കോവിഡ് രോഗികളുടെ എണ്ണത്തില്‍ വന്‍ വര്‍ധനവാണ് കണ്ടുവരുന്നത്. കഴിഞ്ഞ പ്രാവശ്യത്തെക്കാളേറെ കോവിഡ് രോഗികള്‍ക്ക് ഓക്‌സിജന്റെ ആവശ്യം കണ്ടുവരുന്നുണ്ട്. കൂടുതല്‍ രോഗികള്‍ക്ക് വെന്റിലേറ്ററിന്റെ ആവശ്യമുള്ളതായി കാണുന്നു.

ഇതുകൂടാതെ ചെറിയ ലക്ഷണങ്ങളോടുകൂടി വീടുകളില്‍ തന്നെ ഐസൊലേറ്റ് ചെയ്ത കോവിഡ് രോഗികളുമുണ്ട്. അവരെ കാറ്റ​ഗറി എ യില്‍ ആണ് ഉള്‍പ്പെടുത്തിയിട്ടുള്ളത്. അവര്‍ക്ക് ഓക്‌സിജന്റെ ആവശ്യം വരുന്നില്ല. അവരെ സംബന്ധിച്ച് അവര്‍ക്ക് രോഗലക്ഷണങ്ങള്‍ അനുസരിച്ച് ചികിത്സ ലഭ്യമാക്കിയാല്‍ മതി. കുട്ടികള്‍ ആണെങ്കിലും മുതിര്‍ന്നവര്‍ ആണെങ്കിലും പനി കുറയാന്‍ പാരസെറ്റമോള്‍ കൊടുക്കുക. ഇടയ്ക്കിടെ ചൂടുവെള്ളം കുടിക്കുക. അതുപോലെ സാധാരണ കഴിക്കുന്ന ലളിത ആഹാരം കഴിക്കുക, ഒപ്പം വിശ്രമിക്കുക. അവര്‍ക്ക് കൂടുതല്‍ ബുദ്ധിമുട്ട് അനുഭവപ്പെട്ടാല്‍ ടെലിമെഡിസിന്‍ വഴി ആശുപത്രിയുമായി ബന്ധപ്പെടുക. ടെലിമെഡിസിനിലൂടെ ഡോക്ടറുമായി സംസാരിച്ച് ചികിത്സ തുടരാനുള്ള സംവിധാനവുമുണ്ട്.

കാറ്റ​ഗറി എ വിഭാഗം രോഗികള്‍ വീടുകളില്‍ തന്നെ ശരീരതാപനില നോക്കുകയും അതുപോലെ സാച്ചുറേഷന്‍( രക്തത്തിലെ ഓക്‌സിജന്റെ അളവ്) നോക്കുകയും വേണം. സാച്ചുറേഷന്‍ 94 ശതമാനത്തില്‍ കൂടുതലാണെങ്കില്‍ തല്‍ക്കാലത്തേക്ക് കുഴപ്പമില്ല വീട്ടില്‍ തന്നെ തുടരാവുന്നതാണ്. 94 ശതമാനത്തില്‍ താഴെ പോവുകയാണെങ്കില്‍ ഓക്‌സിജന്റെ ആവശ്യമുണ്ട് എന്ന് സൂചിപ്പിക്കുന്നു. അങ്ങനെയുള്ളവരെ ആശുപത്രിയിലെത്തിക്കുകയും കൃത്യസമയത്ത് ഓക്‌സിജന്‍ കൊടുക്കുകയും വേണം.
 
എന്നാല്‍ ചില സാഹചര്യത്തില്‍ രോഗിക്ക് ഓക്‌സിജന്‍ മാത്രം കൊടുത്താല്‍ സാച്ചുറേഷന്‍ കൂടുകയില്ല. ഇതിനെ സിവിയർ ഡിസീസ് എന്ന് പറയുന്നു. ഈ രോഗികളെ ഐ.സി.യുവില്‍ പ്രവേശിപ്പിക്കേണ്ടി വരുന്നു.

മോഡറേറ്റ് ഡിസീസ് എന്ന ഘട്ടത്തിൽ ഉള്ളവര്‍ക്ക് സിലിണ്ടറില്‍ കൂടിയല്ലാതെ സെന്‍ട്രല്‍ ഓക്‌സിജന്‍ നൽകും. സിലിണ്ടര്‍ ഓക്‌സിജന്‍ ഉപയോഗിക്കുമ്പോള്‍ 6 മണിക്കൂര്‍ ഇടവിട്ട് ഓക്‌സിജന്‍ തീരുകയും അത് മാറ്റിവയ്‌ക്കേണ്ടി വരികയും ചെയ്യുന്നു. എന്നാല്‍ സെന്‍ട്രല്‍ സപ്ലൈ ആണെങ്കിൽ അത് തുടര്‍ച്ചയായി ലഭിക്കുന്നു. ഇതു മുതിര്‍ന്നവര്‍ക്കും കുട്ടികള്‍ക്കും ഉപയോഗിക്കാവുന്നതാണ്.
 
