തിരുവനന്തപുരം: കഴിഞ്ഞമാസം കോവിഡ് കാരണം സംസ്ഥാനത്ത് മരിച്ചവരില്‍ മൂന്നുപേരൊഴികെ മറ്റെല്ലാവര്‍ക്കും ഗുരുതര രോഗങ്ങളുണ്ടായിരുന്നെന്നു കണ്ടെത്തി. പ്രമേഹവും ഉയര്‍ന്ന രക്തസമ്മര്‍ദവുമാണ് ഭൂരിഭാഗം പേരുടെയും മരണത്തിനു കാരണമായതെന്ന് കോവിഡ് മരണങ്ങള്‍ സംബന്ധിച്ച് ആരോഗ്യവകുപ്പ് നടത്തിയ പഠനത്തില്‍ വ്യക്തമായി.
ജൂലായിലുണ്ടായ 51 മരണങ്ങളാണ് പ്രത്യേകം പഠനവിധേയമാക്കിയത്. ജൂലായില്‍ 63 പേര്‍ മരിച്ചെങ്കിലും കാരണം പൂര്‍ണമായും കോവിഡെന്ന് ലാബില്‍ സ്ഥിരീകരിച്ചത് 51 പേരുടേതുമാത്രം. ഏഴു മരണങ്ങള്‍ നിലവിലുള്ള മാനദണ്ഡങ്ങളനുസരിച്ച് കോവിഡല്ലെന്ന് വിലയിരുത്തി. നാലു മരണങ്ങളുടെ പോസ്റ്റ്മോര്‍ട്ടം റിപ്പോര്‍ട്ട് ലഭിക്കാന്‍ വൈകിയതും ഒരെണ്ണം മലയാളിയല്ലാത്തതിനാലുമാണ് പഠനത്തില്‍ ഉള്‍പ്പെടുത്താതിരുന്നത്.
കഴിഞ്ഞദിവസം വരെ ഏറ്റവും കൂടുതല്‍ പേര്‍ക്ക് രോഗം ബാധിച്ചതും (14,077) ഏറ്റവും കൂടുതല്‍ പേര്‍ (81) മരിച്ചതും തിരുവനന്തപുരം ജില്ലയിലാണ്. ജൂലായില്‍ മരിച്ച 44 പേര്‍ക്കും വിദേശ, മറ്റു സംസ്ഥാന സന്ദര്‍ശന ചരിത്രമില്ല. പൂര്‍ണമായും സമ്പര്‍ക്കത്തിലൂടെയാണ് രോഗം പിടിപെട്ടതെന്നാണു കരുതുന്നത്. ഏഴുപേര്‍ക്കു മാത്രമാണ് യാത്രാചരിത്രമുണ്ടായിരുന്നത്. സംസ്ഥാനത്ത് ഇതുവരെയുണ്ടായ മരണങ്ങളില്‍ 40.47 ശതമാനവും സമ്പര്‍ക്കത്തിലൂടെ രോഗം പിടിപെട്ടവരാണ്.
Content Highlights: Covid 19 Diabetes and high blood pressure are the main issues, Health
