റിയാദ്: പക്ഷാഘാതത്തെ തുടര്‍ന്ന് ഗുരുതരാവസ്ഥയിലായിരുന്ന കൊല്ലം സ്വദേശി മോഹനന്‍ പുരുഷോത്തമനെ തുടര്‍ ചികിത്സക്കായി നാട്ടിലെത്തിച്ചു.
റിയാദിലെ ബദിയയില്‍ 30 വര്‍ഷമായി ഡ്രൈവറായി ജോലി ചെയ്യുകയായിരുന്ന മോഹനന്‍ താമസസ്ഥലത്ത് കുഴഞ്ഞു വീഴുകയായിരുന്നു. സുഹൃത്തുക്കള്‍ വളരെ പെട്ടന്ന് തന്നെ ഷുമേസി ആശുപത്രിയില്‍ എത്തിച്ചതിനാല്‍ ജീവന്‍ രക്ഷിക്കാനായി.
ഷുമേസി ആശുപത്രിയിലെ 13 ദിവസത്തെ ചികിത്സക്ക് ശേഷം യാത്രാ രേഖകള്‍ ശരിയാക്കി കഴിഞ്ഞ ദിവസം അദ്ദേഹത്തെ തുടര്‍ ചികിത്സക്കായി നാട്ടിലെത്തിച്ചു. കേളി ജീവകാരുണ്യ വിഭാഗം ആക്ടിങ് കണ്‍വീനര്‍ മധു പട്ടാമ്പിയുടെ നേതൃത്വത്തില്‍ ബദിയയിലെ സഫ ഹോട്ടല്‍ ഉടമ ഷഹാബുദ്ദീന്‍, മോഹനന്റെ ബന്ധുവായ രതീഷ്, കേളി ബദിയ ഏരിയ കമ്മിറ്റി അംഗങ്ങള്‍ എന്നിവരാണ് മോഹനനെ നാട്ടിലെത്തിക്കാനുള്ള പ്രവര്‍ത്തനത്തിന് നേതൃത്വം നല്‍കിയത്. പിതാവിനെ നാട്ടില്‍ എത്തിക്കാന്‍ സഹായിച്ച കേളി കലാസാംസ്‌കാരിക വേദിക്കും ഹോസ്പിറ്റല്‍ ജീവനക്കാര്‍ക്കും കൂടെ അനുഗമിച്ച ഷാജഹാന്‍ ഷംസുദീനും മകന്‍ വിഘ്നേഷ് മോഹന്‍ നന്ദി അറിയിച്ചു.