അസുഖം വന്ന് 10 ദിവസം കഴിയുമ്പോള്‍ ഒരു ആന്റിജന്‍ ടെസ്റ്റ് ചെയ്യാം. അത് നെഗറ്റീവ് ആയാല്‍ ഏഴുദിവസം കൂടി ക്വാറന്റീൻ തുടരണം. ആശുപത്രിയില്‍ പ്രവേശിപ്പിച്ച കോവിഡ് രോഗികള്‍ മോഡറേറ്റ് കോവിഡ് ഡിസീസ് ആണ് കാണിക്കുന്നതെങ്കില്‍ (അതായത് ഓക്‌സിജന്‍ കൊടുക്കുമ്പോള്‍ സാച്ചുറേഷന്‍ കൂടുന്നുണ്ടെങ്കില്‍) അവര്‍ക്ക് ഓക്‌സിജന്റെ ആവശ്യമില്ലാതെ സാച്ചുറേഷന്‍ സ്ഥിരത ആകുന്ന ഘട്ടം എത്തി, പനി ഒന്നും ഇല്ല എന്നുണ്ടെങ്കില്‍ മൂന്നു ദിവസത്തിനുള്ളില്‍ ഡിസ്ചാര്‍ജ് ചെയ്യാവുന്നതാണ്. വെന്റിലേറ്ററില്‍ ആണ്, ഗുരുതര അവസ്ഥയാണെങ്കില്‍ ഉദാഹരണത്തിന് എച്ച്‌.ഐ.വി. രോഗി, സ്റ്റീറോയ്ഡ് മരുന്ന് കഴിക്കുന്നവര്‍, കാന്‍സര്‍ രോഗികള്‍ ഒക്കെ ആണെങ്കില്‍ അവരെ നേരത്തെ ഡിസ്ചാര്‍ജ് ചെയ്യില്ല. ഇവരെ ഏകദേശം 14 ദിവസം കഴിഞ്ഞ് രോഗം ഭേദമായശേഷം ഡിസ്ചാര്‍ജ് ചെയ്യും.
 
ഐ.സി.യു. രോഗികളെ വാര്‍ഡിലേക്ക് എപ്പോൾ മാറ്റണം എന്നുള്ളത് അവിടുത്തെ ഡോക്ടര്‍മാരുടെ തീരുമാനമാണ്. കോവിഡ് രോഗി ആണെന്ന് മനസ്സിലാക്കിയാല്‍ ആ രോഗിയെ നിരന്തരം നിരീക്ഷിച്ചുകൊണ്ടിരിക്കും. രോ​ഗതീവ്രത കൂടുന്നത് മനസ്സിലാക്കാന്‍ ഇത് സഹായിക്കുന്നു.
 
ഈ അവസ്ഥ വരാതിരിക്കാന്‍ ചില കാര്യങ്ങൾ ചെയ്യണം. മാസ്‌ക് ഉപയോഗിക്കുക, സാമൂഹിക അകലം പാലിക്കുക, വീടിനുള്ളിലും മാസ്‌ക് ധരിക്കുക, എല്ലാവരും ഒരേ സമയത്ത് ഭക്ഷണം കഴിക്കാതിരിക്കുക എന്നിവയാണവ.
 
എല്ലാവരും പരസ്പരം മാനസികമായി പ്രചോദിപ്പിക്കുക. ശാരീരിക പിന്തുണ മാത്രമല്ല
മാനസിക പിന്തുണയും പ്രധാനമാണ്. നെഗറ്റീവായ  കാര്യങ്ങള്‍ പങ്കിടാതിരിക്കുക. നെഗറ്റീവായ ടി.വി. പ്രോഗ്രാമുകള്‍, നെഗറ്റീവ് വാര്‍ത്തകള്‍  എന്നിവ മാനസികാരോഗ്യത്തെ ബാധിക്കും, അതിനാല്‍ അത്തരം കാര്യങ്ങള്‍ ഒഴിവാക്കുന്നത് നല്ലതായിരിക്കും.

