തലയോലപ്പറമ്പ് : കോവിഡ് പ്രതിരോധ പ്രവർത്തനങ്ങളുടെ ഭാഗമായി തലയോലപ്പറമ്പ് ഗ്രാമപ്പഞ്ചായത്തിൽ ആരംഭിക്കുന്ന കൊറോണ ഫസ്റ്റ് ലൈൻ ട്രീറ്റ്മെന്റ് സെന്ററിലേക്ക്(സി.എഫ്.എൽ.ടി.സി.) ശുചീകരണ വിഭാഗത്തിലേക്ക് ദിവസവേതന അടിസ്ഥാനത്തിൽ ജോലിക്കാരെ ആവശ്യമുണ്ട് താത്പ്പര്യമുള്ളവർ വെള്ളിയാഴ്ച ഉച്ചകഴിഞ്ഞ് 2.30-ന് പഞ്ചായത്ത് ഓഫീസിൽ നടക്കുന്ന കൂടിക്കാഴ്ചയിൽ പങ്കെടുക്കണമെന്ന് സെക്രട്ടറി അറിയിച്ചു.
വെള്ളൂർ : ഗ്രാമപ്പഞ്ചായത്തിലെ ഭവൻസ് ന്യൂസ്‌പ്രിന്റ് വിദ്യാലത്തിൽ ആരംഭിക്കുന്ന കോവിഡ് ഫസ്റ്റ് ലൈൻ ചികിത്സാകേന്ദ്രത്തിലേക്ക് ദിവസവേതനാടിസ്ഥാനത്തിൽ ശുചീകരണത്തിനായി തൊഴിലാളികൾ, സുരക്ഷാ ജീവനക്കാർ എന്നിവരുടെ താത്കാലിക ഒഴിവുണ്ട്. താല്പര്യമുള്ളവർ വെള്ളിയാഴ്ച 11-ന് പഞ്ചായത്തോഫീസിൽ നടക്കുന്ന കൂടിക്കാഴ്ചക്കെത്തണമെന്ന് സെക്രട്ടറി കെ.സുരേഷ് കുമാർ അറിയിച്ചു.
കോട്ടയം : തലയോലപ്പറമ്പ്, അറുനൂറ്റിമംഗലം കമ്യൂണിറ്റി ഹെൽത്ത് സെൻററുകളിൽ കൊറോണ ഡ്യൂട്ടിക്കായി സ്റ്റാഫ് നഴ്സുമാരെ കരാർ അടിസ്ഥാനത്തിൽ നിയമിക്കുന്നതിന് അപേക്ഷ ക്ഷണിച്ചു. യോഗ്യത ബി.എസ്‌സി. നഴ്സിങ്, ജി.എൻ.എം. ബയോഡേറ്റ, യോഗ്യതാ സർട്ടിഫിക്കറ്റുകൾ എന്നിവ സഹിതം അപേക്ഷ 24-ന് ഒന്നിനകം bdokdty@gmail.com എന്ന ഇ-മെയിൽ വിലാസത്തിൽ അയയ്ക്കണം.
വൈക്കം : മറവൻതുരുത്ത് ഗ്രാമപ്പഞ്ചായത്തിൽ ആരംഭിക്കുന്ന കൊറോണ ഫസ്റ്റ്‌ലൈൻ ട്രീറ്റ്മെന്റ് സെന്ററിലേക്ക്(സി.എഫ്.എൽ.ടി.സി.) ശുചീകരണത്തൊഴിലാളികളെ ആവശ്യമുണ്ട്. അപേക്ഷകൾ 30-ന് മുമ്പ് നൽകണമെന്ന് സെക്രട്ടറി അറിയിച്ചു.
കാഞ്ഞിരം മുറിച്ചുനീക്കി
കുറവിലങ്ങാട് : എം.സി.റോഡിൽ സംരക്ഷണപ്പട്ടികയിൽ ഉൾപ്പെടുത്തിയിരുന്ന മരം മുറിച്ചുമാറ്റി. കോഴായിലെ നിർദിഷ്ട സയൻസ് സിറ്റിക്ക് എതിർവശം തോടിനോട് ചേർന്നുനിന്നിരുന്ന കാഞ്ഞിരമരമാണ് മുറിച്ചത്.
കെ.എസ്.ടി.പി. റോഡ് നവീകരണം നടത്തിയപ്പോൾ എം.സി.റോഡിൽ പട്ടിത്താനത്തിനും മൂവാറ്റുപുഴയ്ക്കുമിടയിൽ നൂറോളം മരങ്ങൾ മുറിച്ചുനീക്കാതെ സംരക്ഷണപ്പട്ടികയിൽ ഉൾപ്പെടുത്തിയിരുന്നു. വാഹനങ്ങൾക്കും സമീപത്തെ പുരയിടങ്ങൾക്കും ഭീഷണിയില്ലാത്ത മരങ്ങളായിരുന്നു സംരക്ഷിച്ചത്. എം.സി.റോഡ് നവീകരണവുമായി ബന്ധപ്പെട്ട് മുറിച്ചുനീക്കിയതിന് പകരം വൃക്ഷങ്ങൾ പാതയോരത്ത്‌ െവച്ചുപിടിപ്പിക്കുകയും ചെയ്തിരുന്നു.
