ക്രോസ് ഡ്രസിങ്ങിനെ ഉൾക്കൊള്ളുന്നതാണ് സമഗ്ര ജനാധിപത്യം | ആണായി ജീവിക്കുമ്പോഴും പെണ്ണായി ഒരുങ്ങണം 03

'ഓ, നിങ്ങള്‍ അപ്പോള്‍ ഡ്രാഗ് ക്വീന്‍ ആണല്ലേ?'
'അല്ല, ഞാനവരുടെ അത്ര വിസ്മയപ്പെടുത്തുന്ന ഒരാളോ വിനോദം നല്‍കുന്ന ഒരാളോ അല്ല.'
'ഓഹോ, അപ്പോള്‍ നിങ്ങള്‍ സ്ത്രീയായി മാറണം എന്നാഗ്രഹിക്കുന്ന വ്യക്തിയാണല്ലേ?'
'അല്ല, ഞാന്‍ എന്റെ പുരുഷശരീരത്തില്‍ വളരെയധികം സന്തുഷ്ടനാണ്. എന്നാല്‍, ചില സമയത്ത് എന്നെ എനിക്ക് ഒരു പെണ്ണായി പ്രകടിപ്പിക്കാന്‍ ഇഷ്ടമാണ്.'
'നിങ്ങളൊരു ഗേ ആണല്ലേ?'
'അല്ല. എനിക്ക് ആകര്‍ഷണം തോന്നാറുളളത് സ്ത്രീകളോടാണ്..' "

യു.എസിലെ ഡീത്രോയിൽ ഒരു യാഥാസ്ഥിതിക കുടുംബത്തില്‍ ജനിച്ച സാവന്ന ഹോക്ക് തന്നെ കുറിച്ച് 'ടെഡ് എക്‌സി'(TED X)ല്‍ പറഞ്ഞുതുടങ്ങിയത് ഇങ്ങനെയാണ്.ഗേ ആയ അയല്‍ക്കാരന്‍ ചെറുപ്പക്കാരനെ കുറിച്ച് എല്ലായ്‌പ്പോഴും സഹതപിച്ചിരുന്ന സ്വന്തം മാതാപിതാക്കളോട് തന്റെ രഹസ്യം തുറന്നുപറയാന്‍ ഭയമായിരുന്നു ഹോക്കിന്. തന്നെപോലുളള ഒരാളെ കണ്ടെത്താന്‍ സാധിക്കാതിരുന്ന കൗമാരത്തില്‍നിന്ന് മുന്നോട്ടുളള വളര്‍ച്ചയില്‍, തന്നെ തിരിച്ചറിയുന്ന ഘട്ടങ്ങളെ കുറിച്ചും നേരിടേണ്ടി വന്ന പ്രതിസന്ധികളെ കുറിച്ചുമെല്ലാം ഹോക്ക് മനസ്സ് തുറക്കുന്നുണ്ട്. ജെന്‍ഡറിന് ഉപരിയായി ഓരോ മനുഷ്യര്‍ക്കും വില കല്പിക്കേണ്ടതുണ്ടെന്ന് ഓര്‍മിപ്പിക്കുന്നതായിരുന്നു ക്രോസ് ഡ്രസിങ്ങിനെ കുറിച്ചുളള രഹസ്യാത്മക ഇല്ലാതാക്കുക എന്ന ലക്ഷ്യത്തോടെ 'ടെഡ് എക്‌സി'ല്‍ സാവന്ന നടത്തിയ തുറന്നുപറച്ചില്‍.

അതീവരഹസ്യമായി നടത്തുന്ന ക്രോസ് ഡ്രസിങ് പിടിക്കപ്പെടുന്നതോടെ ഇവരെ കാത്തിരിക്കുന്നത് പല തരത്തിലുളള പ്രതിസന്ധികളാണ്. തുടക്കത്തില്‍ ഭ്രാന്തനെന്നുതന്നെ മുദ്രകുത്തിയേക്കാം. ഈശ്വരവിശ്വാസം കുറഞ്ഞതു കൊണ്ടാണെന്ന് പറഞ്ഞു ആരാധാനാലയങ്ങളില്‍ കയറിയിറങ്ങേണ്ടി വന്നേക്കാം. പിന്തുണയ്ക്കാന്‍ ആരുമില്ലാതെ കുറ്റപ്പെടുത്തലുകള്‍ മാത്രം നിരന്തരം കേള്‍ക്കേണ്ടി വരുമ്പോള്‍ ഉണ്ടാകുന്ന മാനസികാഘാതം താങ്ങാനാകാത്തവരുണ്ട്. ക്രോസ് ഡ്രസിങ് ചെയ്യുന്നത് കണ്ടെത്തിയ സുഹൃത്തിന്റെ പ്രകൃതിവിരുദ്ധ പീഡനത്തിന് ഇരയായവരുണ്ട്. ഇക്കാര്യം പുറത്തുപറയുമെന്ന ഭീഷണിയില്‍ പ്രിയപ്പെട്ടവരില്‍ നിന്ന് ഇന്നും ലൈംഗികപീഡനം സഹിക്കുന്നവരുണ്ട്.

