mf


2006 മാര്‍ച്ചിലാണ് അയാള്‍ മ്യൂച്വല്‍ ഫണ്ടില്‍ നിക്ഷേപിച്ചു തുടങ്ങിയത്. പ്രമുഖ ഓഹരി ബ്രോക്കിങ് സ്ഥാപനത്തിന്റെ കോഴിക്കോട്ടെ ശാഖയിലെ ഒരു എക്സിക്യൂട്ടീവായിരുന്നു ഫണ്ടിലേയ്ക്ക് അയാളെ ആകര്‍ഷിച്ചത്. 

2007ന്റെ അവസാന മാസങ്ങളില്‍ നേട്ടത്തിന്റെ കണക്കുമായി എക്സിക്യൂട്ടീവ് വീണ്ടും അദ്ദേഹത്തെ സമീപിച്ചു. പുതിയ ഫണ്ടുകളില്‍ നിക്ഷേപിക്കാന്‍ പ്രേരിപ്പിക്കുകയായിരുന്നു ലക്ഷ്യം. എല്ലാം ന്യൂ ഫണ്ട് ഓഫറുകളായിരുന്നു. 

വര്‍ഷം രണ്ട് കഴിഞ്ഞു. എക്സിക്യൂട്ടീവിനെ പിന്നെ അയാള്‍ കണ്ടിട്ടില്ല. ഫോണില്‍ വിളിച്ചപ്പോള്‍ ലഭിച്ചതുമില്ല. നിക്ഷേപത്തിന്റെ സ്ഥിതിയറിയാന്‍ എക്സിക്യൂട്ടീവിനെ തേടി 2009ല്‍ അയാള്‍ ഓഹരി ബ്രോക്കിങ് സ്ഥാപനത്തിന്റെ ശാഖയിലെത്തി(അതുവരെ വീട്ടിലെത്തിയാണ് എക്സിക്യൂട്ടീവ് ഫണ്ടുകളില്‍ നിക്ഷേപം നടത്താന്‍ സഹായിച്ചിരുന്നത്).

നിക്ഷേപിക്കുംമുമ്പ് അറിയാന്‍

coolഓരോ പദ്ധതികള്‍ക്കും അതിന്റെതായ നേട്ടവും കോട്ടവും ഉണ്ടാകും.
അവ വ്യക്തമായി ആദ്യം മനസിലാക്കിയശേഷംമാത്രംമതി നിക്ഷേപം. 

coolതന്റെ നിക്ഷേപ ലക്ഷ്യങ്ങള്‍ക്ക് യോജിച്ച പദ്ധതിയിലാണോ
നിക്ഷേപിക്കുന്നതെന്ന് ഉറപ്പുവരുത്തും.  

coolപദ്ധതികളെക്കുറിച്ച് വിശദമായി അറിയാതെ,
ഏജന്റുമാരുടെ വാചകമടികേട്ട് എടുത്തുചാടി നിക്ഷേപിക്കില്ല. 

coolചേര്‍ത്തുമ്പോഴുള്ള താല്‍പര്യം
ഏജന്റുമാര്‍ പിന്നീട് കാണിക്കാറില്ല. 

2007ല്‍ എക്സിക്യൂട്ടീവ് കൈമാറിയ, 40 ശതമാനത്തോളം നേട്ടത്തിലായിരുന്ന ഫണ്ടുകളുടെ നിക്ഷേപ സ്റ്റേറ്റുമെന്റുകളുമായാണ് അയാള്‍ അവിടെ ചെന്നത്. 

എക്സിക്യൂട്ടീവ് വേറെ താവളം തേടി അപ്പോഴേയ്ക്കും പോയ്കഴിഞ്ഞിരുന്നു. ശാഖാ മാനേജര്‍ പുതിയ സ്റ്റേറ്റ്‌മെന്റെടുത്ത് അയാളുടെ കയ്യില്‍കൊടുത്തു. നിക്ഷേപ പോര്‍ട്ട്ഫോളിയോയുടെ മൊത്തം നഷ്ടം ഇപ്പോള്‍ 40 ശതമാനമാണ്!

നേരത്തെ നിക്ഷേപിച്ച ഫണ്ടുകളുടെ നേട്ടക്കണക്കുകള്‍ കാണിച്ച് ചേര്‍ത്തിയ പുതിയ ഫണ്ടുകളെല്ലാം കനത്ത നഷ്ടത്തില്‍. കഴിഞ്ഞവര്‍ഷം(2008ല്‍) ഓഹരി വിപണിയിലുണ്ടായ തകര്‍ച്ചയാണ് നിക്ഷേപത്തെ ബാധിച്ചതെന്ന് പറഞ്ഞ് ശാഖാ മാനേജര്‍ കൈമലര്‍ത്തി. ഇപ്പോള്‍ പിന്‍വലിച്ചാല്‍ വന്‍നഷ്ടമാകും ഉണ്ടാകുകയെന്ന മുന്നറിയിപ്പുംകേട്ട് അയാള്‍ തിരിച്ചുനടന്നു.

