അബുദാബി: മലയാളി വ്യവസായി എം.എ. യൂസഫലിയുടെ നേതൃത്വത്തിലുള്ള ലുലു ഗ്രൂപ്പില്‍ അബുദാബി രാജകുടുംബം വീണ്ടും നിക്ഷേപം നടത്തുന്നു. 7500 കോടി രൂപ(നൂറ് കോടി ഡോളര്‍)യാണ് ഇത്തവണത്തെ നിക്ഷേപം.

അബുദാബി സര്‍ക്കാരിന്റെ ഉടമസ്ഥതയിലുള്ളതും രാജകുടുംബാംഗമായ ശൈഖ് താനൂണ്‍ ബിന്‍ സായിദ് അല്‍ നഹ്യാന്‍ ചെയര്‍മാനുമായുള്ള കമ്പനി എ.ഡി.ക്യുവാണ് ലുലുവില്‍ നിക്ഷേപം നടത്തുന്നത്.

ഈജിപ്തില്‍ വ്യാപാരം കൂട്ടാനുള്ള പദ്ധതിക്കായാണ് ഈ നിക്ഷേപം. ഈജിപ്തില്‍ 30 ഹൈപ്പര്‍മാര്‍ക്കറ്റുകളും നൂറ് മിനി മാര്‍ക്കറ്റുകളും ഇതിന്റെ ഭാഗമായി ലുലു ആരംഭിക്കും.
 
ഇത് രണ്ടാം തവണയാണ് എ.ഡി.ക്യു. ലുലുവില്‍ നിക്ഷേപിക്കുന്നത്. കഴിഞ്ഞ മാസം 8,200 കോടി രൂപയായിരുന്നു നിക്ഷേപിച്ചത്. ഇന്ത്യയും ഖത്തറും ഒഴികെയുള്ള രാജ്യങ്ങളിലെ പ്രവര്‍ത്തനത്തിനായിട്ടായിരുന്നു ഈ നിക്ഷേപം.

കഴിഞ്ഞ ആഴ്ച സൗദി കിരീടാവകാശി സല്‍മാന്‍ രാജകുമാരന്റെ നേതൃത്വത്തിലുള്ള കമ്പനിയും ലുലുവില്‍ വലിയ നിക്ഷേപം നടത്തിയിരുന്നു.
ലുലുവും എ.ഡി.ക്യുവും തമ്മിലുള്ള പുതിയ നിക്ഷേപം സംബന്ധിച്ച കരാറില്‍ അബുദാബി കമ്പനി സി.ഇ.ഒ. മുഹമ്മദ് ഹസ്സന്‍ അല്‍ സുവൈദിയും ലുലു ഗ്രൂപ്പ് ചെയര്‍മാന്‍ എം.എ. യൂസഫലിയും ഒപ്പുവെച്ചു.

ഈജിപ്തിലെ വിവിധ നഗരങ്ങളിലായി 30 ഹൈപ്പര്‍മാര്‍ക്കറ്റുകള്‍, നൂറ് മിനി മാര്‍ക്കറ്റുകള്‍ എന്നിവക്ക് പുറമെ ആധുനിക സൗകര്യങ്ങളോടെയുള്ള ലോജിസ്റ്റിക് സെന്റര്‍ സ്ഥാപിക്കാനും  ഇ കോമേര്‍സ് വിപുലീകരണത്തിനുമായിട്ടായിരിക്കും പുതിയ നിക്ഷേപം ഉപയോഗിക്കുന്നത്. മൂന്ന് മുതല്‍ അഞ്ച് വര്‍ഷത്തിനകം പുതിയ മാര്‍ക്കറ്റുകളുടെ പ്രവര്‍ത്തനം ആരംഭിക്കും.

content highlights: abudhabi invests in lulu group