സ്വീഡനില്‍ താമസിക്കുന്ന നാല്‍പതുകാരനായ ജഗന്റെ അനുഭവം നോക്കാം. വിവാഹം കഴിഞ്ഞ ആദ്യവര്‍ഷങ്ങളില്‍ ക്രോസ് ഡ്രസിങ് ചെയ്യുന്ന കാര്യം അതീവരഹസ്യമാക്കി സൂക്ഷിക്കാന്‍ ജഗന് സാധിച്ചു. ഇതിനിടയില്‍ ദമ്പതികള്‍ക്ക് ഒരു കുഞ്ഞു ജനിച്ചു. ഒരിക്കല്‍പെണ്‍വേഷത്തില്‍ നില്‍ക്കുന്ന ജഗനെ ഭാര്യ കണ്ടെത്തി. ജഗന് മറച്ചുവെക്കാനാകുമായിരുന്നില്ല. എല്ലാം ഭാര്യക്ക് മുന്നില്‍ തുറന്നുപറഞ്ഞു. അസ്വസ്ഥയായ ഭാര്യ സ്വയം കൗണ്‍സിലിങ്ങിന് പോവുകയാണ് ചെയ്തത്. സ്വരച്ചേര്‍ച്ചയില്ലെന്ന് പറഞ്ഞ് ജഗനില്‍നിന്ന് പിരിഞ്ഞു താമസിക്കാനും തുടങ്ങി. പക്ഷേ, ഭര്‍ത്താവ് ഒരു ക്രോസ് ഡ്രസറാണെന്ന കാര്യം അവര്‍ രഹസ്യമായി തന്നെ സൂക്ഷിച്ചു. കാര്യമറിയാത്ത ബന്ധുക്കള്‍ ഇരുവരെയും ഒരുമിപ്പിക്കാനുളള ശ്രമം തുടങ്ങി. ഇതിനിടയിലാണ് ജഗന് സ്വീഡനില്‍ ജോലി ശരിയാകുന്നതും അങ്ങോട്ടേക്ക് പോകുന്നതും. പൊരുത്തക്കേടുകള്‍ ഉണ്ടെങ്കിലും മകനുവേണ്ടി ഒന്നിച്ചു താമസിക്കാന്‍ ഇരുവരും തീരുമാനിച്ചു. ജഗനൊപ്പം കുഞ്ഞുമായി ഭാര്യയും സ്വീഡനിലെത്തി. ഇതിനിടയില്‍ സ്വീഡനിലെ ക്രോസ് ഡ്രസേഴ്‌സുമായി ജഗന്‍ സൗഹൃദം സ്ഥാപിച്ചു. അവരുടെ കുടുംബാംഗങ്ങള്‍ അവര്‍ക്ക് നല്‍കുന്ന പിന്തുണ ജഗനും ഭാര്യയും പലപ്പോഴും നേരിട്ട് കാണുകയും ചെയ്തു. ഇതോടെ ഭാര്യക്ക് തന്നോടുളള കാഴ്ചപ്പാടില്‍ മാറ്റം വന്നു തുടങ്ങിയെന്നാണ് ജഗന്‍ പറയുന്നത്.

