23 June 2020, 01:45 PM IST

1 min read

Read later

ഗര്‍ഭിണികളിലും മറ്റുള്ളവരിലും പൊതുവേ ഉണ്ടാകാറുള്ള സംശയമാണിത്. അതിനാല്‍ തന്നെ ആദ്യമൂന്നു മാസങ്ങളില്‍ യാത്ര ചെയ്യരുതെന്ന് പലപ്പോഴും പറയാറുണ്ട്.

എന്നാല്‍ 85 ശതമാനം പേര്‍ക്കും സാധാരണയുള്ള ഗര്‍ഭപരിചരണത്തിന്റെ ആവശ്യമേയുള്ളൂ. 15 ശതമാനം പേര്‍ക്ക് മാത്രമാണ് ഏതെങ്കിലും രീതിയിലുള്ള സങ്കീര്‍ണതകള്‍ ഉണ്ടാകുന്നത്. യാത്ര ചെയ്യുന്നത് കൊണ്ട് മാത്രം ആദ്യ മൂന്നുമാസങ്ങളില്‍ ഗര്‍ഭം അലസിപ്പോകും എന്ന ഭയത്തിന് ശാസ്ത്രീയ അടിസ്ഥാനമില്ല.

എന്നാല്‍ ആദ്യത്തെ മൂന്നുമാസം ഗര്‍ഭസ്ഥശിശുവിന്റെ അവയവങ്ങള്‍ രൂപപ്പെടുന്ന സമയമാണ്. ഈ സമയത്ത് വൈറസ് മൂലമുണ്ടാകുന്ന പനികള്‍ വരാതെ സൂക്ഷിക്കണം. കാരണം ചില വൈറസ് ബാധ ഗര്‍ഭസ്ഥശിശുവിന് അംഗവൈകല്യങ്ങള്‍ ഉണ്ടാക്കുന്നവയാണ്.

ആളുകൂടുന്ന സ്ഥലങ്ങളില്‍ പോകുമ്പോള്‍ മറ്റുള്ളവരുമായുള്ള സമ്പര്‍ക്കം കൂടും. അണുബാധയുണ്ടാകാനും സാംക്രമിക രോഗങ്ങള്‍ പിടിപെടാനുമുള്ള സാധ്യതയും കൂടും. മരുന്ന് കഴിക്കേണ്ടി വരും. ഈ മരുന്നുകള്‍ ചിലപ്പോള്‍ കുഞ്ഞിന് ദോഷമായി ഭവിച്ചേക്കാം. ഈ കാരണങ്ങള്‍ കൊണ്ട് ആദ്യത്തെ മൂന്നുമാസം യാത്രകള്‍ ഒഴിവാക്കുന്നത് നന്നായിരിക്കും. യാത്ര അത്യന്താപേക്ഷിതമാണെങ്കില്‍ കുടിവെള്ളം, ആഹാരം എന്നിവയില്‍ അതീവശ്രദ്ധ വേണം.

വിവരങ്ങള്‍ക്ക് കടപ്പാട്:
ഡോ. പി. ലക്ഷമി അമ്മാള്‍
കണ്‍സള്‍ട്ടന്റ് ഗൈനക്കോളജിസ്റ്റ്
എസ്.യു.ടി. ഹോസ്പിറ്റല്‍, പട്ടം, തിരുവനന്തപുരം

Content Highlights: Is it safe to travel during first three months of pregnancy any chance to get abortion, Health, Pregnancy care, Women health