ഒന്നുകില്‍ ഫണ്ടില്‍ നിക്ഷേപം തുടരുക. അല്ലെങ്കില്‍ നിക്ഷേപംമുഴുവന്‍ പിന്‍വലിച്ച് ബാങ്കിലോ മറ്റോ നിക്ഷേപിക്കുക. രണ്ടിലൊന്ന് ആവശ്യമാണെന്ന് അയാള്‍ മനസിലാക്കി. 

ഫണ്ടുകളുടെ ലോകത്തേയ്ക്ക് കൊണ്ടുവന്ന ബ്രോക്കിങ് ഹൗസ് വഴി ഇനി ഇടപാടില്ലെന്ന് ഏതായാലും തീരുമാനിച്ചു. ഇത്രയുമായ സ്ഥിതിക്ക് ഫണ്ടുകളെക്കുറിച്ചും അവയുടെ പ്രവര്‍ത്തന രീതിയെക്കുറിച്ചും പഠിച്ചിട്ടുതന്നെകാര്യം എന്ന തീരുമാനത്തിലെത്തുകയും ചെയ്തു.  

തനിക്ക് നിക്ഷേപമുള്ള എസ്ബിഐ, ഡിഎസ്പിബിആര്‍, സുന്ദരം, റിലയന്‍സ് എന്നീ ഫണ്ട് ഹൗസുകളുടെ ഓഫീസുകള്‍ തേടിയിറങ്ങുകയാണ് പിന്നീട് ചെയ്തത്. 

വൈഎംസിഎ റോഡിലുള്ള എസ്ബിഐ മ്യൂച്വല്‍ ഫണ്ടിന്റെ ഓഫീസിലെത്തിയപ്പോള്‍,  എല്ലാ ഫണ്ടുകളുടെയും ഇടപാട് രജിസ്ട്രാര്‍മാര്‍ വഴിയാണെന്ന് മനസിലായി. കാംസ്, കാര്‍വി എന്നിവയുടെ ഓഫീസുകളിലെത്തിയത് അങ്ങനെയാണ്. 

തന്റെ കയ്യിലുള്ള ഫണ്ടുകളുടെ യഥാര്‍ഥ വിവരങ്ങള്‍ അവിടെനിന്ന് ലഭിച്ചു. ഫണ്ടുകളില്‍ ചേര്‍ത്തിയ എക്സിക്യൂട്ടീവ് ചെയ്ത ചില വികൃതികള്‍കൂടി അതോടൊപ്പം അറിയാന്‍ കഴിഞ്ഞു.

digit1നല്‍കിയത് വ്യാജ ഇ-മെയില്‍:
ഫണ്ടുകളില്‍ നിക്ഷേപിക്കുമ്പോള്‍ അപേക്ഷാ ഫോം പൂരിപ്പിച്ച് നല്‍കിയത് എക്‌സിക്യുട്ടീവായിരുന്നു. അതില്‍ ചേര്‍ത്തിരുന്ന ഇമെയില്‍ വിലാസം തനിക്കില്ലാത്ത തന്റെ പേരിലുള്ള ഇ-മെയില്‍ ഐഡിയായിരുന്നു. 

അതുകൊണ്ട് സംഭവിച്ചത്:

യഥാര്‍ത്ഥ ഇ-മെയില്‍ വിലാസമാണ് ചേര്‍ത്തിരുന്നെങ്കില്‍ എക്‌സിക്യൂട്ടീവിന്റെ സഹായമില്ലാതെ തനിക്ക് ഫണ്ട് സ്റ്റേറ്റുമെന്റുകള്‍ മെയില്‍ ബാക്ക് സര്‍വീസ് വഴി ഈമെയിലില്‍ ലഭിക്കുമായിരുന്നു. 

digit2ബാങ്ക് അക്കൗണ്ട് നമ്പറില്‍ തെറ്റ്
അപേക്ഷ പൂരിപ്പിച്ചതിന്റെ അശ്രദ്ധകൊണ്ടോ മറ്റോ തന്റെ അക്കൗണ്ട് നമ്പര്‍ തെറ്റായാണ് നല്‍കിയിരുന്നത്. 

അതുകൊണ്ട് സംഭവിക്കുമായിരുന്നത്:

തെറ്റായ അക്കൗണ്ട് നമ്പര്‍ നല്‍കിയതിനാല്‍ ഫണ്ട് വിറ്റ് പണം തിരിച്ചെടുക്കാന്‍ സാങ്കേതിക തടസം ഉണ്ടാകുമായിരുന്നു. 

digit3 നോമിനിയുടെ പേര്
അപേക്ഷ ഫോം പൂരിപ്പിച്ചപ്പോള്‍ നോമിനിയുടെ പേരില്‍ പിശകുണ്ടായിരുന്നു. ഇനീഷ്യല്‍ തെറ്റയാണ് രേഖപ്പെടുത്തിയിരുന്നത്. 

അതുകൊണ്ട് സംഭവിക്കുമായിരുന്നത്:
നിക്ഷേപകന്റെ അഭാവത്തില്‍ നോമിനിക്ക് പണം തിരിച്ചെടുക്കുന്നതിന് സാങ്കേതിക തടസ്സം ഉണ്ടാകുമായിരുന്നു.