സമൂഹത്തിന്റെ കാഴ്ചപ്പാടിന് അനുസരിച്ചായിരിക്കും വ്യക്തിയുടെ അംഗീകാരം എന്നതില്‍ തനിക്കത്ര വിശ്വാസമില്ലെന്ന് ജഗന്‍ പറയുന്നു. കാരണം സ്വീഡനിലും ഈ വിഭാഗത്തെ ഉള്‍ക്കൊളളുന്നവരും ഉള്‍ക്കൊളളാത്തവരും ഉണ്ട്. ഒരു വ്യക്തിയുടെ സ്വഭാവം ഏതു സമൂഹത്തിലായാലും ഒരുപോലെയായിരിക്കും. അംഗീകരിക്കുന്നവരാണെങ്കില്‍ തുടക്കത്തില്‍ തന്നെ അംഗീകരിക്കും. ഒരു പക്ഷേ ഇതെല്ലാം അംഗീകരിക്കുന്ന ഒരു നാടുണ്ടെങ്കില്‍ അവിടെ പോയി താമസിക്കാനേ അവര്‍ പറയൂ. എന്റെ വൈഫ് പുറത്തുനിന്ന് നോക്കിയിട്ട് അതുകൊണ്ട് അവര്‍ക്കൊരു കുഴപ്പവുമുണ്ടാകില്ലെന്ന് ഉറപ്പു വരുത്തിയിട്ടാണ് എന്നോടുളള മനോഭാവം മാറ്റിയത്. അതായത് പിന്തുണയ്ക്കുന്ന സമൂഹത്തില്‍ പോയതുകൊണ്ട് കാര്യമില്ല, അവര്‍ക്കത് വേറെ പ്രശ്‌നങ്ങള്‍ ഉണ്ടാക്കില്ലെന്ന് ബോധ്യപ്പെടുമ്പോഴാണ് അംഗീകരിക്കുന്നത്. മറ്റൊന്നുകൂടി ജഗന്‍ പറഞ്ഞുവെച്ചു, 'How can people stay in India, I am glad that I am escaped..'

വസ്ത്രധാരണം ആരുടെ തീരുമാനം

മുടി വളര്‍ത്തി, മുഖച്ചമയവും ആഭരണങ്ങളും അണിയുന്ന, പാവാട, ഗൗണ്‍ (രാജ്യങ്ങള്‍ക്കും ദേശങ്ങള്‍ക്കും അനുസരിച്ച് അതു വ്യത്യാസപ്പെടാം) മുതലായ വസ്ത്രങ്ങള്‍ ധരിക്കുന്നവളാണ് സ്ത്രീ. പുരുഷനാകട്ടേ മുടി മുറിച്ച് ഷോര്‍ട്‌സോ പാന്റോ ധരിക്കുന്നവന്‍. സ്ത്രീ-പുരുഷ സങ്കല്പങ്ങള്‍ മാത്രം ഉണ്ടായിരുന്ന കാലഘട്ടത്തിന്റെ, അന്നത്തെ സാമൂഹിക സംസ്‌കാരത്തിന്റെ, സാഹചര്യങ്ങളുടെ ഉല്പ്പന്നമായിരുന്നു സ്ത്രീക്കും പുരുഷനും വേഷഭൂഷാദികളിലുളള വേര്‍തിരിവ്. പോക്കറ്റില്ലാത്ത വസ്ത്രങ്ങള്‍ ധരിക്കുന്ന സ്ത്രീകള്‍ക്കുളളതായിരുന്നു പഴ്‌സ്. കാഴ്ചയില്‍ തന്നെ സ്ത്രീയോ പുരുഷനോ എന്ന് തിരിച്ചറിയുക. ചെയ്യുന്ന തൊഴിലിന് ചേര്‍ന്ന രീതിയില്‍ സൗകര്യപ്രദം ഇതെല്ലാമായിരിക്കണം ലിംഗം നോക്കി വസ്ത്രം തീരുമാനിക്കപ്പെട്ടതിനുളള കാരണങ്ങള്‍.

