.jpg?$p=f582c66&f=1x1&w=65&q=0.8)
.jpg?$p=8384990&f=16x10&w=856&q=0.8)
മെമ്മറി എങ്ങനെ മെച്ചപ്പെടുത്താം?
വിവരങ്ങള്‍ നേടുന്നതിനും സംഭരിക്കുന്നതിനും നിലനിര്‍ത്തുന്നതിനും പിന്നീട് വീണ്ടെടുക്കുന്നതിനും ഉപയോഗിക്കുന്ന പ്രക്രിയകളെ മെമ്മറി എന്ന പദം കൊണ്ട് അര്‍ത്ഥമാക്കുന്നു. മെമ്മറിയില്‍ മൂന്ന് പ്രധാന പ്രക്രിയകള്‍ ഉള്‍പ്പെടുന്നു: എന്‍കോഡിംഗ്, സംഭരണം, വീണ്ടെടുക്കല്‍. നമ്മള്‍ പഠിച്ച അല്ലെങ്കില്‍ അനുഭവിച്ച വിവരങ്ങള്‍ സംരക്ഷിക്കുന്നതിനും വീണ്ടെടുക്കുന്നതിനുമുള്ള കഴിവ് ഹ്യൂമന്‍ മെമ്മറിയില്‍ അടങ്ങിയിരിക്കുന്നു.
നമ്മള്‍ ആരാണെന്ന് ഓര്‍ത്തെടുക്കാന്‍ മെമ്മറി സഹായിക്കുന്നു. ബാല്യകാല സംഭവങ്ങളെ സ്‌നേഹപൂര്‍വ്വം ഓര്‍മ്മിക്കുന്നത് മുതല്‍ നമ്മള്‍ എവിടെയാണ് താക്കോല്‍ ഉപേക്ഷിച്ചതെന്ന് ഓര്‍മ്മിക്കുന്നത് വരെ, നമ്മുടെ ജീവിതത്തിന്റെ എല്ലാ മേഖലകളിലും മെമ്മറി ഒരു പ്രധാന പങ്ക് വഹിക്കുന്നു. ഇത് നമുക്ക് ഒരു ആത്മബോധം പ്രദാനം ചെയ്യുകയും ജീവിതത്തിന്റെ തുടര്‍ച്ചയായ അനുഭവം ഉണ്ടാക്കുകയും ചെയ്യുന്നു.
മാറി വരുന്ന സാഹചര്യങ്ങളോട് പൊരുത്തപ്പെടാനും അതനുസരിച്ചു മാറാനുമുള്ള അതിശയകരമായ കഴിവ് മനുഷ്യ മസ്തിഷ്‌കത്തിനുണ്ട് - വാര്‍ധ്യക്യത്തില്‍ പോലും. ഈ കഴിവിനെ ന്യൂറോപ്ലാസ്റ്റിസിറ്റി എന്ന് വിളിക്കുന്നു. ശരിയായ ഉത്തേജനം ഉപയോഗിച്ച്, നമ്മുടെ തലച്ചോറിന് പുതിയ ന്യൂറല്‍ പാതകള്‍ രൂപീകരിക്കാനും നിലവിലുള്ള കണക്ഷനുകളില്‍ മാറ്റം വരുത്താനും മാറിക്കൊണ്ടിരിക്കുന്ന രീതിയില്‍ പ്രതികരിക്കാനും കഴിയും. നമ്മുടെ ബുദ്ധിപരമായ കഴിവുകള്‍ വര്‍ധിപ്പിക്കുമ്പോള്‍, സ്വയം രൂപകല്‍പ്പന ചെയ്യാനുള്ള തലച്ചോറിന്റെ അവിശ്വസനീയമായ കഴിവ് അപാരമാണ്. ഇത് പുതിയ വിവരങ്ങള്‍ പഠിക്കാനുള്ള നമ്മുടെ കഴിവ് വര്‍ദ്ധിപ്പിക്കുകയും ഏത് പ്രായത്തിലും നമ്മുടെ മെമ്മറി മെച്ചപ്പെടുത്തുകയും ചെയ്യുന്നു.
