തൃക്കരിപ്പൂർ : റോഡ് സൈക്ലിങ്ങിൽ റിട്ട. നാവിക ഉദ്യോഗസ്ഥന്റെ സൂപ്പർ റോഡണർ നേട്ടം. പള്ളിക്കര പാക്കം സ്വദേശി വി.എൻ.ശ്രീകാന്താണ് മാനസിക-കായികശേഷികളുടെ മാറ്റുരയ്ക്കുന്ന അപൂർവ നേട്ടം കൈവരിച്ചത്. ഫ്രാൻസിലെ ഓഡാക്സ് ക്ലബ്ബ് പാരിസിൻ എന്ന അന്തർദേശീയ സൈക്ലിങ് ബോഡിയാണ് കൃത്യമായ നിബന്ധനകളോടെ മത്സരങ്ങൾ സംഘടിപ്പിക്കുന്നത്. രാജ്യത്ത് ഓഡാക്സ് ഇന്ത്യ റോഡണഴ്സാണ് മത്സരം നടത്തുന്ന ഏജൻസി. 39.40 മണിക്കൂർ കൊണ്ട് 600 കിലോമീറ്റർ താണ്ടിയാണ് ശ്രീകാന്ത് നേട്ടം കൈവരിച്ചത്.
പതിമൂന്നര മണിക്കൂറിൽ 200 കിലോമീറ്റർ, 20 മണിക്കൂറിൽ 300 കിലോമീറ്റർ, 27 മണിക്കൂറിൽ 400 കിലോമീറ്റർ, 40 മണിക്കൂറിൽ 600 കിലോമീറ്റർ എന്നിങ്ങനെയാണ് മത്സരം സംഘടിപ്പിക്കുന്നത്. നവംബറിൽ തുടങ്ങി ഒക്ടോബറിൽ അവസാനിക്കുന്ന സൈക്ലിങ് വർഷത്തിൽ നാല് ഘട്ടങ്ങളും പൂർത്തിയാക്കുന്നവർക്കാണ് സൂപ്പർ റോഡണർ പദവി ലഭിക്കുന്നത്. ഇതോടെ ഇന്ത്യയിലും വിദേശങ്ങളിലും നടക്കുന്ന മത്സരങ്ങളിൽ 39-കാരനായ ശ്രീകാന്തിന് പങ്കെടുക്കാൻ സാധിക്കും .
സൈക്കിൾ പഞ്ചറായാൽ അതൊട്ടിക്കലും ട്യൂബ് മാറ്റണമെങ്കിൽ അതും എല്ലാം പങ്കെടുക്കുന്ന വ്യക്തി സ്വയം ചെയ്യണം. സൈക്കിളോട്ടത്തിൽ പങ്കെടുക്കുന്നവരൊഴികെ മറ്റാരുടെയും സഹായം കൈക്കൊള്ളരുത് എന്നാണ് നിബന്ധന. കാസർകോട് പെഡലേഴ്‌സ് എക്സിക്യൂട്ടീവ് അംഗമായ ശ്രീകാന്ത് 2010 മുതൽ സൈക്ലിങ്ങിൽ സജീവമാണ്. നാവികസേനയിൽനിന്ന് വിരമിച്ച ശേഷം പെരിയയിൽ സെലോടേപ്പ് എന്ന സ്ഥാപനം നടത്തുന്നു. ഗുരുവായൂർ ശ്രീകൃഷ്ണ കോളേജിൽ അസി. പ്രൊഫസറായ ഡോ. ഗായത്രിയാണ് ഭാര്യ. മക്കൾ: സാത്വികി, ഗൗരിത.
