അമിതവിയര്‍പ്പും അസഹ്യമായ ഗന്ധവും..പൊതുവിടങ്ങളില്‍ നിന്നും മാറിനില്‍ക്കാന്‍ പലരുടേയും കാരണങ്ങളിലൊന്നാണ് ഈ വിയര്‍പ്പെന്ന പ്രശ്‌നം. എത്ര പെര്‍ഫ്യൂം പൂശിയാലും എത്ര നേരം കുളിച്ചാലും കുറയാതെ കൂടുന്ന ഈ പ്രശ്‌നത്തെ എങ്ങനെ മറികടക്കുമെന്ന് ഓര്‍ത്ത് വിഷമിച്ചിട്ടുണ്ടോ?
ശരീരം അമിതമായി ചൂടാകുന്നതിലൂടെ ഉണ്ടാവുന്ന അപകടങ്ങള്‍ ഒഴിവാക്കാനാണ് ചര്‍മത്തിലെ അപ്പോക്രിന്‍, എക്രിന്‍ എന്നീ വിയര്‍പ്പു ഗ്രന്ഥികള്‍ കൂടുതല്‍ വിയര്‍പ്പ് ഉത്പാദിപ്പിക്കുന്നത്. ഈ വിയര്‍പ്പ് ബാഷ്പീകരിക്കാനായി കൂടുതല്‍ താപം ഉപയോഗിക്കപ്പെടുമ്പോള്‍ ശരീരം തണുക്കുന്നു. അതുകൊണ്ട് വിയര്‍പ്പ് അപകടകാരിയല്ലെന്നാണ് ആദ്യം മനസ്സിലാക്കേണ്ടത്.
യഥാര്‍ത്ഥത്തില്‍ വിയര്‍പ്പിന് അസഹ്യമായ രീതിയില്‍ യാതൊരു വിധത്തിലുള്ള ഗന്ധവുമില്ല. എന്നാല്‍ വിയര്‍പ്പ് ചര്‍മ്മത്തിന്റെ ഉപരിതലത്തില്‍ വ്യാപിച്ച് അവിടെയുള്ള അണുക്കളുമായും അഴുക്കുമായും ചേര്‍ന്ന് പ്രവര്‍ത്തിക്കുന്നുണ്ട്. ഇങ്ങനെ വിയര്‍പ്പ് ചര്‍മത്തിലും വസ്ത്രത്തിലും തങ്ങിനിന്ന് ബാക്ടീരീയകളുമായൊക്കെ പ്രവര്‍ത്തിച്ച് ഹൈഡ്രജന്‍ സള്‍ഫൈഡ് പോലുള്ള വാതകങ്ങള്‍ ഉത്പാദിപ്പിക്കുമ്പോഴാണ് വിയര്‍പ്പ് ശല്യക്കാരനാവുന്നതും അസഹ്യമായ ദുര്‍ഗന്ധം ഉണ്ടാവുന്നതും.
വിയര്‍ക്കുന്നതിന്റെ കാരണങ്ങളറിയാം
- അമിതമായി ചൂടേല്‍ക്കുന്നത് അമിതമായി വിയര്‍ക്കുന്നതിന് കാരണമാവും. ഇത് വിയര്‍ക്കുന്നതിന്റെ സ്വാഭാവിക കാരണമാണ്. ഇതിനു പുറമേ പാരമ്പര്യമായും രോഗങ്ങള്‍ മൂലം അമിതമായി വിയര്‍ക്കുന്നവരുമുണ്ട്.
- ചില മരുന്നുകള്‍ കഴിക്കുമ്പോള്‍ വിയര്‍പ്പ് നാറ്റം കൂടാന്‍ സാധ്യതയുണ്ട്. ഇത്തരത്തില്‍ വിയര്‍പ്പ് നാറ്റം അസഹ്യമാവുന്നതിന് ഡോക്ടറുടെ നിര്‍ദ്ദേശ പ്രകാരമുള്ള ചികിത്സ തേടാം.