നമ്മുടെ മെമ്മറി എപ്രകാരം വര്‍ധിപ്പിക്കാം? അതിനുള്ള മാര്‍ഗങ്ങള്‍ എന്തൊക്കെയാണ്?
1. മസ്തിഷ്‌ക വ്യായാമമുറകള്‍
പ്രായപൂര്‍ത്തിയാകുമ്പോള്‍, വിവരങ്ങള്‍ വേഗത്തില്‍ പ്രോസസ്സ് ചെയ്യുന്നതിനും ഓര്‍മ്മപ്പെടുത്തുന്നതിനും പരിചിതമായ പ്രശ്‌നങ്ങള്‍ പരിഹരിക്കുന്നതിനും കുറഞ്ഞ മാനസിക പരിശ്രമം ഉപയോഗിച്ച് പതിവ് ജോലികള്‍ നടപ്പിലാക്കുന്നതിനും സഹായിക്കുന്ന ദശലക്ഷക്കണക്കിന് ന്യൂറല്‍ പാതകള്‍ നമ്മുടെ മസ്തിഷ്‌കം ഇതിനകം തന്നെ വികസിപ്പിച്ചെടുത്തിട്ടുണ്ട്. എന്നാല്‍ നമ്മള്‍ എല്ലായ്‌പ്പോഴും നന്നായി ഉപയോഗിച്ച ഈ ഒരേ പാതകളില്‍ ഉറച്ചുനില്‍ക്കുകയാണെങ്കില്‍, തുടര്‍ന്ന് വളര്‍ന്നു വികസിക്കാന്‍ ആവശ്യമായ ഉത്തേജനം നമ്മുടെ തലച്ചോറിന് ലഭിക്കുന്നില്ല. നമ്മുടെ മസ്തിഷ്‌കം എത്രത്തോളം പ്രവര്‍ത്തിക്കുന്നുവോ അത്രത്തോളം, മസ്തിഷ്‌കം പുതിയ വഴികള്‍ വികസിപ്പിക്കുന്നതിനനുസരിച്ച് വിവരങ്ങള്‍ പ്രോസസ്സ് ചെയ്യാനും ഓര്‍മ്മിക്കാനും കഴിയും.
ഒരു നല്ല മസ്തിഷ്‌ക വ്യായാമത്തിന്റെ പ്രധാന ഘടകങ്ങള്‍
- ഇവ നമ്മളെ പുതിയ കാര്യങ്ങള്‍ പഠിപ്പിക്കുന്നു
- പുതിയ വെല്ലുവിളികളെ നേരിടാന്‍ സഹായിക്കുന്നു
- നമ്മുടെ കഴിവുകളെ വിപുലീകരിക്കുവാന്‍ സഹായിക്കുകയും ചെയ്യുന്നതോടൊപ്പം പ്രതിഫലദായകവും ആയി വര്‍ത്തിക്കുന്നു.
ശരിയായ അളവില്‍ പ്രോട്ടീന്, കാര്‍ബോഹൈഡ്രേറ്റ്, ശുദ്ധമായ ഫ്രൂട്ട്‌സ്, പച്ചക്കറികള്‍ എന്നിവയുള്ള സമീകൃത പ്രഭാതഭക്ഷണം മെച്ചപ്പെട്ട മെമ്മറി, സര്‍ഗ്ഗാത്മകത, ഫോക്കസ്, മൊത്തത്തിലുള്ള പ്രകടനം എന്നിവ കാഴ്ചവെക്കുന്നു. രക്തത്തിലെ പഞ്ചസാരയുടെ അളവ് സ്ഥിരമായി നിലനിര്‍ത്തുന്നതിനും തലച്ചോറിന് തുല്യമായി ഇന്ധനം നല്‍കുന്നതുമായ ആരോഗ്യകരമായ ലഘുഭക്ഷണങ്ങള്‍ ദിവസം മൂന്നു നേരമായി കഴിക്കുന്നതും ഗുണം ചെയ്യുന്നു. രാത്രി വൈകി ആഹാരം കഴിക്കുന്നത് നമ്മുടെ ഉറക്കത്തെ തടസ്സപ്പെടുത്തുന്നു. അതിനാല്‍ ഉറങ്ങുന്നതിന് കുറഞ്ഞത് മൂന്ന് മണിക്കൂര്‍ മുന്‍പെങ്കിലും ആഹാരം കഴിക്കുക, ഇത് ഉറക്കത്തിന് മുമ്പ് ഭക്ഷണം ദഹിപ്പിക്കാന്‍ സഹായിക്കുന്നു. ആരോഗ്യമുള്ള തലച്ചോറിന് ആവശ്യമായ ദ്രാവകങ്ങള്‍ ആവശ്യമാണ്, അതിനാല്‍ ഒരു ദിവസം 6-10 ഗ്ലാസ് വെള്ളം കുടിക്കണം.