ഇനി എന്തുചെയ്യും?
എല്ലാ കമ്മീഷനും പറ്റി നിക്ഷേപം കാന്‍വാസ് ചെയ്ത എക്‌സിക്യൂട്ടീവിനെയോ ബ്രോക്കിങ് ഹൗസിലെ മറ്റ് എക്‌സിക്യൂട്ടീവുകളെയോ പൊടിയിട്ടാല്‍പോലും കാണാനില്ല. 

അയാള്‍തന്നെ എല്ലാം ചെയ്തു. ആദ്യം ബാങ്ക് അക്കൗണ്ട് തിരുത്തി. ക്യാന്‍സല്‍ ചെയ്ത ചെക്ക് ലീഫും പ്രത്യേക അപേക്ഷ ഫോമും അതിനായി നല്‍കി. പിന്നെ ഇ മെയില്‍, നോമിനിയുടെ പേര് എന്നിവയും മാറ്റി നല്‍കി. 

അപ്പോഴെക്കും മ്യുച്വല്‍ ഫണ്ടുകളെക്കുറിച്ച് ഒരേകദേശ ധാരണ അയാള്‍ക്ക് കിട്ടിയിരുന്നു. അതിനിടെ മികച്ച ഫണ്ടുകള്‍ സ്വയം കണ്ടെത്തി നേരിട്ട് നിക്ഷേപവും തുടങ്ങിയിരുന്നു.

ഫണ്ടുകള്‍ ഡയറക്ട് പ്ലാനുകള്‍ അവതരിപ്പിക്കാന്‍ സെബി നിര്‍ദേശം നല്‍കിയത് ഇരട്ടി നേട്ടവുമായി. കമ്മീഷന്‍ തുക നഷ്ടപ്പെടാതെ നിക്ഷേപിക്കുന്നതെങ്ങനെയെന്ന് അയാള്‍ പഠിച്ചു. 

ഓണ്‍ലൈനായി നേരിട്ട് ഡയറക്ട് പ്ലാനുകളിലാണ് അയാള്‍ ഇപ്പോള്‍ നിക്ഷേപം നടത്തുന്നത്. അതിനുവേണ്ടി കാംസിന്റെ ഓണ്‍ലൈന്‍ പ്ലാറ്റ് ഫോമും മൊബൈല്‍ ആപ്പും ഉപയോഗിക്കുന്നു. അതോടൊപ്പം ഫണ്ടുകളുടെ വെബ്‌സൈറ്റ് വഴിയും നിക്ഷേപം നടത്തുന്നു. 

നഷ്ടത്തിലുള്ള പല ഫണ്ടുകളും മറ്റ് ഫണ്ടുകളിലേയ്ക്ക് സ്വിച്ച് ചെയ്തു. എന്‍എഫ്ഒ വഴി നിക്ഷേപിച്ച് (ഒരിക്കലും കരകയറുകയില്ലെന്ന് ഉറപ്പുള്ള) ഫണ്ടുകള്‍ വിറ്റ് അയാള്‍ പണമാക്കി. 

ഇതില്‍നിന്ന് നിങ്ങള്‍ എന്താണ് പഠിച്ചത്?

coolചേര്‍ത്തുമ്പോഴുള്ള താല്‍പര്യം
ഏജന്റുമാര്‍ പിന്നീട് കാണിക്കാറില്ല. 

coolപദ്ധതികളെക്കുറിച്ച് വിശദമായി അറിയാതെ,
ഏജന്റുമാരുടെ വാചകമടി കേട്ട് എടുത്തുചാടി നിക്ഷേപിക്കില്ല. 

coolഓരോ പദ്ധതികള്‍ക്കും അതിന്റെതായ നേട്ടവും കോട്ടവും ഉണ്ടാകും.
അവ വ്യക്തമായി ആദ്യം മനസിലാക്കിയശേഷംമാത്രംമതി നിക്ഷേപം. 

coolതന്റെ നിക്ഷേപ ലക്ഷ്യങ്ങള്‍ക്ക് യോജിച്ച പദ്ധതിയിലാണോ
നിക്ഷേപിക്കുന്നതെന്ന് ഉറപ്പുവരുത്തും.  

ഏജന്റുമാര്‍ നിങ്ങളില്‍ കാര്യമായി സമ്മര്‍ദം ചെലുത്തുന്നുണ്ടെങ്കില്‍ മനസിലാക്കുക; നല്ലൊരു തുക കമ്മീഷന്‍ ഇനത്തില്‍ അവര്‍ക്ക് ലഭിക്കുന്നുണ്ടാകും!

feedbacks to:
antonycdavis@gmail.com

മ്യൂച്വല്‍ ഫണ്ടുകള്‍ എത്രതരം?
ആര്‍ക്കൊക്കെ യോജിച്ചതാണവ?
ഇതെല്ലാമറിയാന്‍
അടുത്ത പാഠത്തിനായി കാത്തിരിക്കുക