വടകര: നയാഭാരത് എന്നതാണ് നരേന്ദ്രമോദിയുടെ മുദ്രാവാക്യമെങ്കിലും ഇന്നത്തെ സാമ്പത്തികസ്ഥിതിവെച്ച് രാജ്യംപോകുന്നത് കൊളോണിയൽ കാലത്തേക്കാണെന്ന് മുൻകേന്ദ്രമന്ത്രിയും കോൺഗ്രസ് നേതാവുമായ മണിശങ്കർ അയ്യർ പറഞ്ഞു.
ഡി.സി.സി.യും ഇഗ്മയും ചേർന്ന് ‘ബാങ്ക് ദേശസാത്കരണം, തകരുന്ന ഇന്ത്യൻ സമ്പദ്‌വ്യവസ്ഥ, പൊതുമേഖല വിൽപ്പന’ എന്ന വിഷയത്തിൽ സംഘടിപ്പിച്ച ദേശീയസെമിനാറിൽ സംസാരിക്കുകയായിരുന്നു അദ്ദേഹം. രാജ്യത്തിന്റെ ജി.ഡി.പി. 4.5 ശതമാനമാണെന്നാണ് ഇതുവരെ അവകാശപ്പെട്ടത്. എന്നാൽ 2.5 ശതമാനം പെരുപ്പിച്ചുകാണിച്ചതാണെന്നാണ് അരവിന്ദ് സുബ്രഹ്മണ്യത്തെപ്പോലുള്ള സാമ്പത്തികവിദഗ്‌ധർ ഇപ്പോൾ തെളിയിക്കുന്നത്.
വെറും രണ്ട് ശതമാനംമാത്രമാണ് രാജ്യത്തിന്റെ സാമ്പത്തികവളർച്ച. ഇത് കൊളോണിയൽ കാലത്തിനു തുല്ല്യമാണ്. പുതിയ ഭാരതത്തിലേക്കെന്നും പറഞ്ഞ് പഴയ ഭാരതത്തിലേക്കാണ് മോദി രാജ്യത്തെ കൊണ്ടുപോകുന്നത്. വ്യവസായി രാഹുൽബജാജ് കഴിഞ്ഞദിവസം പറഞ്ഞത് സെപ്റ്റംബറിൽ മുൻ പ്രധാനമന്ത്രി മൻമോഹൻസിങ് പങ്കുവെച്ച ആശങ്കയാണ്. രാജ്യത്തിന്റെ വ്യാപാരമേഖലയെ ഭയം ഗ്രസിച്ചിരിക്കുന്നുവെന്ന് അന്ന് അദ്ദേഹം ചൂണ്ടിക്കാട്ടിയതാണ്. സർക്കാരും വ്യാപാരമേഖലയും തമ്മിലുള്ളവിശ്വാസം തകർന്നു. ഇതുതന്നെയാണ് രാഹുൽ ബജാജും പറഞ്ഞത്. അദ്ദേഹത്തിന്റെ അഭിപ്രായം രാജ്യതാത്പര്യങ്ങൾക്ക് വിരുദ്ധമാണെന്ന് പറഞ്ഞ ധനമന്ത്രി നിർമലാ സീതാരാമൻ എന്തിന്റെ അടിസ്ഥാനത്തിലാണ് ശുഭാപ്തിവിശ്വാസം പ്രകടിപ്പിക്കുന്നതെന്ന് അദ്ദേഹം ചോദിച്ചു. നിർമലാ സീതാരാമന്റെ നിലപാടാണ് രാജ്യതാത്പര്യങ്ങൾക്ക് വിരുദ്ധം. രാജ്യം ഇതുവരെ കാണാത്ത തൊഴിലില്ലായ്മയ്ക്ക് സാക്ഷ്യംവഹിക്കുന്നത്. മുമ്പ് ഭൂരിഭാഗം സംസ്ഥാനങ്ങളിലും ബി.ജെ.പി. ഭരണമായിരുന്നു. ഇന്ന് സ്ഥിതി മാറിക്കൊണ്ടിരിക്കുന്നു. അധികംവൈകാതെ തന്നെ കോൺഗ്രസ് തിരിച്ചുവരും. ഇപ്പോൾ ഞങ്ങൾ ആഗ്രഹിക്കുന്നത് കോൺഗ്രസിന്റെ വിജയമല്ലെന്നും ബി.ജെ.പി.യുടെ പരാജയമാണെന്നും മണിശങ്കർ അയ്യർ വ്യക്തമാക്കി.
ഡി.സി.സി. പ്രസിഡന്റ് ടി. സിദ്ദിഖ് അധ്യക്ഷതവഹിച്ചു. സാമ്പത്തികവിദഗ്‌ധൻ ഡോ. ബി.എ. പ്രകാശ് പ്രഭാഷണം നടത്തി. ഇ. നാരായണൻനായർ, കെ.പി.സി.സി. ജനറൽസെക്രട്ടറിമാരായ എൻ. സുബ്രഹ്മണ്യൻ, കെ. പ്രവീൺകുമാർ, കെ.പി.സി.സി. നിർവാഹകസമിതി അംഗങ്ങളായ ഐ. മൂസ, വി.എം. ചന്ദ്രൻ, കെ.ടി. ജെയിംസ്, കെ.പി.സി.സി. അംഗം രത്നവല്ലി, ഡി.സി.സി. സെക്രട്ടറിമാരായ ടി.വി. സുധീർകുമാർ, കാവിൽ രാധാകൃഷ്ണൻ, കെ.പി. കരുണൻ, ബാബു ഒഞ്ചിയം, പ്രമോദ് കക്കട്ടിൽ, സുനിൽ മടപ്പള്ളി, ബ്ലോക്ക് പ്രസിഡന്റ് പുറന്തോടത്ത് സുകുമാരൻ തുടങ്ങിയവർ സംസാരിച്ചു.