ഗ്ലൂക്കോസ് എന്ന മസ്തിഷ്‌ക ഇന്ധനം
ബുദ്ധിപരമായ പ്രകടനവും മന:പാഠമാക്കാനുള്ള ശേഷിയും രക്തത്തിലെ ഗ്ലൂക്കോസിന്റെ നിലയെ ആശ്രയിച്ചിരിക്കുന്നു. ഗ്ലൂക്കോസ് എന്നത് മസ്തിഷ്‌ക ഇന്ധനം എന്നരീതിയിലും കണക്കാക്കപ്പെടുന്നു. കോംപ്ലക്‌സ് ഷുഗേഴ്സ്, അതായത് ബ്രൗണ്‍ റൈസ്, ബ്രെഡ്, പാസ്ത പയറുവര്‍ഗ്ഗങ്ങള്‍ എന്നിവയില്‍ അടങ്ങിയിരിക്കുന്നവയ്ക്ക് കുറഞ്ഞ ഗ്ലൈസെമിക് സൂചികയാണ് ഉള്ളത്. ഇവ രക്തത്തിലെ ഗ്ലൂക്കോസ് നിയന്ത്രിക്കാന്‍ അനുവദിക്കുകയും ഹൈപ്പര്‍ ഗ്ലൈസീമിയ സൃഷ്ടിക്കാതെ തലച്ചോറിന് ആവശ്യാനുസരണം ഗ്ലൂക്കോസ് വിതരണം ചെയ്യുകയും ചെയ്യുന്നു.
.jpg?$p=8630a06&&q=0.8)
വേണം ആന്റി ഓക്‌സിഡന്റുകള്‍
ആന്റി ഓക്‌സിഡന്റ് അധികമായി അടങ്ങിയിരിക്കുന്ന ഭക്ഷണങ്ങളില്‍ ഒന്നാണ് ബ്ലൂബെറി. ഇത് ഏകാഗ്രതയും മെമ്മറിയും വര്‍ധിപ്പിക്കാനും ആരോഗ്യകരമായ വൈജ്ഞാനിക പ്രവര്‍ത്തനം നിലനിര്‍ത്താനും തലച്ചോറിന്റെ പ്രായമാകല്‍ പ്രക്രിയ കുറയ്ക്കാനും സഹായിക്കുന്നു. ചെറി, റാസ്‌ബെറി, നെല്ലിക്ക, മള്‍ബറി എന്നിവ സമാനമായ ആരോഗ്യഗുണങ്ങള്‍ നല്‍കുന്നു. എല്ലാ ഭക്ഷ്യയോഗ്യമായ സരസഫലങ്ങളും വിറ്റാമിന്‍ സി യുടെ സമ്പന്നമായ ഉറവിടമാണ്. ഇവ ഒരുമിച്ച് രക്ത കാപ്പിലറികളെ ശക്തിപ്പെടുത്തുകയും രക്തചംക്രമണം മെച്ചപ്പെടുത്തുകയും ചെയ്യുന്നു. ഇത് തലച്ചോറിനെ മികച്ച ഓക്‌സിജനേഷനായി പ്രാപ്തമാക്കുന്നു. അതോടൊപ്പം തന്നെ നാഡീകോശങ്ങളെ, പ്രത്യേകിച്ച് മസ്തിഷ്‌ക കോശങ്ങളെ ബാധിക്കുന്ന ഫ്രീ റാഡിക്കലുകള്‍ക്കെതിരെ പോരാടാന്‍ സഹായിക്കുകയും ചെയ്യുന്നു. വിറ്റാമിന്‍ ഇ ഏറ്റവും ശക്തമായ ആന്റിഓക്സിഡന്റാണ്. ഇത് തലച്ചോറിന്റെ ഫാറ്റി ടിഷ്യുകളെ വാര്‍ധക്യത്തില്‍ നിന്ന് സംരക്ഷിക്കുകയും അല്ഷിമേഴ്സ് രോഗം വരുന്നതിനു കാലതാമസം വരുത്തുകയും ചെയ്യുന്നു. ബദാം, അവോക്കാഡോ എന്നിവയിലെ വിറ്റാമിന്‍ ഇ, മഗ്‌നീഷ്യം എന്നിവ നമ്മുടെ തലച്ചോറിനെ മികച്ച പ്രവര്‍ത്തന ശേഷിയില്‍ നിലനിര്‍ത്താന്‍ സഹായിക്കുന്നു.
