02 June 2023, 02:04 PM IST

1 min read

Read later

Representative Image| Photo: Canva.com

പലരുടെയും പ്രിയ്യപ്പെട്ട വസ്ത്രമാണ് സാരി. ട്രഡീഷണൽ ചടങ്ങുകളിൽ സാരിയോളം ഭംഗി മറ്റൊന്നിനുമുണ്ടാകില്ല. എന്നാൽ സംഗതി ഇങ്ങനെയാണെങ്കിലും സാരി ഉടുത്തു നടക്കുന്നത് എല്ലാവർക്കും അത്ര സുഖകരമാകണം എന്നില്ല. കാഴ്ചയിലെ ഭംഗി ഉടുത്താൽ നഷ്ടപ്പെടുന്ന വസ്ത്രമാണ് സാരി എന്ന കമന്റുകൾ പറയുന്നവർ ഏറെയാണ്. എന്നാൽ സാരിയുടുത്ത് ബ്രേക് ഡാൻസ് കളിച്ചാലോ? കേൾക്കുമ്പോൾ അത്ഭുതം തോന്നുമെങ്കിലും സാരിയിൽ കിടിലൻ ബ്രേക്ഡാൻസ് കളിക്കുന്ന ഒരു യുവതിയുടെ വീഡിയോ ആണ് ഇപ്പോൾ വൈറലാകുന്നത്.

ഹൈ ഹീൽസ് അണിഞ്ഞ് സാരിയുടുത്ത് ബ്രേക്ഡാൻസ് കളിക്കുന്ന യുവതിയാണ് വീഡിയോയിലുള്ളത്. nepalhiphopfoundation01 എന്ന ഇൻസ്റ്റഗ്രാം പേജിലൂടെയാണ് വീഡിയോ പുറത്തുവന്നിരിക്കുന്നത്. പേസ്റ്റൽ കളറിലുള്ള സാരി ധരിച്ച യുവതി അനായാസേന ബ്രേക്ഡാൻസ് കളിക്കുന്നതാണ് വീഡിയോയിലുള്ളത്.

പാട്ട് തുടങ്ങുന്നതോടെ അതിന്റെ വേഗത്തിന് അനുസരിച്ച് ചടുലമായ ചുവടുകൾ വെക്കുകയാണ് അവർ. ചുറ്റും യുവതിയെ പ്രോത്സാഹിപ്പിക്കുന്നവരെയും കാണാം. സാമൂഹികമാധ്യമത്തിൽ വൻവരവേൽപ്പാണ് വീഡിയോക്ക് ലഭിച്ചത്. ഇതിനകം എട്ടുലക്ഷത്തിൽപരം പേർ വീഡിയോ കണ്ടുകഴിഞ്ഞു.

സാരിയുടുത്ത് ഹൈഹീൽസിൽ ബ്രേക്ഡാൻസ് കളിക്കാനുള്ള യുവതിയുടെ ആത്മവിശ്വാസം അപാരമാണെന്നു പറഞ്ഞ് നിരവധി പേരാണ് പുകഴ്ത്തി കമന്റ് ചെയ്തത്. സാരിയുടുത്ത് മര്യാദയ്ക്ക് നടക്കാൻ പോലും കഴിയാറില്ലെന്നും ഇത് അവിശ്വസനീയമായി തോന്നുന്നുവെന്നും ചിലർ കമന്റ് ചെയ്തു.

പോസിറ്റീവ് കമന്റുകൾക്കൊപ്പം യുവതിയെ വിമർശിക്കുന്നവരും ഉണ്ട്. ബ്രേക്ഡാൻസ് കളിക്കുമ്പോൾ അതിന് അനുസരിച്ച വസ്ത്രമാണ് ധരിക്കേണ്ടതെന്നാണ് അവരുടെ വാദം.

അടുത്തിടെ സാരിയുടുത്ത് ഫുട്ബോൾ കളിക്കുന്ന ഏതാനും സ്ത്രീകളുടെ വീഡിയോയും വൈറലായിരുന്നു. മധ്യപ്രദേശിലെ ഗ്വാളിയോറിൽ 'ഗോൾ ഇൻ സാരി' എന്ന പേരിൽ നടത്തിയ ടൂർണമെന്റിന്റെ ഭാഗമായാണ് ഈ മത്സരം സംഘടിപ്പിച്ചത്