04 June 2023, 02:25 PM IST

1 min read

Read later

Representative Image | Photo: Canva.com

ചെറുപ്രായത്തിലാണ് കുഞ്ഞുങ്ങളിലെ തലച്ചോര്‍ വികസനം ഏറ്റവും ദ്രുതഗതിയില്‍ സംഭവിക്കുന്നത്. തലച്ചോറിന്റെ വികസനത്തില്‍ ഭക്ഷണക്രമത്തിന് വലിയ പങ്കുണ്ട്. തലച്ചോറിന് പ്രവര്‍ത്തിക്കാനാവശ്യമായ ന്യൂട്രിയന്റുകളും വിറ്റാമിനുകളും ഡയറ്റിലുള്‍പ്പെടുത്താന്‍ ശ്രദ്ധിക്കണം.

കുട്ടികളുടെ ഡയറ്റില്‍ ബ്രെയിന്‍ ഡെവലപ്പ്‌മെന്റിനായി നിര്‍ബന്ധമായും ഉള്‍പ്പെടുത്തേണ്ട ഭക്ഷണസാധനങ്ങളെക്കുറിച്ച് ന്യൂട്രീഷനിസ്റ്റ് ലോവ്‌നീത് ബത്ര തന്റെ ഇന്‍സ്റ്റഗ്രാം പോസ്റ്റിലൂടെ പറയുന്നുണ്ട്.

തലച്ചോറിന് ആവശ്യമായ പ്രത്യേകതരം സൂപ്പര്‍ഫുഡൊന്നും ലഭ്യമല്ലെങ്കിലും തലച്ചോറിന്റെ വികസനത്തിനാവശ്യമായ ന്യൂട്രിയന്റുകളടങ്ങിയ ഏതാനും ഭക്ഷണപദാര്‍ഥങ്ങള്‍ കുട്ടികളുടെ ഡയറ്റില്‍ ചേര്‍ക്കുന്നത് ഉത്തമമാണെന്നാണ് ലോവ്‌നീത് ബത്ര പറയുന്നത്.

യോഗര്‍ട്ടാണ് ന്യൂട്രീഷനിസ്റ്റ് നിര്‍ദേശിക്കുന്ന ആദ്യത്തെ ഭക്ഷണം. യോഗര്‍ട്ടിലടങ്ങിയിരിക്കുന്ന അയഡിന്‍, തലച്ചോറിന്റെ വികസനത്തിനും കുട്ടികളുടെ വൈജ്ഞാനികപരമായ വികസനത്തിനും സഹായിക്കും. പ്രോട്ടീന്‍, സിങ്ക്, വിറ്റാമിന്‍ ബി-12, സെലീനിയം തുടങ്ങി തലച്ചോറിന്റെ പ്രവര്‍ത്തനത്തിനാവശ്യമായ മറ്റനേകം ന്യൂട്രിയന്റുകളുടേയും കലവറയാണ് യോഗര്‍ട്ട്.

ബീന്‍സും പയറുവര്‍ഗങ്ങളുമാണ് മറ്റൊന്ന്. തലച്ചോറിന്റെ വികസനത്തിനാവശ്യമായ മഗ്നീഷ്യം, സിങ്ക്, നാരുകള്‍, ആന്റി-ഓക്‌സിഡന്റുകള്‍, ഫോളേറ്റുകള്‍ എന്നിവ ധാരാളം അടങ്ങിയ ഭക്ഷണപദാര്‍ഥങ്ങളാണ് പയറുവര്‍ഗങ്ങള്‍.

ഗോതമ്പ്, ബാര്‍ളി, അരി, അമരന്ത്, ഓട്‌സ് എന്നിവയാണ് തലച്ചോറിന്റെ പ്രവര്‍ത്തനങ്ങളെ ഉത്തേജിപ്പിക്കുന്നതും ഓര്‍മ കാത്തുസൂക്ഷിക്കുന്നതുമായ വിറ്റാമിന്‍ ബി യുടെ കലവറ.ധാന്യങ്ങളിലും മറ്റ് വിത്തുകളിലുമടങ്ങിയ മോണോസാച്ചുറേറ്റഡ് ഫാറ്റും ഒമേഗ-3യും തലച്ചോറിന്റെ വികസനത്തിന് പ്രധാനമാണ്. പിസ്തയില്‍ അടങ്ങിയിരിക്കുന്ന ല്യൂട്ടിന്‍ എന്ന ഫൈറ്റോക്കെമിക്കല്‍ കുട്ടികളിലെ വൈജ്ഞാനിക വളര്‍ച്ചയെ പ്രോത്സാഹിപ്പിക്കും. മത്തങ്ങയുടെ വിത്തിലടങ്ങിയിരിക്കുന്ന ആന്റി-ഓക്‌സിഡന്റുകള്‍ തലച്ചോറിനെ സംരക്ഷിക്കുന്നതാണ്.

സമീകൃതവും പോഷകസമ്പന്നവുമായ ഭക്ഷണക്രമം കൊണ്ട് കുഞ്ഞുങ്ങളിലെ തലച്ചോറിന്റെ വളര്‍ച്ചയും മൊത്തത്തിലുള്ള ആരോഗ്യവും സംരക്ഷിക്കാന്‍ സാധിക്കും.