അത്യാവശ്യമാണ് ഈ ഘടകങ്ങള്‍
നമ്മുടെ തലച്ചോറിലെ കോശങ്ങളായ ഓറെക്‌സിന്‍ (Orexin) ന്യൂറോണുകളെ ഉത്തേജിപ്പിക്കാന്‍ പ്രോട്ടീന് കഴിയും. മുട്ടകളില്‍ അമിനോ ആസിഡുകള്‍ അധികമായി അടങ്ങിയിട്ടുണ്ട്. പ്രധാന ന്യൂറോ ട്രാന്‍സ്മിറ്ററുകളുടെ ഉല്‍പാദനത്തില്‍ ഇവ പ്രധാന പങ്കുവഹിക്കുന്നു. മുട്ടകളില്‍ ഫോസ്‌ഫോലിപിഡുകളും ലെസിതിനും അടങ്ങിയിരിക്കുന്നു. ഇത് മസ്തിഷ്‌ക കോശത്തിന്റെ മെംബ്രേയ്നെ നിര്‍മ്മിക്കുന്നതിനുള്ള അവിഭാജ്യ ഘടകമാണ്. സാല്‍മണ്‍ പോലുള്ള മത്സ്യങ്ങളില്‍ ഉയര്‍ന്ന അളവില്‍ അവശ്യ ഫാറ്റി ആസിഡുകള്‍ (Essential fatty acids) അടങ്ങിയിട്ടുണ്ട്. ഇത് മെമ്മറി നിലനിര്‍ത്താനും ഡിമെന്‍ഷ്യ പോലുള്ള രോഗങ്ങളില്‍ നിന്നും സംരക്ഷിക്കാനും സഹായിക്കുന്നു.
തലച്ചോറിന്റെ വൈജ്ഞാനിക പ്രവര്‍ത്തനത്തിനുള്ള പ്രധാന ധാതുക്കളില്‍ പെടുന്നവയാണ് അയണും സിങ്കും. കൊഴുപ്പ് കുറഞ്ഞ മാംസം, മുട്ടയുടെ മഞ്ഞ, പയര്‍വര്‍ഗ്ഗങ്ങള്‍, ബ്രൊക്കോളി, മുഴു ധാന്യങ്ങള്‍ എന്നിവ ഇവയുടെ സമ്പന്നമായ ഉറവിടങ്ങളാണ്. അയണിന്റെ കുറവ് മൂലം കുറഞ്ഞ ഏകാഗ്രത, ഊര്‍ജ്ജത്തിന്റെ അഭാവം, ക്ഷീണം എന്നിവ തുടങ്ങി തലച്ചോറിലേക്ക് ഓക്‌സിജന്‍ എത്തിക്കാനുള്ള രക്തത്തിന്റെ കഴിവ് കുറയ്ക്കുകയയും ചെയ്യുന്നു.
