ദമ്മാം: മലര്‍വാടി ബാലസംഘം കേരളയുടെ ആഭിമുഖ്യത്തില്‍ ലോകത്തുള്ള മുഴുവന്‍ മലയാളി കുട്ടികള്‍ക്കും പങ്കെടുക്കാന്‍ അവസരമൊരുക്കി സംഘടിപ്പിക്കുന്ന മലര്‍വാടി ലിറ്റില്‍ സ്‌കോളര്‍ ഗ്ലോബല്‍ ക്വിസ്സ് പരിപാടിയുടെ പ്രവിശ്യാതല സ്വാഗതസംഘം രൂപീകരിച്ചു.
വര്‍ഷം തോറും മലര്‍വാടി നടത്തിവരാറുള്ള വിജ്ഞാനോത്സവത്തിന്റെ ഓണ്‍ലൈന്‍ പതിപ്പായാണ് പരിപാടി ആവിഷ്‌കരിക്കുന്നത്. ബുധനാഴ്ച നടന്ന സ്വാഗതസംഘ രൂപീകരണ യോഗത്തില്‍ ഡോ.സിദ്ദീഖ് അഹ്മദ് രജിസ്‌ട്രേഷന്‍ ഉദ്ഘാടനം നിര്‍വഹിച്ചു. പുത്തന്‍ അറിവുകളും അനുഭവങ്ങളും പങ്കുവെക്കുന്ന ഈ
വൈജ്ഞാനികോത്സവം പുതുതലമുറക്ക് പ്രചോദാനമാവട്ടെയെന്ന് അദ്ദേഹം ആശംസിച്ചു.
പരിപാടിയുടെ വിജയത്തിനായി രൂപവത്കരിച്ച സ്വാഗതസംഘത്തില്‍ മുഖ്യ രക്ഷാധികാരിയായി ഡോ.സിദ്ദീഖ് അഹ്മദിനേയും ചെയര്‍മാനായി മമ്മു മാസ്റ്ററെയും വൈസ്‌ചെയര്‍മാന്‍മാരായി ഡോ. സിന്ധുബിനു, സനില്‍കുമാര്‍ മാസ്റ്റര്‍ എന്നിവരെയും തിരഞ്ഞെടുത്തു.
ഭാരവാഹികളായി റഷീദ് ഉമര്‍ (ചീഫ് കോഡിനേറ്റര്‍), സാജിദ് പാറക്കല്‍ (ജനറല്‍ കണ്‍വീനര്‍), നജീബ് അരഞ്ഞിക്കല്‍, അസ്ലം ഫറോക് (പബ്ലിസിറ്റി കണ്‍വീനര്‍മാര്‍) എന്നിവരെയും ഉപദേശക സമിതി അംഗങ്ങളായി മന്‍സൂര്‍ പള്ളൂര്‍, സുനില്‍ മുഹമ്മദ്, അബ്ദുല്‍ ഹമീദ്, ആലിക്കുട്ടി ഒളവട്ടൂര്‍, മുജീബ് - കളത്തില്‍, എം.കെ ഷാജഹാന്‍, അഷ്‌റഫ് ആലുവ, റാസി ശൈഖ് പരീത്, സി.കെ ഷഫീഖ്, ബിജു പൂതക്കുളം, പി.ബി അബ്ദുല്ലത്തീഫ് എന്നിവരെയും തിരഞ്ഞെടുത്തു.
ഗെസ്റ്റ് റൗണ്ട്, സെലക്ഷന്‍ റൗണ്ട്, മെഗാ ഫിനാലെ എന്നിങ്ങനെ മൂന്ന് ഘട്ടങ്ങളിലായാണ് മത്സരം. ജനുവരി 23 മുതല്‍ ഫെബ്രുവരി 23 വരെയായിരിക്കും മത്സരങ്ങള്‍. ഫെബ്രുവരി 23 ന് മെഗാ ഫിനാലെ നടക്കും. വിജയികള്‍ക്ക് ഗ്ലോബല്‍, മേഖല തലങ്ങളില്‍ സമ്മാനങ്ങള്‍ നല്‍കും. എല്‍.പി, യു.പി, ഹൈസ്‌ക്കൂള്‍, എന്നീ മൂന്ന് വിഭാഗങ്ങളിലാണ് മത്സരങ്ങള്‍. കല, സാഹിത്യം, സംസ്‌കാരം, ആനുകാലികം തുടങ്ങി വിവിധ മേഖലകളില്‍ നിന്നുള്ള ചോദ്യങ്ങള്‍ മത്സരത്തില്‍ ഉള്‍പ്പെടുത്തും.
മാതൃകാ ചോദ്യങ്ങള്‍ മലര്‍വാടി വെബ്‌സൈറ്റിലും യുട്യൂബ് ചാനലിലും പ്രസിദ്ധീകരിക്കും. മത്സരത്തില്‍ പങ്കെടുക്കുന്ന കുട്ടികള്‍ quiz.malarvadi.org എന്ന വെബ്‌സൈറ്റ് സന്ദര്‍ശിച്ച് രജിസ്റ്റര്‍ ചെയ്യണമെന്ന് ഭാരവാഹികള്‍ അറിയിച്ചു. അവസാന തീയതി ജനുവരി 15. ചടങ്ങില്‍ കെ.എം ബഷീര്‍ അധ്യക്ഷത വഹിച്ചു. സാജിദ് പാറക്കല്‍ ഗ്ലോബല്‍ ക്വിസ്സ് പരിപാടിയെ സദസ്സിന് പരിചയപ്പെടുത്തി. റഷീദ് ഉമര്‍ സ്വാഗതവും ഉമര്‍ ഫാറൂഖ് നന്ദിയും പറഞ്ഞു.
