ഹൈദരാബാദ്: കോവിഡിനെതിരേ കോവാക്സിൻ 77.8 ശതമാനം ഫലപ്രാപ്തി നൽകുന്നുമെന്ന് നിർമാതാക്കളായ ഭാരത് ബയോടെക് പറഞ്ഞു. ഇപ്പോൾ വ്യാപകമായ ഡെൽറ്റ വകഭേദത്തിനെതിരേ കോവാക്സിൻ 65.2 ശതമാനം സംരക്ഷണം നൽകും. ഗുരുതരലക്ഷണങ്ങളുള്ള കോവിഡിനെതിരേ 93.4 ശതമാനവും.

കോവാക്സിന്റെ മൂന്നാംഘട്ട ക്ലിനിക്കൽ പരീക്ഷണങ്ങളുടെ അടിസ്ഥാനത്തിലാണ് ഈ അവകാശവാദം. പരീക്ഷണഫലം സമാനമേഖലയിലെ മറ്റു ഗവേഷകർ വിലയിരുത്താനുണ്ട്.

രാജ്യത്തെ 25 ആശുപത്രികളിലായി 25,800 പേരിൽ നവംബർ 16-നും ജനുവരി ഏഴിനുമിടയിലായിരുന്നു മൂന്നാം ഘട്ട പരീക്ഷണം. വാക്സിനെടുത്ത 12 പേരിലേ ചെറിയതോതിലെങ്കിലുമുള്ള പാർശ്വഫലമുണ്ടായുള്ളൂ. 0.5 ശതമാനത്തിലും താഴെപ്പേർക്ക് ഗുരുതരമായ പാർശ്വഫലങ്ങളുണ്ടായുള്ളൂവെന്ന് കമ്പനി അറിയിച്ചു.

കോവാക്സിൻ വിജയകരമായി വികസിപ്പിച്ചെടുത്തത് അന്താരാഷ്ട്രതലത്തിൽ ഇന്ത്യയുടെ യശസ്സുയർത്തുമെന്ന് ഇന്ത്യൻ മെഡിക്കൽ ഗവേഷണ കൗൺസിൽ (ഐ.സി.എം.ആർ.) സെക്രട്ടറി ഡോ. ബൽറാം ഭാർഗവ പറഞ്ഞു. ഐ.സി.എം.ആറും പുണെയിലെ നാഷണൽ ഇൻസ്റ്റിറ്റ്യൂട്ട് ഓഫ് വൈറോളജിയുമായി സഹകരിച്ചാണ് ഭാരത് ബയോടെക് കോവാക്സിൻ വികസിപ്പിച്ചത്.

Content Highlights: Indias covaxin 77 8 percent effective against covid 19 says manufacturer, Health