കോവിഡ്കാലത്ത് നേത്രദാനത്തിനു നേരേ കണ്ണടയ്‌ക്കരുതേ; മാനദണ്ഡങ്ങൾ ശ്രദ്ധിക്കാം, eye donation during corona period, eye donation quotes, eye donation slogans

12 August 2020, 03:35 PM IST

നേത്രദാനവും ഐ ബാങ്ക് പ്രവർത്തനങ്ങളും നിർത്തിവെക്കണമെന്ന് കോവിഡ് ആരംഭിച്ച സമയത്ത് ഐ ബാങ്ക് അസോസിയേഷൻ ഓഫ് ഇന്ത്യ നിർദേശിച്ചിരുന്നു

കൊച്ചി: കോവിഡ്കാലത്ത് നേത്രദാനത്തിനും നേത്രരോഗ ചികിത്സയ്ക്കും നേരേ ആരോഗ്യമേഖല കണ്ണടയ്ക്കുന്നു. നേത്രദാതാക്കൾ എത്താത്തതും കോവിഡ് ഭീതിയും പ്രോട്ടോക്കോൾ നിർദേശങ്ങളുമാണ് നേത്രദാനം നടക്കാതിരിക്കാൻ കാരണം.

നേത്രദാനവും ഐ ബാങ്ക് പ്രവർത്തനങ്ങളും നിർത്തിവെക്കണമെന്ന് കോവിഡ് ആരംഭിച്ച സമയത്ത് ഐ ബാങ്ക് അസോസിയേഷൻ ഓഫ് ഇന്ത്യ നിർദേശിച്ചിരുന്നു. മേയ് പകുതിയോടെ പ്രവർത്തനങ്ങൾ പുനരാരംഭിച്ചു. എന്നാൽ, കോവിഡ് പ്രോട്ടോക്കോളുകൾ മൂലം നേത്രദാനം സുഗമമായില്ല.

ആശുപത്രികളിൽ കോവിഡേതര മരണങ്ങൾ കുറയുന്നതും കാരണമായി. മുമ്പ് മാസം 15 ശസ്ത്രക്രിയകൾ നടന്നിടത്ത്, ഇപ്പോൾ മൂന്നെണ്ണം മാത്രമാണ് നടക്കുന്നതെന്ന് കൊച്ചി ഗിരിധർ ഐ ഹോസ്പിറ്റൽ മെഡിക്കൽ സൂപ്രണ്ട് ഡോ. എസ്.ജെ. സാസ്‌കുമാർ പറഞ്ഞു.

കഴിഞ്ഞവർഷം ജനുവരി മുതൽ ഓഗസ്റ്റ് വരെ 58 കോർണിയയാണ് ഗിരിധർ ആശുപത്രിയിൽ ദാനം ചെയ്തത്.

നേത്രദാനത്തിനുള്ള കോവിഡ് മാനദണ്ഡങ്ങൾ

കോവിഡ് പരിശോധന നിർബന്ധം
മരണവീടുകളിൽ ചെന്ന് കോർണിയ ശേഖരിക്കരുത്
ക്വാറന്റീൻ മേഖലയിലുള്ളവരെ തിരഞ്ഞെടുക്കരുത്
അടുത്തകാലത്ത് കോവിഡ് ലക്ഷണങ്ങൾ ഉണ്ടായവർ പാടില്ല
ദാതാവിന്റെ കുടുംബാംഗങ്ങൾക്ക് യാത്രാചരിത്രം ഉണ്ടാകരുത്
കോവിഡ് ആശുപത്രിയിലെ കോവിഡ് ഇതര മരണങ്ങൾ ആണെങ്കിൽക്കൂടി ഉപയോഗിക്കരുത്.

കോവിഡ് ഫലം എത്താൻ വൈകിയാൽ

നേത്രദാനം ചെയ്യുന്നയാളുടെ കോവിഡ് പരിശോധനാ ഫലം വൈകിയാൽ, കോർണിയ ശേഖരിച്ച് 14 ദിവസം വരെ പ്രത്യേക സംവിധാനത്തിൽ സൂക്ഷിക്കും. 48 മണിക്കൂർ കഴിഞ്ഞാൽ വൈറസിന് അതിജീവിക്കാനാകില്ല. 48 മണിക്കൂറിനുശേഷം ഇവ അണുവിമുക്തമാക്കി ഉപയോഗിക്കാനാകും.

Content Highlights: Corneal donation in times of the COVID 19

ഇത് പരസ്യ ഫീച്ചറാണ്. മാതൃഭൂമി.കോം ഈ പരസ്യത്തിലെ അവകാശവാദങ്ങളെ ഏറ്റെടുക്കുന്നില്ല. പരസ്യത്തിൽ ഉന്നയിക്കുന്ന അവകാശവാദങ്ങൾക്ക് ഉപോദ്ബലകമായ വസ്തുതകൾ പരസ്യദാതാക്കളുമായി ബന്ധപ്പെട്ട് പരിശോധിച്ചു ബോധ്യപ്പെട്ട ശേഷം മാത്രം ഇടപാടുകൾ നടത്തുക. പരാതികൾ ഉണ്ടെങ്കിൽ ഇവിടെ രേഖപ്പെടുത്താവുന്നതാണ്. (feedback@mpp.co.in)