പക്ഷേ, തുല്യതയിലേക്കുളള മുന്നേറ്റത്തില്‍ മാറിയ സാമൂഹിക സാഹചര്യങ്ങളെ വേഗത്തില്‍ ഉള്‍ക്കൊണ്ടത് സ്ത്രീകളാണ്. ഉന്നതവിദ്യാഭ്യാസം നേടുകയും തൊഴിലെടുക്കാനും പുരുഷകേന്ദ്രീകൃതമായ പല മേഖലകളിലും തങ്ങളുടെ സാന്നിധ്യം അറിയിക്കാനും തുടങ്ങിയതിനൊപ്പം തന്നെ അവര്‍ പുരുഷന്മാരുടേതെന്ന് കല്പിച്ചിരുന്ന പാന്റും ടീഷര്‍ട്ടും മടി കൂടാതെ ധരിച്ചു. മുടി വളര്‍ത്താനും കാതു കുത്താനും ചിലരെങ്കിലും മുതിര്‍ന്നു എന്നല്ലാതെ സ്ത്രീകളുടേത് എന്ന് കരുതപ്പെട്ട വസ്ത്രാലങ്കാരങ്ങള്‍ മടികൂടാതെ സ്വീകരിക്കാനുതകുന്ന മാറ്റങ്ങളൊന്നും പുരുഷന്മാരെ സംബന്ധിച്ചിടത്തോളം ഉണ്ടായില്ല.

പുരുഷത്വത്തിന്റെ പ്രതീകമായി ആദ്യകാലങ്ങളില്‍ കണ്ടിരുന്നത് സൈനികരെ ആയിരുന്നുവെന്നും അവര്‍ യൂണിഫോമിന്റെ ഭാഗമായി തുടര്‍ന്ന മുടിമുറിക്കല്‍ ഉള്‍പ്പടെയുളള വേഷവിധാനങ്ങളെ അതേപടി പിന്തുടരുകയായിരുന്നുവെന്നും ചില പഠനങ്ങളില്‍ ചൂണ്ടിക്കാണിക്കുന്നുണ്ട്. വസ്ത്രധാരണത്തില്‍ മാത്രമല്ല പെരുമാറ്റത്തിലും ഒരു പുരുഷന്‍ പാലിക്കേണ്ട രീതികള്‍ നിഷ്‌കര്‍ഷിക്കപ്പെട്ടു. കരയുന്നതുള്‍പ്പടെയുളള വികാരപ്രകടനങ്ങള്‍ അവന് നിഷിദ്ധമായിരുന്നു. മറ്റൊരര്‍ഥത്തില്‍ നോക്കുകയാണെങ്കില്‍ സ്ത്രീകള്‍ക്ക് മുന്നിലുണ്ടായിരുന്ന വിശാലമായ തിരഞ്ഞെടുപ്പു സാധ്യതകള്‍ പുരുഷന് മുന്നിലുണ്ടായിരുന്നില്ല. സാമൂഹിക കല്പനകളെ സ്ത്രീ ചോദ്യം ചെയ്തപ്പോള്‍ 'മെയില്‍ സ്റ്റീരിയോടൈപ്പു'കളെ അതേപടി പിന്തുടരാന്‍ മാത്രമായിരുന്നു പുരുഷന്റെ ശ്രമം. അതല്ലാത്ത ശ്രമങ്ങള്‍ തന്റെ പൗരുഷത്തെ ചോദ്യം ചെയ്യുമെന്ന് അവന്‍ ഭയപ്പെടുകയും ചെയ്തിരിക്കണം.

ഇന്ന ലിംഗത്തിലുളളയാള്‍ ഇങ്ങനെ എന്ന നിയന്ത്രണങ്ങള്‍ സ്ത്രീയേക്കാള്‍ പുരുഷനായിരുന്നു കൂടുതല്‍. എന്തായാലും അക്കാലത്തുനിന്നും ജെന്‍ഡര്‍ ന്യൂട്രല്‍ വസ്ത്രങ്ങളെ കുറിച്ചുളള ചര്‍ച്ചകള്‍ നടക്കുന്ന കാലത്തേക്ക് നാം പ്രവേശിച്ചു കഴിഞ്ഞിരിക്കുന്നു.

നാം എന്നു തയ്യാറാകും?

