സിനിമാ മോഹ​ങ്ങളുമായി മുംബൈയിലേക്ക് പറന്ന ​ഗം​ഗുഭായ് കാമാത്തിപുരയുടെ മാഫിയാ ക്വീൻ ആയതെങ്ങനെ?

ഹുസൈൻ സെയ്ദിയുടെ മാഫിയാ ക്വീൻ എന്ന പുസ്തകത്തിലാണ് ​ഗം​ഗുഭായിയുടെ ജീവിതം വ്യക്തമാക്കുന്നത്. ഈ പുസ്തകം തന്നെയാണ് സിനിമയ്ക്കും ആധാരമായത്. ​ഗുജറാത്തിലെ കത്തിയവാഡ് സ്വദേശിയാണ് ​ഗം​ഗുബായ്. യഥാർഥ പേര് ​ഗം​ഗാ ഹർജിവൻദാസ് കത്തിയവാഡി എന്നായിരുന്നു. നന്നേ ചെറിയ പ്രായത്തിൽ തന്നെ ലൈം​ഗിക തൊഴിലാളിയാവാൻ വിധിക്കപ്പെട്ടവളായിരുന്നു ​ഗം​ഗുബായ്. ‌

അഭിനേത്രിയാവുക എന്നതായിരുന്നു ​ഗം​ഗുഭായിയുടെ വലിയ സ്വപ്നം. അതിനായി ഏതുവിധേനയും മുംബൈയിലെത്തുക എന്നതായിരുന്നു ലക്ഷ്യം. കോളേജ് പഠനകാലത്താണ് ​ഗം​ഗുഭായ് രാംനിക് ലാലിനെ കണ്ടുമുട്ടുന്നത്. അച്ഛന്റെ അക്കൗണ്ടന്റായിരുന്നു രാംനിക് ലാൽ. പ്രണയം കൊടുമ്പിരി കൊണ്ടപ്പോൾ രാംനിക് ലാലിനൊപ്പം പതിനാറാം വയസ്സിൽ‌ ​ഗം​ഗുഭായ് മുംബൈയിലേക്ക് കടന്നു. ഒന്നിച്ചൊരു ജീവിതത്തിനൊപ്പം സിനിമാമോ​ഹങ്ങളും ​ഗം​ഗുഭായിയുടെ മനസ്സിലുണ്ടായിരുന്നു. ​

ജീവിതം തുടങ്ങി അധികമാവും മുമ്പേ രാംനിക് ലാൽ ​ഗം​ഗുഭായിയെ ലൈം​ഗിക വൃത്തിയിലേക്ക് തള്ളിയിട്ടു. അഞ്ഞൂറു രൂപയ്ക്ക് ​ഗം​ഗുബായിയെ വേശ്യാലയത്തിൽ വിറ്റ് അയാൾ‌ തിരികെ പോയി. അതോടെ പൊലിഞ്ഞത് അവളുടെ അഭിനയ മോഹങ്ങൾ കൂടിയായിരുന്നു. പിന്നീടങ്ങോട്ടുള്ളത് കാമാത്തിപുരയിലെ മാഫിയാ ക്വീനായുള്ള ​ഗം​ഗുഭായിയുടെ മാറ്റമായിരുന്നു. അധോലോക സംഘത്തിലെ പ്രധാനികളിൽ പലരും ​ഗം​ഗുഭായിയുടെ സ്ഥിരം കസ്റ്റമേഴ്സായിരുന്നു.

അക്കാലത്താണ് പ്രധാന മാഫിയാ തലവനായ കരിം ലാലയുടെ കൂട്ടർ ​ഗം​ഗുഭായിയെ കൂട്ടബലാത്സം​ഗം ചെയ്യുന്നത്. എന്നാൽ വിട്ടുകൊടുക്കാൻ ​ഗം​ഗുഭായ് തയ്യാറായിരുന്നില്ല. കരിം ലാലയുടെ പക്കലെത്തുകയും നീതി ആവശ്യപ്പെടുകയും ചെയ്തു. അതിനായി കരിം ലാലയെക്കൊണ്ട് തനിക്ക് രാഖി കെട്ടിച്ച് സഹോദരതുല്യനാക്കി. കരിം ലാലയും ​ഗം​ഗുഭായിയെ സഹോദരിയെപ്പോലെ കണ്ടു. കരിം ലാലയുടെ സഹോദരി എന്ന സ്ഥാനം ​ഗം​ഗുഭായിയെയും മാഫിയാ ലോകത്തിന്റെ റാണിയാക്കി.