നേരത്തേ മരം മുറിച്ചുനീക്കാൻ നീക്കം നടന്നെങ്കിലും കെ.എസ്.ടി.പി.യുടെ ഇടപെടലോടെ ശ്രമം ഉപേക്ഷിക്കുകയായിരുന്നു. കെ.എസ്.ടി.പി.യിൽനിന്ന് ഏതാനുംമാസം മുമ്പാണ് എം.സി.റോഡിന്റെ ചുമതല പൊതുമരാമത്ത് വകുപ്പിന് ലഭിച്ചത്. ഇതോടെ മേഖലയിൽ മരങ്ങൾ മുറിച്ചുനീക്കുന്നതും അനധികൃത നിർമാണപ്രവർത്തനങ്ങൾ നടത്തുന്നതും പതിവായി.
പഞ്ചായത്ത് ഓഫീസ് പ്രവർത്തിക്കും
കടുത്തുരുത്തി : കോവിഡ്-19 ഭീതി നിലനിൽക്കുന്നതിനാൽ കടുത്തുരുത്തി ഗ്രാമപ്പഞ്ചായത്ത് ഓഫീസി ന്റെ പ്രവർത്തനം ബുധനാഴ്ച മുതൽ നിയന്ത്രണങ്ങളോടെയായിരിക്കുമെന്ന് പഞ്ചായത്ത് പ്രസിഡന്റ് പി.വി.സുനിൽ അറിയിച്ചു. പഞ്ചായത്ത് ഓഫീസിന്റെ പ്രവർത്തനം നിർത്തിവെച്ചതായുള്ള പ്രചാരണം തെറ്റാണെന്നും ചൊവ്വാഴ്ചയും ഓഫീസ് പ്രവർത്തിച്ചതായും പ്രസിഡന്റ് പറഞ്ഞു. വിവിധ ആവശ്യങ്ങൾക്ക് ഓഫീസിൽ എത്തുന്ന പൊതുജനങ്ങൾക്ക് ബുദ്ധിമുട്ടുണ്ടാകാത്ത രീതിയിലാണ് ക്രമീകരണങ്ങൾ ഏർപ്പെടുത്തിയിരിക്കുന്നത്. പഞ്ചായത്ത് ഓഫീസിലെത്തുന്നവർ കോവിഡ് നിയന്ത്രണങ്ങൾ പൂർണമായും പാലിക്കണമെന്നും അറിയിപ്പിൽ പറയുന്നു.
പൊതുചടങ്ങുകളിലെ പങ്കാളിത്തം നിയന്ത്രിക്കും
വൈക്കം : പൊതുചടങ്ങുകളിലെ പങ്കാളിത്തം നിയന്ത്രണ വിധേയമാക്കാൻ നഗരസഭാ അവലോകനയോഗം തീരുമാനിച്ചു. തീരുമാനങ്ങൾ ഇങ്ങനെ: മരണമൊഴികെയുള്ള എല്ലാ പൊതു ചടങ്ങുകൾക്കും മറ്റു സ്വകാര്യ ആഘോഷ പരിപാടികൾക്കും നഗരസഭയിൽ സത്യവാങ്മൂലം സമർപ്പിച്ച് മുൻകൂർ അനുമതി വാങ്ങണം.
മുൻപ് അനുവർത്തിച്ചിരുന്ന പോലെ തന്നെ, മരണങ്ങൾ നഗരസഭ അധികൃതരെയും പ്രദേശത്തെ ആരോഗ്യ പ്രവർത്തകരെയും അറിയിക്കുകയും ചടങ്ങിൽ കോവിഡ് പ്രോട്ടോക്കോൾ പാലിക്കുകയും ചെയ്യേണ്ടതാണ്. എല്ലാ ചടങ്ങുകളിലും പങ്കെടുക്കുന്നവരുടെ വിശദാംശങ്ങൾ എഴുതി സൂക്ഷിക്കാൻ ബുക്ക് കരുതണം. അധികൃതർ ആവശ്യപ്പെടുന്ന പക്ഷം അത് നൽകേണ്ടതുമാണ്.
നാടിന്റെയും സുരക്ഷയ്ക്കായി മേൽ നിർദേശങ്ങൾ എല്ലാവരും പാലിക്കണമെന്ന് ആരോഗ്യ സ്റ്റാൻഡിങ് കമ്മിറ്റി ചെയർമാൻ അഡ്വ. അംബരീഷ് ജി.വാസു ആവശ്യപ്പെട്ടു.