ബി വിറ്റാമിനുകളും മഗ്‌നീഷ്യവും അടങ്ങിയ ഭക്ഷണങ്ങളായ വാഴപ്പഴം, ചിക്കന്‍, ഉരുളക്കിഴങ്ങ് എന്നിവ നമ്മുടെ മെമ്മറി മെച്ചപ്പെടുത്താനും തലച്ചോറിനെ ആരോഗ്യകരമായി നിലനിര്‍ത്താനും സഹായിക്കും. നാഡീ പ്രേരണകള്‍ പകരുന്നതില്‍ അവശ്യ ധാതുവാണ് മഗ്‌നീഷ്യം. വിറ്റാമിന്‍ ബി 6, മഗ്‌നീഷ്യം എന്നിവ ചില ന്യൂറോ ട്രാന്‍സ്മിറ്ററുകളുടെ സമന്വയത്തിന് സഹായിക്കുന്നു, പ്രത്യേകിച്ച് ഗാമ അമിനോ ബ്യൂട്ടിറിക് ആസിഡ്, സെറോടോണിന്‍ എന്നിവ വിവേകപൂര്‍ണ്ണവും ശാന്തവുമായ പെരുമാറ്റത്തിനും ശരിയായ മാനസികാവസ്ഥ സൃഷ്ടിക്കാനും സഹായിക്കുന്നു.
ചീര, ബ്രൊക്കോളി എന്നിവയില്‍ വിറ്റാമിന്‍ ബി 9 (ഫോളേറ്റുകള്‍) അടങ്ങിയിട്ടുണ്ട്. ഇത് ഗര്‍ഭസ്ഥശിശുവിന്റെ നാഡീവ്യൂഹത്തിന്റെ വികാസത്തിലും രക്തകോശങ്ങളുടെ പുതുക്കലിലും സജീവ പങ്ക് വഹിക്കുമെന്ന് കരുതപ്പെടുന്നു.
ഡാര്‍ക്ക് ചോക്ലേറ്റിലെ ഫ്‌ലേവനോള്‍ നമ്മുടെ തലച്ചോറിലെത്തുന്ന രക്തത്തിന്റെ അളവ് വര്‍ധിപ്പിക്കുകയും ജാഗ്രത മെച്ചപ്പെടുത്തുകയും അതിനാല്‍ ഒരു പരീക്ഷയ്ക്കിടെ കഴിക്കുന്നത് ഉപയോഗപ്രദമാണെന്ന് കണ്ടെത്തുകയും ചെയ്തിരിക്കുന്നു. ഹ്രസ്വകാല മെമ്മറി വര്‍ധിപ്പിക്കുന്നതിനും ഫോക്കസ് മെച്ചപ്പെടുത്തുന്നതിനും ഡിമെന്‍ഷ്യ കുറയ്ക്കുന്നതിനും സഹായകമാവുന്ന ജിങ്കോ ബിലോബ തലച്ചോറിലേക്കുള്ള രക്തയോട്ടം വര്‍ധിപ്പിക്കുന്നു. ഫ്രീ റാഡിക്കലുകളുമായി പോരാടാനും തലച്ചോറിന്റെ പ്രവര്‍ത്തനം വര്‍ധിപ്പിക്കാനും സഹായിക്കുന്ന ഉയര്‍ന്ന ആന്റിഓക്സിഡന്റ് ചായയിലുണ്ട് എന്ന് പഠനങ്ങള്‍ വെളിവാക്കുന്നു.
ഡിമെന്‍ഷ്യയുടെ സാധ്യത കുറയ്ക്കാനുള്ള ചില പോഷകാഹാര രീതികള്‍
- ആവശ്യത്തിന് ഒമേഗ-3 ഫാറ്റി ആസിഡുകള്‍ ഭക്ഷണക്രമത്തില്‍ ഉള്‍പ്പെടുത്തുക.
- കലോറിയും സാച്ചുറേറ്റഡ് കൊഴുപ്പും പരിമിതപ്പെടുത്തുക.
- കൂടുതല്‍ പഴങ്ങളും പച്ചക്കറികളും കഴിക്കുക.
- ഗ്രീന്‍ ടീ കുടിക്കുക.
