മലപ്പുറം : മുസ്‌ലിംലീഗ് ദേശീയ ജനറൽസെക്രട്ടറി പി.കെ. കുഞ്ഞാലിക്കുട്ടി എം.പിയുടെ വാർഡിൽ ലീഗിനെതിരേ വിമതസ്ഥാനാർഥി രംഗത്ത്. മലപ്പുറം നഗരസഭയിലെ 38-ാം വാർഡ് ഭൂതാനം കോളനിയിലാണ് യു.ഡി.എഫ്. ഔദ്യോഗിക സ്ഥാനാർഥി കെ.കെ. ആയിഷാബി ഉമ്മറിനെതിരേ വിമതയായി മൈമൂന നാസർ മത്സരിക്കുന്നത്.
15 വർഷമായി ഒരുകുടുംബത്തിൽനിന്നുള്ള അംഗങ്ങളെ മാത്രമാണ് വാർഡിൽ സ്ഥാനാർഥികളായി പരിഗണിക്കുന്നതെന്നാരോപിച്ചാണ് ഒരുവിഭാഗം വിമതസ്ഥാനാർഥിയെ രംഗത്തിറക്കിയിരിക്കുന്നത്. മുൻ കെ.എം.സി.സി. അംഗം നാസറിന്റെ ഭാര്യയാണ് മൈമൂന. ഇവരെ മത്സരരംഗത്തുനിന്നു പിന്തിരിപ്പിക്കാൻ ശ്രമംനടന്നിരുന്നെങ്കിലും വിജയിച്ചില്ല. എം. പത്മിനിയാണ് എൽ.ഡി.എഫ്. സ്വതന്ത്ര സ്ഥാനാർഥിയായി ജനവിധിതേടുന്നത്.