തുടർന്ന് കാമാത്തിപുരയിൽ ഒരു വേശ്യാലയവും ​ഗം​ഗുഭായ് നടത്താൻ തുടങ്ങി. ആവശ്യക്കാർക്ക് പെൺകുട്ടികളെ എത്തിക്കലും അധോലോക സം​ഘങ്ങളുമായുള്ള ബന്ധവും മയക്കുമരുന്നു കടത്തുമൊക്കെ ​ഗം​ഗുഭായിയെ കാമാത്തിപുരയുടെ മാഡം എന്ന വിളിപ്പേരിലേക്കെത്തിച്ചു. എന്നാൽ ഒരു പെൺകുട്ടിയെപ്പോലും ​സ്വന്തം സമ്മതമില്ലാതെ വേശ്യാലയത്തിൽ നിർത്തിയിരുന്നില്ലെന്നും പറയപ്പെടുന്നു. തന്റെ പണമോ സ്വാധീനങ്ങളോ ഉപയോ​ഗിച്ച് ഒരു പെൺകുട്ടിയെപ്പോലും ലൈം​ഗിക തൊഴിലിലേക്ക് ​ഗം​ഗു നിർബന്ധിച്ചിരുന്നില്ല.

പിൽക്കാലത്ത് ലൈം​ഗിക തൊഴിലാളികളുടെയും അനാഥക്കുട്ടികളുടെയും ഉന്നമനത്തിനു വേണ്ടി നിരന്തരം പ്രവർത്തിക്കാനും ​ഗം​ഗുഭായ് മുന്നിട്ടു നിന്നിരുന്നു. അന്നത്തെ പ്രധാനമന്ത്രി ജവഹർലാൽ നെഹ്റുവിനെ കണ്ട് ലൈം​ഗികതൊഴിലാളികളുടെ ജീവിതനിലവാരം മെച്ചപ്പെടുത്താനുള്ള ചർച്ചകൾക്കും ​ഗം​ഗുഭായ് മുൻകൈയെടുത്തിരുന്നു. ​ഗം​ഗുഭായിയെ സംബന്ധിച്ചിടത്തോളം കാമാത്തിപുരയിൽ കഴിയുന്ന ഓരോ സ്ത്രീയും കുട്ടിയും അവർക്ക് മക്കളെപ്പോലെയായിരുന്നു. ഇപ്പോഴും കാമാത്തിപുരയിൽ ​ഗം​ഗുഭായിയുടെ സ്മരണയ്ക്കായി പ്രതിമയും ചിത്രങ്ങളും വെക്കുന്നുണ്ട്.

സിനിമയ്ക്കു പിന്നാലെ വിവാദങ്ങളും

സിനിമയുടെ ട്രെയിലർ പുറത്തിറങ്ങിയതിനു പിന്നാലെ വിവാദങ്ങളും കൊടുമ്പിരി കൊള്ളുന്നുണ്ട്. ​ഗം​ഗുഭായിയുടെ വളർ‌ത്തുപുത്രൻ ബാബു റാവോജിയും കൊച്ചുമകൾ ഭാരതിയും സിനിമയ്ക്കെതിരെ രം​ഗത്തെത്തിയിരുന്നു. ചിത്രത്തിൽ അമ്മയെ വരച്ചുകാട്ടിയിരിക്കുന്ന വിധം മോശമാണെന്നും ഒരു സാമൂഹിക പ്രവർത്തകയെ പ്രോസ്റ്റിറ്റ്യൂട്ടായി മാത്രം അവതരിപ്പിച്ചിരിക്കുന്നു എന്നുമാണ് കുടുംബത്തിന്റെ പരാതി. പുസ്തകം എഴുതുന്നതിനു മുമ്പും സിനിമ എടുക്കുമ്പോഴും അനുമതി തേടിയിരുന്നില്ലെന്ന് ഭാരതിയും പറയുന്നു. പണത്തിനു വേണ്ടി അവർ തങ്ങളുടെ കുടുംബത്തെ ഇകഴ്ത്തി കാണിക്കുകയാണ്. തന്റെ മുത്തശ്ശി കുട്ടികളെ ദത്തെടുത്തിരുന്നു എന്നും ജീവിതത്തിലുടനീളം കാമാത്തിപുരയിലെ ലൈം​ഗിക തൊഴിലാളികൾക്കായി ജീവിതം ഉഴിഞ്ഞുവച്ച വനിതയാണെന്നും ഭാരതി പറയുന്നു.

Content Highlights : who is gangubai kathiawadi, mafia queen of mumbai, sanjay leela bhansali, alia bhatt