കൊല്ലം : കേരളത്തിലേത് യുവജനങ്ങളെ വഞ്ചിച്ച സർക്കാരാണെന്ന് യൂത്ത് കോൺഗ്രസ് സംസ്ഥാന പ്രസിഡന്റ് ഷാഫി പറമ്പിൽ എം.എൽ.എ.
ജയ് കിസാൻ, സേവ് പി.എസ്.സി. എന്ന മുദ്രാവാക്യമുയർത്തി യൂത്ത് കോൺഗ്രസ് ജില്ലാ കമ്മിറ്റി സംഘടിപ്പിച്ച യുവരോഷം യുവജനറാലി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
റാങ്ക് ലിസ്റ്റിൽ വന്ന ആയിരക്കണക്കിന് ഉദ്യോഗാർഥികൾ കൂലിപ്പണിക്ക് പോകേണ്ട ഗതികേടിലാണ്. ധിക്കാരവും ധാർഷ്ട്യവും ഉള്ളിൽ കൊണ്ടുനടക്കുകയാണ് പിണറായി സർക്കാർ.
കേരളത്തിലെ ചെറുപ്പക്കാരുടെ സ്വപ്നമായ സർക്കാർ ജോലി ആരുടെയും ഔദാര്യമല്ല. ഉദ്യോഗാർഥികളുടെ അവകാശമാണ്. ലിസ്റ്റുകളുടെ കാലാവധി നീട്ടാൻ സർക്കാർ തയ്യാറാവുന്നില്ല.
യൂത്ത് കോൺഗ്രസ് ജില്ലാ പ്രസിഡന്റ് ആർ.അരുൺരാജ് അധ്യക്ഷത വഹിച്ചു. യൂത്ത് കോൺഗ്രസ് അഖിലേന്ത്യാ സെക്രട്ടറി പുഷ്പലത, ഉപാധ്യക്ഷൻ ശബരിനാഥ് എം.എൽ.എ., ഡി.സി.സി. പ്രസിഡന്റ് ബിന്ദുകൃഷ്ണ, ചാണ്ടി ഉമ്മൻ തുടങ്ങി കോൺഗ്രസിന്റെയും യൂത്ത് കോൺഗ്രസിന്റെയും സംസ്ഥാന-ജില്ലാ നേതാക്കളും പങ്കെടുത്തു.
കൊല്ലം ആനന്ദവല്ലീശ്വരം ക്ഷേത്രമൈതാനത്തുനിന്ന്‌ ആരംഭിച്ച റാലിയിൽ നിരവധി പ്രവർത്തകർ പങ്കെടുത്തു.