'സെ്ക്‌സ്, ജെന്‍ഡര്‍, സെക്ഷ്വാലിറ്റി. ഇവ മൂന്നും വ്യത്യസ്തമാണ് എന്ന അടിസ്ഥാനപരമായ അറിവുപോലും നമ്മുടെ സമൂഹത്തിലെ ഭൂരിപക്ഷത്തിന് ഉണ്ടെന്ന് എനിക്ക് തോന്നിയിട്ടില്ല. അല്പം സ്ത്രീസ്വഭാവങ്ങളുളള ഒരു ആണ്‍കുട്ടിയെ പൊതുസമൂഹം എങ്ങനെഉപദ്രവിക്കുന്നുവെന്ന്‌ അറിയുന്നതുകൊണ്ട് തന്നെ ക്രോസ് ഡ്രസിങ് ചെയ്യുന്നുണ്ട് എന്നുപറഞ്ഞാല്‍ മാത്രം മറ്റുളളവര്‍ക്ക് മനസ്സിലാകുന്ന ഞാന്‍ ഇക്കാര്യം ഒരുതരത്തിലും പുറത്താകാതിരിക്കാനാണ് ശ്രമിക്കാറുളളത്. സാമൂഹികമായും സാമ്പത്തികമായും അത്രയധികം പ്രിവിലെജ് ആയിട്ടുളളവര്‍ക്ക് മാത്രമേ ബുദ്ധിമുട്ടിയാണെങ്കിലും പുറത്തുവരാനാകൂ. Gender Identity യിലൊക്കെ അറിവുള്ള, രാഷ്ട്രീയമുള്ള,പുതിയ കാഴ്ച്ചപ്പാടുകളുള്ള വളരെ കുറച്ച് പേരെ ഇതെല്ലാം അംഗീകരിക്കൂ. അംഗീകരിക്കുന്നു എന്നുകരുതി പിന്തുണയ്ക്കണമെന്നില്ല. മതത്തിന്റെ സ്വാധീനം വളരെ വലുതാണല്ലോ സമൂഹത്തില്‍.. മതബോധം ആഴത്തില്‍ വേരോടിയിട്ടുളള നമ്മുടെ സമൂഹത്തില്‍ അതില്ലാകുന്ന, ആധുനിക വിദ്യാഭ്യാസം നേടുന്ന ഒരു തലമുറയില്‍ മാത്രമേ എന്തെങ്കിലും പ്രതീക്ഷയുളളൂ. ചില മതാനുഷ്ഠാനങ്ങള്‍ക്ക് വേണ്ടി ക്രോസ് ഡ്രസിങ് അനുവദിച്ചേക്കാം. കൊറ്റംകുളങ്ങര ക്ഷേത്രത്തിലെ ചമയവിളക്ക് പോലെ. ആചാരത്തിനായി പിന്തുണയ്ക്കുന്നവര്‍ യഥാര്‍ഥ ജീവിതത്തില്‍ അത് അംഗീകരിക്കുമെന്ന് തോന്നുന്നില്ല.' ക്രോസ് ഡ്രസിങ് ചെയ്യുന്ന രാകേഷ് സമൂഹത്തെ കുറിച്ചുളള തന്റെ കാഴ്ചപ്പാട് പങ്കുവെച്ചത് ഇപ്രകാരമാണ്.

നമ്മുടെ വിദ്യാഭ്യാസ സമ്പ്രദായത്തിന്റെ കുറവുകളിലേക്ക് തന്നെയാണ് വീണ്ടും ചൂണ്ടുവിരല്‍ ഉയര്‍ത്തപ്പെടുന്നത്. സെക്‌സ് എജുക്കേഷന്‍ എന്നുകേട്ടപാടെ, സെക്‌സെന്ന വാക്കിന്റെ വിശാല അര്‍ഥത്തെ കുറിച്ച് ചര്‍ച്ച ചെയ്യാതെ, അതിലെ അശ്ലീലതയിലേക്ക് മാത്രം കണ്ണും കാതും തുറന്നുവെച്ച് എത്ര കാലം നാം ഇനിയും മുന്നോട്ടുപോകും. ലിംഗ ന്യൂനപക്ഷങ്ങളെകുറിച്ചും വൈവിധ്യങ്ങളെ കുറിച്ചും ബോഡി ഷെയ്മിങ്ങിനെ കുറിച്ചുമെല്ലാം അറിഞ്ഞു വളരേണ്ടവരാണ് വിദ്യാര്‍ഥികള്‍. കുഞ്ഞുമനസ്സില്‍ രൂപത്തെ ചൊല്ലി പതിയുന്ന കളിയാക്കലുകളില്‍ ആത്മവിശ്വാസം തകര്‍ന്നവര്‍ നമുക്കിടയില്‍ തന്നെയില്ലേ? കാലാഹരണപ്പെട്ട വിദ്യാഭ്യാസ സമ്പ്രദായവും മാറിയ കാലത്തിനനുസരിച്ച് മാറാന്‍ കൂട്ടാക്കാത്ത അധ്യാപകരും നമുക്കുചുറ്റും ഇപ്പോഴുമുണ്ട്.

