ശരണ്യാ ഭുവനേന്ദ്രൻ

28 February 2023, 04:57 PM IST

1 min read

Read later

Representative Image| Photo: Canva.com

ന്യൂഡൽഹി: രാജ്യത്ത് 2047 -ഓടെ അരിവാൾ രോഗം തുടച്ചുനീക്കാൻ ലക്ഷ്യമിട്ട് രോഗനിർമാർജന യജ്ഞം നടപ്പാക്കാൻ സംസ്ഥാനങ്ങളോട് കേന്ദ്രം. പരിശോധനയുടെ അപര്യാപ്തതയും അവബോധക്കുറവുമാണ് രോഗവ്യാപനത്തിനുള്ള പ്രധാന കാരണങ്ങൾ. രോഗം മുൻകൂട്ടി അറിയുന്നതിനുള്ള പരിശോധന വ്യാപിപ്പിക്കണമെന്നും കൃത്യമായ ചികിത്സാ സംവിധാനങ്ങൾ ഒരുക്കണമെന്നും സംസ്ഥാനങ്ങൾക്ക് കേന്ദ്ര ആരോഗ്യ സെക്രട്ടറി രാജേഷ് ഭൂഷൺ നിർദേശം നൽകി.

പരിശോധന ഏഴുകോടിപ്പേരിൽ

പൊതുബജറ്റിലെ നിർദേശപ്രകാരം ആദിവാസി മേഖലകളിലെ അരിവാൾ രോഗബാധിത പ്രദേശങ്ങളിൽ 40 വയസ്സുവരെയുള്ള ഏഴുകോടിപ്പേരെ പരിശോധിക്കും. പ്രാഥമിക രക്തപരിശോധനയായ സോലിബിലിറ്റി ടെസ്റ്റ്, പൂർണ സ്ഥിരീകരണത്തിനുള്ള ഇലക്‌ട്രോ ഫോസസ് എന്നിവ നടത്തും.

ആരോഗ്യവകുപ്പിന്റെ ആഭിമുഖ്യത്തിലാണ് പരിശോധനാ ക്യാമ്പുകൾ സംഘടിപ്പിക്കേണ്ടത്. രോഗസാധ്യതയുള്ള ഗർഭിണികളെ നിർബന്ധമായും പരിശോധനയ്ക്ക് വിധേയമാക്കണം. പ്രധാനമന്ത്രി ജൻ ആരോഗ്യയോജന വഴി രോഗത്തിനു സൗജന്യചികിത്സ ലഭ്യമാക്കുന്നുണ്ടെന്ന വിവരം ജനങ്ങളിലെത്തിക്കണം.

പ്രതിരോധമരുന്നുകളായ ഹൈഡ്രോക്സി യൂറിയ, ന്യൂമോകോക്കൽ എന്നിവയുടെ ലഭ്യത ആരോഗ്യവകുപ്പ് ഉറപ്പാക്കണം.

പോർട്ടൽ പ്രവർത്തനക്ഷമം

രോഗനിർമാർജന നടപടികളുടെ ഏകോപനത്തിനുള്ള പോർട്ടൽ പ്രവർത്തനക്ഷമമാണെന്നും ഗോത്രജനങ്ങളുമായുള്ള ആശയവിനിമയം, ബോധവത്‌കരണം, മെഡിക്കൽ ഇതര പരിചരണം എന്നിവയ്ക്ക് ആദിവാസിക്ഷേമ മന്ത്രാലയം നേതൃത്വം നൽകുമെന്നും ആരോഗ്യമന്ത്രാലയവൃത്തങ്ങൾ അറിയിച്ചു. കേരളത്തിൽ വയനാട്ടിലും (1,057 പേർ) പാലക്കാട് അട്ടപ്പാടിയിലുമാണ് (128) രോഗബാധിതരിലേറെയും.

ഇവരിൽ 90 ശതമാനവും ഗോത്രവിഭാഗക്കാരാണ്. ഇന്ത്യയിൽ ഗോത്രവർഗക്കാരിലെ 86 പേരിൽ ഒരാൾക്ക് എന്ന നിലയിൽ രോഗം ബാധിക്കുന്നുണ്ടെന്നാണ് ആരോഗ്യമന്ത്രാലയത്തിന്റെ കണക്ക്.