- തലച്ചോറിലെ രക്തയോട്ടം വര്‍ധിപ്പിക്കുകയും അല്ഷിമേഴ്സ് രോഗ സാധ്യത കുറയ്ക്കുകയും ചെയ്യുന്ന റെസ്വെറട്രോള്‍ എന്ന ഫ്‌ലേവനോയ്ഡ് വൈനിലും ഗ്രേപ്പ് ജ്യൂസിലും അടങ്ങിയിട്ടുണ്ട്. അതിനാല്‍ ഇതിന്റെ ഉപയോഗം ഫലപ്രാപ്തി നല്‍കുന്നു.
ശാരീരിക വ്യായാമം നിങ്ങളുടെ തലച്ചോറിലേക്ക് ഓക്‌സിജന്‍ വര്‍ധിപ്പിക്കുകയും സഹായകരമായ മസ്തിഷ്‌ക രാസവസ്തുക്കളുടെ ഫലങ്ങള്‍ വര്‍ധിപ്പിക്കുകയും സ്‌ട്രെസ് ഹോര്‍മോണുകളെ കുറയ്ക്കുകയും ചെയ്യുന്നു. വളര്‍ച്ചാ ഘടകങ്ങള്‍ വര്‍ധിപ്പിച്ചും പുതിയ ന്യൂറോണല്‍ കണക്ഷനുകള്‍ ഉത്തേജിപ്പിച്ചും ന്യൂറോപ്ലാസ്റ്റിസിറ്റിയില്‍ വ്യായാമം ഒരു പ്രധാന പങ്ക് വഹിക്കുന്നു. പതിവ് എയറോബിക് വ്യായാമങ്ങള്‍ ഹിപ്പോകാമ്പസിന്റെ പ്രവര്‍ത്തനം മെച്ചപ്പെടുത്തുകയും പ്രായവുമായി ബന്ധപ്പെട്ട ഹിപ്പോകാമ്പല്‍ അട്രോഫിയുടെ ആരംഭം കുറയ്ക്കുകയും ചെയ്യുന്നു. ലിംബിക് സിസ്റ്റത്തിന്റെ ഭാഗമായ ഹിപ്പോകാമ്പസ് സ്‌പേഷ്യല്‍ മെമ്മറിയിലും കോഗ്‌നിറ്റീവ് ഫംഗ്ഷനുകളിലും പ്രധാന പങ്ക് വഹിക്കുന്നു. സമീപകാല മെമ്മറി ദീര്‍ഘകാല മെമ്മറിയിലേക്ക് ഏകീകരിക്കുന്നതില്‍ ഇത് ഒരു പ്രധാന പങ്ക് വഹിക്കുന്നു.
4. ശരിയായ ഉറക്കം
ഒരു മുതിര്‍ന്നയാള്‍ക്ക് 7-9 മണിക്കൂര്‍ ശരിയായ ഉറക്കം ആവശ്യമാണ്. ഉറക്കക്കുറവ് മെമ്മറി, സര്‍ഗ്ഗാത്മകത, പ്രശ്നപരിഹാര കഴിവുകള്‍, വിമര്‍ശനാത്മക ചിന്താശേഷി എന്നിവയെ സാരമായി ബാധിക്കുന്നു. പുതിയ കാര്യങ്ങള്‍ പഠിക്കുന്നതിനും, ഉറക്കത്തിന്റെ ആഴമേറിയ ഘട്ടങ്ങളില്‍ മെമ്മറി വര്‍ധിപ്പിക്കുന്ന പ്രവര്‍ത്തനത്തിലൂടെ മെമ്മറി മെച്ചപ്പെടുത്തുന്നതിനും ശരിയായ ഉറക്കം വളരെ പ്രധാനമാണ്. ടി.വി, ടാബ്ലെറ്റുകള്‍, ഫോണുകള്‍, കംപ്യൂട്ടറുകള്‍ എന്നിവ പുറപ്പെടുവിക്കുന്ന നീലവെളിച്ചം മെലറ്റോണിന്‍ റിലീസിനെ തടസ്സപ്പെടുത്തുന്നതിനാല്‍ ഉറക്കമില്ലായ്മ ഉണ്ടാക്കുന്നു.