- ശരീരത്തില്‍ ഉപയോഗിക്കുന്ന പെര്‍ഫ്യൂം പോലുള്ള സുഗന്ധ ദ്രവ്യങ്ങള്‍ ശരീരവുമായി പ്രവര്‍ത്തിക്കുമ്പോഴും ശരീരഗന്ധം അസഹ്യമായേക്കാം.
- കഫീനടങ്ങിയ ആഹാരം വിയര്‍പ്പ് ഗ്രന്ഥികളെ ഉത്തേജിപ്പിക്കും.
ചില കാര്യങ്ങളില്‍ ശ്രദ്ധിക്കുകയാണെങ്കില്‍ വിയര്‍പ്പില്‍ നിന്നും കുറേയൊക്കെ രക്ഷപ്പെടാന്‍ സാധിക്കും.
- ശരീരത്തില്‍ വെള്ളം കുടൂതലുണ്ടെങ്കില്‍ ശരീര താപനില കുറയ്ക്കാന്‍ സഹായിക്കും. അതുവഴി വിയര്‍പ്പിന്റെ അളവും നിയന്ത്രിക്കാം. ദിവസവും ആറുമുതല്‍ എട്ടുഗ്ലാസ് വരെ വെള്ളം കുടിക്കുന്നത് ഒരു ശീലമാക്കുക.
- കടുത്ത മാനസിക സമ്മര്‍ദ്ദമാണ് അമിത വിയര്‍പ്പിന് മറ്റൊരു കാരണമാകുന്നത്. ടെന്‍ഷനും സമ്മര്‍ദ്ദവും വിയര്‍പ്പ് ഗ്രന്ഥികളെ ഉത്തേജിപ്പിക്കും. അത് നന്നായി വിയര്‍ക്കാനിടയാക്കും. അതിനാല്‍ മാനസികസമ്മര്‍ദ്ദം നിയന്ത്രിക്കുന്നതില്‍ ശ്രദ്ധിക്കുക.
- വിയര്‍പ്പ് നിയന്ത്രിക്കാന്‍ പ്രകൃതിദത്തമായ മാര്‍ഗമാണ് യോഗ. വിയര്‍പ്പ് ഗ്രന്ഥികളെ തളര്‍ത്തുന്നത് വഴി അമിതമായി വിയര്‍ക്കുന്നത് ഒഴിവാക്കുന്നു.
- ചില ഡിയോഡ്രന്റ്‌സുകള്‍ സ്‌കിന്നില്‍ ബാക്ടീരിയ വളരുന്നതിനിടയാക്കും. അതുകൊണ്ടുതന്നെ നിങ്ങളുടെ ശരീരത്തിന് യോജിക്കുന്നതരത്തിലുള്ള ഡിയോഡ്രന്റുകളും സോപ്പുകളും ഉപയോഗിക്കണം.
- ചൂടുവെള്ളത്തില്‍ കുളിക്കുമ്പോള്‍ ശരീരത്തിന്റെ ചൂടും കൂടാനിടയുണ്ട്. ഇത് ശരീരം വിയര്‍ക്കാന്‍ കാരണമാകും.
- മദ്യം, മയക്കുമരുന്ന്, സിഗരറ്റ് എന്നിവയുടെ ഉപയോഗം വിയര്‍പ്പ് നിയന്ത്രിക്കാനുള്ള ശരീരത്തിന്റെ കഴിവ് കുറയ്ക്കും.
- നൈലോണ്‍, പോളിസ്റ്റര്‍ എന്നിവയുപയോഗിച്ച് നിര്‍മ്മിച്ച വസ്ത്രങ്ങള്‍ ഒഴിവാക്കു, കോട്ടണ്‍ വസ്ത്രങ്ങള്‍ മാത്രം ധരിക്കുക. ഗുണമേന്മയുള്ള കോട്ടണ്‍ തുണികള്‍ ഉപയോഗിച്ച് നിര്‍മ്മിച്ച അടിവസ്ത്രങ്ങള്‍ ഉപയോഗിക്കുക. ഇത് ശരീരത്തിലെ വിയര്‍പ്പിനെ വലിച്ചെടുത്ത് ബാഷ്പീകരണം എളുപ്പത്തിലാക്കുന്നു.
