questioneasy lifeപ്രമുഖ സ്വകാര്യ സ്ഥാപനത്തിലെ ജീവനക്കാരനാണ് ഞാന്‍. ഡിസംബര്‍മാസത്തില്‍ റിട്ടയര്‍ചെയ്യും. 

റിട്ടയര്‍ ചെയ്യുമ്പോള്‍ 40 ലക്ഷത്തോളം രൂപ എനിക്ക് ലഭിക്കും. പെന്‍ഷന്‍ ഇനത്തില്‍ പ്രതിമാസം 12,000 രൂപയും പ്രതീക്ഷിക്കുന്നു. ഇപ്പോഴത്തെ വിപണി മൂല്യമനുസരിച്ച് 4 ലക്ഷത്തോളം രൂപ മ്യൂച്വല്‍ ഫണ്ടിലും 3 ലക്ഷം രൂപ ഓഹരിയിലുമുണ്ട്. മൂന്ന് ലക്ഷം രൂപയുടെ ഫാമിലി ഫ്‌ളോട്ടര്‍ ഹെല്‍ത്ത് ഇന്‍ഷുറന്‍സ് സ്‌കീമും നേരത്തെ എടുത്തിട്ടുണ്ട്. പ്രതിവര്‍ഷം ഇതിന്റെ പ്രീമിയം അടച്ചുവരുന്നുണ്ട്.

ചോദ്യം ഇതാണ് പ്രതിമാസം 40,000 രൂപ പെന്‍ഷന്‍ ലഭിക്കാന്‍ ഈ തുക എങ്ങനെ എവിടെയാണ് നിക്ഷേപിക്കേണ്ടത്? 

തോമസ്‌കുട്ടി, 
(ഇ-മെയില്‍ വഴി ലഭിച്ചത്)

ANSWERമൊത്തം ലഭിക്കുന്ന തുകയില്‍നിന്ന് ഒരുവര്‍ഷത്തെ ചെലവിനുള്ള 3.36 ലക്ഷം രൂപ സ്വീപ് ഇന്‍ ഫെസിലിറ്റിയുള്ള സേവിങ് അക്കൗണ്ടില്‍ നിക്ഷേപിക്കുക. ഓരോ മാസവും 28,000 രൂപ ജീവിത ചെലവിനായി പിന്‍വലിക്കുക. പെന്‍ഷന്‍ തുകയും ഇതോടൊപ്പം ചേര്‍ത്താല്‍ 40,000 രൂപയാകുമല്ലോ. അഥവാ പെന്‍ഷന്‍ ലഭിക്കാന്‍ വൈകുകയാണെങ്കില്‍ സേവിങ് അക്കൗണ്ടില്‍ അതിനനുസരിച്ച് കൂടുതല്‍ തുക നിക്ഷേപിക്കുകയുമാകാം.

40,000
പെന്‍ഷന്‍

നിക്ഷേപം
30 ലക്ഷം
സീനിയര്‍ സിറ്റിസണ്‍ സ്‌കീം

9 ലക്ഷം
പോസ്റ്റ് ഓഫീസ് മന്ത്‌ലി സ്‌കീം

8 ലക്ഷം
ബാലന്‍സ്ഡ് ഫണ്ടില്‍

രണ്ടാമതായി ചെയ്യേണ്ടത്, സര്‍ക്കാര്‍ നിക്ഷേപ പദ്ധതിയായ സീനിയര്‍ സിറ്റിസണ്‍സ് സേവിങ് സ്‌കീമില്‍ നിക്ഷേപിക്കുകയാണ്. 

നിങ്ങളുടെയും ഭാര്യയുടെയും പേരില്‍ പരമാവധി 30 ലക്ഷം രൂപവരെ നിക്ഷേപം നടത്താം. 8.6 ശതമാനമാണ് പദ്ധതിയിലെ പലിശ നിരക്ക്. ഇത് പ്രകാരം മൂന്ന് മാസംകൂടുമ്പോള്‍ 64,500 രൂപയാണ് പലിശ ലഭിക്കുക(പ്രതിമാസം 21,500 രൂപ). 

മൂന്നാമതായി പോസ്റ്റ് ഓഫീസ് മന്ത്‌ലി ഇന്‍കം സ്‌കീം പരിഗണിക്കാം. രണ്ടുപേരുടെയും പേരില്‍ ഒമ്പത് ലക്ഷം രൂപ നിക്ഷേപിക്കാം. 7.8 ശതമാനം പലിശ നിരക്കില്‍ പ്രതിമാസം 5,850 രൂപയാണ് ലഭിക്കുക. 

ഈ നിക്ഷേപങ്ങളില്‍നിന്ന് ലഭിക്കുന്ന പലിശയ്ക്ക് വാര്‍ഷിക വരുമാനത്തോടൊപ്പം ചേര്‍ത്ത് ആദായ നികുതി നല്‍കേണ്ടിവരുമെന്നകാര്യം മറക്കേണ്ട. 

ഓഹരിയിലെയും മ്യൂച്വല്‍ ഫണ്ടിലെയും തുകകൂടി ചേര്‍ത്ത്‌ നഷ്ടസാധ്യത കുറഞ്ഞ ബാലന്‍സ്ഡ് ഫണ്ടുകളില്‍ നിക്ഷേപം നടത്താം. ഒരുവര്‍ഷത്തേക്കാള്‍ കൂടുതല്‍ കാലം കൈവശംവെച്ചാല്‍ ആദായ നികുതി നല്‍കേണ്ടതില്ല. മികച്ച നേട്ടം ലഭിക്കുകയും ചെയ്യും. 

നിശ്ചിത കാലാവധി നിശ്ചയിച്ച് എസ്‌ഐപിയായി വേണം ബാലന്‍സ്ഡ് ഫണ്ടില്‍ നിക്ഷേപം നടത്താന്‍. ആവശ്യമെങ്കില്‍ ഒരുവര്‍ഷത്തിനുശേഷം സിസ്റ്റമാറ്റിക് വിത്‌ഡ്രോവര്‍ പ്ലാന്‍ പ്രകാരം തുക പിന്‍വലിക്കാം. 

അഞ്ച് വര്‍ഷംവരെ നിക്ഷേപം നിലനിര്‍ത്തിയശേഷമാണ് പിന്‍വലിക്കുന്നതെങ്കില്‍ ബാലന്‍സ്ഡ് ഫണ്ടില്‍നിന്ന് മികച്ച നേട്ടം പ്രതീക്ഷിക്കാം.