5. സാമൂഹിക ബന്ധങ്ങള്‍ക്കും ഇടപെടലുകള്‍ക്കും വേണ്ടി സമയം കണ്ടെത്തുക
ആരോഗ്യകരമായ ബന്ധങ്ങളും മറ്റുള്ളവരുമായി ഇടപഴകുന്നതും തലച്ചോറിനെ ഉത്തേജിപ്പിക്കുകയും ധാരാളം വൈജ്ഞാനിക ഗുണങ്ങള്‍ നേടിത്തരുകയും ചെയ്യുന്നു. വൈകാരിക ആരോഗ്യത്തിന് മാത്രമല്ല, തലച്ചോറിന്റെ ആരോഗ്യത്തിനും ഇത് പ്രധാനമാണ്. ഏറ്റവും സജീവമായ സാമൂഹിക ജീവിതമുള്ള ആളുകള്‍ക്ക് മെമ്മറി കുറയുന്നതിന്റെ ( Memory Decline) വേഗത കുറവാണ്. തമാശകളും ചിരിയും തലച്ചോറിലുടനീളം ഒന്നിലധികം പ്രദേശങ്ങളില്‍ ഇടപഴകുന്നു. മാത്രമല്ല പുതിയ പഠനത്തിനും സര്‍ഗ്ഗാത്മകതയ്ക്കും അത് പ്രധാനമാണ്.
.jpg?$p=cc813d8&&q=0.8)
6. സ്‌ട്രെസ് നിയന്ത്രിക്കുക
വിട്ടുമാറാത്ത സ്‌ട്രെസ് ഹിപ്പോകാമ്പസ് ഉള്‍പ്പെടെയുള്ള തലച്ചോറിലെ കോശങ്ങളെ തകര്‍ക്കും (പുതിയ ഓര്‍മ്മകള്‍ രൂപപ്പെടുന്നതിലും പഴയവ വീണ്ടെടുക്കുന്നതുമായ തലച്ചോറിന്റെ പ്രദേശം). കോഗ്‌നിറ്റീവ് ഫംഗ്ഷനുകളും ശരിയായ മെമ്മറിയും വര്‍ധിപ്പിക്കുന്നതിന് ശരിയായ സ്‌ട്രെസ് റിലീവിംഗ് ടെക്‌നിക്കുകള്‍ പഠിക്കുന്നത് പ്രധാനമാണ്.
ധ്യാനത്തിന് ( Meditation) ഫോക്കസ്, ഏകാഗ്രത, സര്‍ഗ്ഗാത്മകത, മെമ്മറി, പഠന, യുക്തിസഹമായ കഴിവുകള്‍ എന്നിവ മെച്ചപ്പെടുത്താന്‍ കഴിയും. വിഷാദം, ഉത്കണ്ഠ, വിട്ടുമാറാത്ത വേദന, പ്രമേഹം, ഉയര്‍ന്ന രക്തസമ്മര്‍ദ്ദം എന്നിവയുള്‍പ്പെടെ പലതരം അവസ്ഥകള്‍ മെച്ചപ്പെടുത്താന്‍ ഇത് സഹായിക്കുന്നു. തലച്ചോറിന്റെ ഒരു ഭാഗമായ ഇടത് പ്രീഫ്രോണ്ടല്‍ കോര്‍ട്ടക്‌സില്‍ പതിവ് ധ്യാനിക്കുന്നവര്‍ക്ക് കൂടുതല്‍ പ്രവര്‍ത്തനമുണ്ടെന്ന് ബ്രെയിന്‍ ഇമേജുകള്‍ കാണിക്കുന്നു. ധ്യാനം സെറിബ്രല്‍ കോര്‍ട്ടെക്‌സിന്റെ കനം വര്‍ധിപ്പിക്കുകയും മസ്തിഷ്‌ക കോശങ്ങള്‍ തമ്മിലുള്ള കൂടുതല്‍ ബന്ധങ്ങള്‍ പ്രോത്സാഹിപ്പിക്കുകയും ചെയ്യുന്നു- ഇതെല്ലാം മാനസിക മൂര്‍ച്ചയും മെമ്മറി ശേഷിയും വര്‍ധിപ്പിക്കുന്നു.
