ന്യൂഡല്‍ഹി: കോവിഡ് വാക്‌സിന്‍ എടുക്കുന്നതുവഴി രോഗം ബാധിക്കില്ലെന്നത് തെറ്റിദ്ധാരണയാണെന്നും അതേസമയം, വാക്‌സിനെടുക്കുന്നത് രോഗതീവ്രതയും മരണസാധ്യതയും കുറയ്ക്കാന്‍ സഹായിക്കുമെന്നും വിദഗ്ധര്‍.

രാജ്യത്തെ വിവിധ സംസ്ഥാനങ്ങളില്‍ വാക്‌സിന്‍ സ്വീകരിച്ചശേഷവും രോഗബാധയേറ്റവരുടെ വാര്‍ത്തകള്‍ കഴിഞ്ഞ രണ്ടുമാസങ്ങളായി റിപ്പോര്‍ട്ടുചെയ്ത പശ്ചാത്തലത്തിലാണ് വിദഗ്ധരുടെ വിശദീകരണം.

'രണ്ടുഡോസും സ്വീകരിച്ചശേഷവും രോഗംബാധിച്ചവരുണ്ട്. എന്നാല്‍, അവരില്‍ രോഗലക്ഷണങ്ങള്‍ കുറവാണ്. വാക്‌സിന് അണുബാധയുടെ തീവ്രതയും മരണനിരക്കും കുറയ്ക്കാന്‍ സാധിക്കും' -അപ്പോളോ ആശുപത്രിയിലെ ശ്വാസകോശരോഗവിദഗ്ധനായ ഡോ. ബന്‍സാല്‍ പറഞ്ഞു. രണ്ടുഡോസും സ്വീകരിച്ചശേഷമാണ് ആന്റിബോഡികള്‍ സജീവമാകുന്നത്. അതിനാല്‍ ആദ്യത്തെ ഡോസിനുശേഷം ഒരാള്‍ക്ക് അണുബാധയുണ്ടാകാനുള്ള സാധ്യത കൂടുതലാണെന്നും ഡോക്ടര്‍മാര്‍ പറയുന്നു.

'വാക്‌സിന്‍ സമ്പൂര്‍ണ സുരക്ഷാകവചമല്ല. മുഖാവരണമാണ് ഇപ്പോള്‍ ഏറ്റവും മികച്ച വാക്‌സിന്‍. പ്രതിരോധ കുത്തിവെപ്പ് നടത്തിയശേഷം സുരക്ഷിതരാണെന്നു കരുതി മുഖാവരണം ധരിക്കാതിരിക്കുന്നത് തെറ്റാണ്'' -അദ്ദേഹം പറഞ്ഞു.

Content Highlights: The mask is the best solution; experts say the vaccine will reduce the severity and morbidity