- നേരിട്ട് വെയിലേല്‍ക്കുന്ന ഭാഗങ്ങളില്‍ സണ്‍സ്‌ക്രീന്‍ ലോഷനുകള്‍ ഉപയോഗിക്കുന്നത് ചര്‍മത്തിന് സംരക്ഷണം നല്‍കും. കലാമിന്‍, സിങ്ക് ഓക്‌സൈഡ് എന്നിവ നല്ലതാണ്. വെളിച്ചെണ്ണയും ഫലപ്രദമാണ്.
വിയര്‍പ്പ് നാറ്റം അസഹ്യമായാല്‍ ഈ വഴികള്‍ പരീക്ഷിച്ചു നോക്കൂ..
- മഞ്ഞള്‍ അരച്ച് ദേഹത്ത് പുരട്ടി കുളിക്കുക. ആഴ്ചയിലൊരു തവണയെങ്കിലും മഞ്ഞള്‍ തേച്ച് കുളി ശീലമാക്കിയാല്‍ അമിതമായ വിയര്‍പ്പ് ഗന്ധം ഫലപ്രദമായി നിയന്ത്രിക്കാം.
- ഉലുവാപ്പൊടി പുരട്ടി മേലുകഴുകുക
- ചന്ദനം അരച്ച് ശരീരത്തില്‍ പുരട്ടി കുളിക്കുന്നത് വിയര്‍പ്പ് മണം പോവാന്‍ ഏറെ ഫലപ്രദമാണ്. ഇത് ശരീരത്തിലെ വിയര്‍പ്പ് വലിച്ചെടുക്കുന്നതിനൊപ്പം ഫംഗസ് ബാധയ്ക്കുള്ള സാധ്യതയും കുറയ്ക്കും.
- ചന്ദനത്തില്‍ പനിനീര്‍ ചാലിച്ച് പേസ്റ്റ് രൂപത്തിലാക്കി ഇതില്‍ ചെറുനാരങ്ങാനീര് കൂടി ചേര്‍ത്ത് വിയര്‍ക്കുന്ന ഭാഗങ്ങളില്‍ തേക്കുക. ഉണങ്ങിയതിനു ശേഷം കഴുകിക്കളയുക. ഇത് അമിതമായി വിയര്‍ക്കുന്നതിനെ ഒരു പരിധിവരെ തടയും.
- ചെറുനാരങ്ങാ നീര് വെള്ളത്തില്‍ ചേര്‍ത്ത് കുളിക്കുന്നത് അമിതമായ വിയര്‍പ്പ് നാറ്റത്തിന് പ്രതിവിധിയാണ്. ശരീരഭാഗങ്ങളിലെ നിറവ്യത്യാസം തടയാനും ചെറുനാരങ്ങാനീരിന് സാധിക്കും. ചെറുനാരങ്ങാനീര് ശരീരഭാഗങ്ങളില്‍ പുരട്ടി ഉണങ്ങിയതിനു ശേഷം കഴുകിക്കളയാം. അസഹ്യമായ വിയര്‍പ്പ് ഗന്ധം നിയന്ത്രിക്കാന്‍ ഇത് ഫലപ്രദമാണ്.
- ചിറ്റമൃതിന്റെ നീര് വെറുംവെള്ളത്തില്‍ സേവിക്കുന്നതും വിയര്‍പ്പ് നാറ്റം കുറയ്ക്കാന്‍ സഹായിക്കും.
Content Highlight: Heavy Sweating and bad smell, Heavy Sweating Bad Smell, Causes of Heavy Sweating