7. ആരോഗ്യപ്രശ്‌നങ്ങള്‍ കണ്ടെത്തി ചികിത്സിക്കുക
ഡിമെന്‍ഷ്യ അല്ലെങ്കില്‍ അല്ഷിമേഴ്സ് രോഗം കൂടാതെ പല രോഗങ്ങളും, മാനസികാരോഗ്യ വൈകല്യങ്ങളും, മരുന്നുകളും മെമ്മറിക്ക് തടസ്സം സൃഷ്ടിക്കുന്നു. ഹൃദയ രോഗങ്ങള്‍, ഉയര്‍ന്ന കൊളസ്‌ട്രോള്‍, ഉയര്‍ന്ന രക്തസമ്മര്‍ദ്ദം, പ്രമേഹം, പെരിമെനോപോസല്‍ പിരീഡ്, കുറഞ്ഞ ടെസ്റ്റോസ്റ്റിറോണ്‍, തൈറോയ്ഡ് അസന്തുലിതാവസ്ഥ, വിഷാദം, ഉറക്ക ഗുളികകള്‍, ആന്റിഡിപ്രസന്റുകള്‍ തുടങ്ങിയ മരുന്നുകള്‍ എന്നിവ ഇതില്‍ ഉള്‍പ്പെടുന്നു. അവ ശ്രദ്ധയോടെ തന്നെ കൈകാര്യം ചെയ്യണം.
8. പഠനത്തെയും മെമ്മറിയെയും പിന്തുണയ്ക്കുന്നതിനുള്ള പ്രായോഗിക ഘട്ടങ്ങള്‍ മനസിലാക്കുക
- തീവ്രമായി ഫോക്കസ് ചെയ്യുക (നമ്മുടെ മെമ്മറിയിലേക്ക് വിവരങ്ങള്‍ പ്രോസസ്സ് ചെയ്യുന്നതിന് ഏകദേശം എട്ട് സെക്കന്‍ഡ് തീവ്രമായ ഫോക്കസ് ആവശ്യമാണ്)
- കാര്യങ്ങള്‍ ചെയ്യുമ്പോള്‍ കഴിയുന്നത്രയും ഇന്ദ്രിയങ്ങളെ ഉള്‍കൊള്ളിക്കുക.
- നമുക്ക് ഇതിനകം അറിയാവുന്ന കാര്യങ്ങളുമായി വിവരങ്ങള്‍ ബന്ധപ്പെടുത്താന്‍ ശ്രമിക്കുക.
- നമ്മള്‍ ഇതിനകം പഠിച്ച കാര്യങ്ങള്‍ നിരന്തരമായി റിഹേഴ്സല്‍ ചെയ്യുക.
- മന:പാഠമാക്കല്‍ എളുപ്പമാക്കുന്നതിന് നെമോണിക് ( Mnemonic) ഉപകരണങ്ങള്‍ ഉപയോഗിക്കുക.
'മെമ്മറി ഒരു സംസ്‌കാരത്തെ പോഷിപ്പിക്കുന്നതോടൊപ്പം പ്രത്യാശയെ പരിപോഷിപ്പിക്കുകയും മനുഷ്യനെ മനുഷ്യനാക്കുകയും ചെയ്യുന്നു.'
Content Highlights: How to improve Memory, Effects of Stress on Memory
Also Watch
RELATED STORIES
.jpg?$p=b4643a5&f=1x1&w=100&q=0.8)
.jpg?$p=3359361&f=1x1&w=100&q=0.8)
.jpg?$p=4002001&f=1x1&w=100&q=0.8)
IN CASE YOU MISSED IT
.jpg?$p=1990e2a&f=1x1&w=100&q=0.8)
.jpg?$p=8a7b7b1&f=1x1&w=100&q=0.8)
.jpg?$p=aa62323&f=1x1&w=100&q=0.8)
.jpg?$p=c0d0d29&q=0.8&f=16x11&w=104)
.jpg?$p=06f32f3&q=0.8&f=16x11&w=104)
.jpg?$p=50b0615&q=0.8&f=16x11&w=104)
.jpg?$p=3a37793&q=0.8&f=16x11&w=104)
വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, മാതൃഭൂമിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക..