമ്പത്തിക വളര്‍ച്ച കൂടുമ്പോള്‍ ഓഹരി വിപണിയിലെ ട്രേഡിംഗിന്റെ അളവും കൂടും.

ഇന്ത്യയുടെ M 3 ക്ക് മുന്‍വര്‍ഷത്തെ അപേക്ഷിച്ച് 2020 മുതല്‍ 2021 വരെ 11.2 ശതമാനം പ്രതിമാസ വളര്‍ച്ചയാണു രേഖപ്പെടുത്തിയിട്ടുള്ളത്. 2022-23 ല്‍ അത് ചെറുതായി താഴ്ന്ന് 8.8 ശതമാനമായിട്ടുണ്ട്. പലിശ നിരക്കിലെ തുടരുന്ന വര്‍ധനയും വിലക്കയറ്റവും പണത്തിന്റെ മൂല്യവും കോര്‍പറേറ്റ് ലാഭവും കുറച്ചിട്ടുണ്ട്. ഇത് വിപണിയുടെ പ്രവര്‍ത്തനങ്ങളെ മന്ദീഭവിപ്പിക്കും. 2022ന്റെ രണ്ടാംപാദം മുതല്‍ ചെറുകിട നിക്ഷേപകരില്‍ നിന്നും വിദേശ ഓഹരികളില്‍ നിന്നുമുള്ള വരുമാനം കാര്യമായി കുറഞ്ഞു. 2022 മുതല്‍ ഫെഡിന്റെ M3 വളര്‍ച്ചയില്‍ കുറവ് ദൃശ്യമായതോടെ വിദേശ ഓഹരി നിക്ഷേപകര്‍ ജാഗ്രത പുലര്‍ത്താന്‍ തുടങ്ങി. വിലക്കയറ്റവും പലിശ നിരക്കുകളും പണനയവും സാധാരണ സ്ഥിതിയിലേക്കു വരുന്നതോടെ പണത്തിന്റെ വരവിലും വര്‍ധന ഉണ്ടാകുമെന്നു കരുതാം. 2023ന്റെ രണ്ടാം പകുതിയിലും 2024 ന്റെ ആദ്യ പകുതിയിലുമായി പണപ്പെരുപ്പം കുറയുമെന്നാണ് സാമ്പത്തിക വിദഗ്ധര്‍ കണക്കുകൂട്ടുന്നത്.

(ജിയോജിത് ഫിനാന്‍ഷ്യല്‍ സര്‍വീസസിലെ ഗവേഷണ വിഭാഗം മേധാവിയാണ് ലേഖകന്‍)