ഏതൊരു അസുഖം ആണെങ്കിലും പ്രതിരോധ കുത്തിവെപ്പ് എടുത്താലും രോഗം വരാന്‍ സാധ്യതയുണ്ട്. എന്നാല്‍ ആ അസുഖത്തിന്റെ തീവ്രത കുറവായിരിക്കും. വളരെ അപൂര്‍വ്വമായി മാത്രമേ പ്രതിരോധ കുത്തിവെപ്പ് എടുത്തവർക്ക്  തീവ്രതയില്‍ അസുഖം വരികയുള്ളൂ.
 
എത്രത്തോളം നമ്മള്‍ അശ്രദ്ധ കാണിച്ചു എന്നത് ആശ്രയിച്ചാണ് വാക്‌സിനേഷന് ശേഷം വരുന്ന രോഗത്തിന്റെ തീവ്രത. വാക്‌സിനേഷന്‍ ലഭ്യത ഇപ്പോള്‍ കുറവാണ് ഈ സാഹചര്യത്തില്‍ വാക്‌സിനേഷന്‍ ലഭിക്കുന്ന സെന്ററില്‍ തിക്കുംതിരക്കും കൂട്ടാതെ സുരക്ഷിതമായി വാക്‌സിനേഷന്‍ എടുക്കണം.

കോവിഡ് രോഗികളുടെ പ്രവേശനം എങ്ങനെയൊക്കെ ആണെന്ന് സർക്കാർ നിരന്തരമായി നിരീക്ഷിക്കുന്നുണ്ട്. അതുപോലെ പ്രവേശിപ്പിക്കുന്ന രോഗികള്‍ക്ക് ആവശ്യമായ ഓക്‌സിജന്‍ ലഭിക്കുന്നുണ്ടോ എന്നും സർക്കാർ  പരിശോധിക്കുന്നു. ഈ ഒരു അവസ്ഥയില്‍ വെന്റിലേറ്ററിന്റെ കുറവ് വന്നാല്‍ വേറെ ആശുപത്രിയിലേക്ക് മാറ്റാനുള്ള സജ്ജീകരണവും സർക്കാർ ഏര്‍പ്പെടുത്തിയിട്ടുണ്ട്. ഓക്‌സിജന്‍ കുറവ് വന്നാല്‍ അത് സ്വകാര്യ ആശുപത്രികളിലാണെങ്കിലും സർക്കാർ  ആശുപത്രികളിലാണെങ്കിലും സർക്കാർ ഇടപെട്ട് കുറവ് നികത്തും എന്ന് ഉറപ്പ് നല്‍കിയിട്ടുണ്ട്.

ലോക്ക്ഡൗണ്‍ വൈകിയതിനാലാണ് ഈ രണ്ടാംതരം​ഗത്തിൽ കൂടുതല്‍ ആളുകൾക്ക് രോഗം പിടിപെട്ടത്. കുട്ടികള്‍ക്കും മുതിര്‍ന്നവര്‍ക്കും ഒരുപോലെയാണ് രോഗം വരാനുള്ള സാധ്യത. കഴിഞ്ഞ രണ്ടാംതരം​ഗത്തിൽ കുട്ടികള്‍ക്ക് അധികം രോഗം ബാധിച്ചിരുന്നില്ല. രോഗവ്യാപനം കൂടിയതിനാലാണ് കോവിഡിന്റെ രണ്ടാം വരവില്‍ മരണനിരക്ക് കൂടിയത്.
 
സർക്കാർ കോവിഡ് മാര്‍​ഗനിര്‍ദേശങ്ങള്‍ കൃത്യമായി പാലിക്കണം. പരമാവധി സാമൂഹിക കൂടിച്ചേരലുകളിൽ പങ്കെടുക്കാതെ സുരക്ഷിതരായി വീട്ടില്‍ തന്നെ കഴിയണം. ജോലിക്ക് പോകുന്നവര്‍ കൃത്യമായി മാസ്‌ക് ധരിച്ച് സാമൂഹിക അകലം പാലിച്ച് കെെകളുടെ ശുചിത്വം ശീലമാക്കണം. ഇതെല്ലാം വഴി കോവിഡിനെ ഒരുപരിധിവരെ നമുക്ക് പ്രതിരോധിക്കാവുന്നതാണ്. 

(പട്ടം എസ്.യു.ടി. ഹോസ്പിറ്റലിലെ പീഡിയാട്രിഷ്യനും കോവിഡ് നോഡൽ ഓഫീസറുമാണ് ലേഖകൻ)

Content Highlights: Covid19 Corona Virus pandemic, Category of Covid19 patients and treatments, Health