കോവിഡ് 19 പശ്ചാത്തലത്തില്‍ മിഡില്‍ ഈസ്റ്റ് രാജ്യങ്ങളിലെ പ്രവാസി പ്രതിനിധികളെയും റിട്ടേണീസ് ഫോറം പ്രതിനിധികളെയും ഉള്‍പ്പെടുത്തി സൂം കോണ്‍ഫറന്‍സിംഗ് വഴിയാണ് ഓവര്‍സീസ് എന്‍ സി പി ലീഡേഴ്‌സ് മീറ്റിംഗ് സംഘടിപ്പിച്ചത്. യോഗത്തില്‍ മുഖ്യാതിഥിയായി എന്‍ സി പി ലോകസഭ കക്ഷി നേതാവും, രാഷ്ട്രവാദി യുവതി കോണ്‍ഗ്രസ്സ് ദേശീയ അധ്യക്ഷയുമായ സുപ്രിയ സുലെ എം.പി. പങ്കെടുത്തു. ഒ എന്‍ സി പി ദേശീയ പ്രസിഡന്റ് ബാബു ഫ്രാന്‍സീസ് (കുവൈത്ത്) അധ്യക്ഷത വഹിച്ചു. ഒ എന്‍ സി പി ദേശീയ ജനറല്‍ സെക്രട്ടറി ജിയോ ടോമി (യു.എ.ഇ) സ്വാഗതം പറഞ്ഞു.
കോവിഡ് 19 സാഹചര്യത്തില്‍ വിദേശത്തു നിന്നു നാട്ടിലേക്ക് മടങ്ങാന്‍ കാത്തിരിക്കുന്ന എല്ലാ പ്രവാസികളെയും അടിയന്തിരമായി നാട്ടിലേക്ക് എത്തിക്കുന്നതിനാവശ്യമായ കൂടുതല്‍ വിമാന സര്‍വീസുകള്‍ വന്ദേ ഭാരത് മിഷന്‍ വഴി അനുവദിക്കുക, വിവിധ വിമാന കമ്പനികളുടെ മറ്റു സര്‍വീസുകള്‍ക്കാവശ്യമായ അനുമതികള്‍ വേഗത്തില്‍ നല്‍കുക, ദുരിതമനുഭവിക്കുന്ന പ്രവാസികള്‍ക്ക് നാട്ടിലേക്കുള്ള യാത്രക്ക് ആവശ്യമായ ടിക്കറ്റ് ചാര്‍ജ്ജ് ഇന്ത്യന്‍ കമ്മൂണിറ്റി വെല്‍ഫയര്‍ ഫണ്ടില്‍ നിന്ന് അനുവദിക്കുക, കോവിഡ് 19 മൂലം മരണപ്പെട്ട പ്രവാസികളുടെ കുടുംബങ്ങള്‍ക്ക് അടിയന്തിര ധനസഹായം പ്രഖ്യാപിക്കുക, തൊഴില്‍ നഷ്ടപ്പെട്ട് നാട്ടിലേക്ക് വരുന്നവര്‍ക്ക്, സര്‍ക്കാര്‍, പൊതുമേഖലാ സംരംഭങ്ങളില്‍ വേഗത്തില്‍ തൊഴില്‍ ലഭ്യമാകുവാന്‍ ആവശ്യമായ മുന്‍ഗണന നല്‍കുക, സ്വന്തമായി തൊഴില്‍ സംരംഭങ്ങള്‍ ആരംഭിക്കാന്‍ മുന്നോട്ടു വരുന്നവര്‍ക്ക് സര്‍ക്കാര്‍ സാമ്പത്തിക സഹായം നല്‍കുക തുടങ്ങിയ അടിയന്തിര പ്രാധാന്യമുള്ള വിഷയങ്ങള്‍ കേന്ദ്ര സര്‍ക്കാരിന്റെ ശ്രദ്ധയില്‍പ്പെടുത്തുമെന്ന് സുപ്രിയ സുലെ യോഗത്തില്‍ അറിയിക്കുകയും സംഘടനയുടെ പ്രവാസ ലോകത്തെ പ്രവര്‍ത്തനങ്ങള്‍ക്ക് എല്ലാ പിന്തുണയും ഉറപ്പു നല്‍കുകയും ചെയ്തു.
ഒ എന്‍ സി പി ഭാരവാഹികളായ -യു എ ഇയില്‍ നിന്ന് സിദ്ധിഖ് ചെറുവീട്ടില്‍, രവി കൊമ്മേരി, അഹമ്മദ് കാസ്‌കര്‍, ബാബു ലത്തീഫ്, സൗദി അറേബ്യയില്‍ നിന്ന് മുഹമ്മദ് ഷാ ടിബി, ബഹറിനില്‍ നിന്ന് രജീഷ് ആറ്റുകണ്ടത്തില്‍, ഖത്തറില്‍ നിന്ന് ജിയോ ഷെല്‍ട്ടന്‍, ഒമാനില്‍ നിന്ന് നിഷാദ് എം, കുവൈത്തില്‍ നിന്ന് ബിജു സ്റ്റീഫന്‍, അരുള്‍ രാജ് കെ വി, പ്രകാശ് ജാദവ്, ജോഫി മുട്ടത്ത്, റിട്ടേണീസ് ഫോറം പ്രതിനിധികളായി ശ്രീധരന്‍ സുബ്ബയ്യ, നൂറുല്‍ ഹസ്സന്‍, അഖില്‍ പൊന്നാരത്ത്, ജോ ഫ്രി.സി.ജി, സോണി പി.ടി. എന്‍ സി പി ഓഫീസ് സോഷ്യല്‍ മീഡിയ ഹെഡ് സതീഷ് പവാര്‍ എന്നിവര്‍ പങ്കെടുത്ത യോഗത്തില്‍ ജീവ്‌സ് എരിഞ്ചേരി (ഒ എന്‍ സി പി കുവൈത്ത് ജനറല്‍ സെക്രട്ടറി) നന്ദി പറഞ്ഞു.