കുട്ടികള്‍ക്കുമേലുളള നിയന്ത്രണങ്ങളെ കുറിച്ച് സംസാരിക്കുന്നതിനിടെ ഒരു അധ്യാപക സുഹൃത്ത് ഒരിക്കല്‍ പങ്കുവെച്ച കവിത പരാമര്‍ശിക്കട്ടെ..അത് ഏകദേശം ഇങ്ങനെയാണ്

'എന്റെ കുഞ്ഞിക്കൈകള്‍ കൊണ്ട്
വെളുത്ത കടലാസില്‍ ഞാന്‍ ഒരു വര വരച്ചു.
അച്ഛന്‍ മുകളിലും അമ്മ താഴെയും ഒരു വര വരച്ചു.
ഞാന്‍ വരച്ചത് ആകാശമായിരുന്നു.
അവര്‍ വരച്ചത് മതിലുകളും..' - ഈ വരികളിലുണ്ട് യാഥാര്‍ഥ്യം. കുട്ടിക്കാലത്ത് മനസ്സില്‍ പതിഞ്ഞുപോയത് മാറ്റുക പ്രായമായവര്‍ക്ക് എളുപ്പമല്ല. അതുകൊണ്ടുതന്നെ തനിക്കു പരിചിതമല്ലാത്ത എന്തിനോടും അവര്‍ മുഖം തിരിക്കും. സമഗ്രമായ ഒരു സമൂഹത്തെ വാര്‍ത്തെടുക്കാന്‍ പുതുതലമുറയിലൂടെ മാത്രമേ സാധിക്കൂ. 'സമൂഹം മാറേണ്ടത് സമഗ്രമായ ലൈംഗികവിദ്യാഭ്യാസത്തിലൂടെയാകണം. ഇപ്പോഴുളള തലമുറയ്ക്ക് ഉള്‍ക്കൊളളാന്‍ സാധിച്ചില്ലെങ്കിലും വീട്ടിലൊരാള്‍ മനസ്സു തുറക്കുമ്പോള്‍ ഇതാണ് സംഗതി എന്നു മനസ്സിലാക്കാനെങ്കിലും അതിലൂടെ സാധിക്കും. ഇടയ്‌ക്കൊരു സ്ത്രീയായി കഴിയാന്‍ ഇഷ്ടമുള്ള ഒരു ആണിനെ സഹായിച്ചില്ലെങ്കിലും മറ്റൊരാള്‍ക്ക് ഉപദ്രവമാവാത്തിടത്തോളം അവരെ അവരുടെ പാട്ടിന് വിടേണ്ടതുണ്ട്.' രാകേഷിന്റെ ഈ വാക്കുകള്‍ നാം ശ്രവിക്കേണ്ടത് അനുതാപത്തോടെയാണ്.

പുതുതലമുറയില്‍ പ്രതീക്ഷയറ്റിട്ടില്ല. ഉള്‍ച്ചേര്‍ക്കാന്‍ മനസ്സുളള ഒരു പുതുതലമുറയാണ് വളര്‍ന്നുവരുന്നത്. ബന്ധുവായ യുവതി പ്രസവിച്ച സന്തോഷവാര്‍ത്ത വിളിച്ചുപറഞ്ഞ വ്യക്തിയോട് ആണ്‍കുഞ്ഞാണോ പെണ്‍കുഞ്ഞാണോ എന്നുചോദിച്ചതിന് തന്നെ വഴക്കുപറഞ്ഞ പ്ലസ്ടുക്കാരി മകളെ കുറിച്ച് അഭിഭാഷകയായ അമ്മ അഭിമാനത്തോടെ പങ്കുവെച്ച അനുഭവം, ഗായിക പ്രാര്‍ത്ഥന ഇന്ദ്രജിത്ത് സാമൂഹിക മാധ്യമത്തില്‍ പങ്കുവെച്ച ചിത്രത്തിന് കീഴെ എനിക്കും പെണ്‍കുട്ടിയെ പോലെ അണിഞ്ഞൊരുങ്ങാനാഗ്രഹമുണ്ടെന്ന് കമന്റിട്ട യുവാവിന് അവര്‍ നല്‍കിയ അതിമനോഹരമായ മറുപടി. ഇതെല്ലാം പ്രതീക്ഷകളാണ്.....!

(അവസാനിച്ചു)