കുവൈത്ത് സിറ്റി : ഗള്‍ഫ് മേഖല നേരിടുന്നത് ഏറ്റവും ഗുരുതരവും അപകടകരവുമായ അവസ്ഥയാണെന്ന് കുവൈത്ത് അമീര്‍ ഷെയ്ഖ് സബാഹ് അല്‍ അഹ്മദ് അല്‍ ജാബിര്‍ അല്‍ സബാഹ്. കുവൈത്ത് വിദേശ കാര്യ മന്ത്രാലയ ആസ്ഥാനം സന്ദര്‍ശിക്കുകയായിരുന്നു അദ്ദേഹം. മേഖലയിലെ സാഹചര്യം കണക്കിലെടുത്തു നയതന്ത്ര പ്രതിനിധികള്‍ തങ്ങളുടെ ഉത്തരവാദിത്വം ഇരട്ടിയാക്കി നടപ്പില്‍ വരുത്തണമെന്നും അമീര്‍ ആവശ്യപ്പെട്ടു.
ആഗോളതലത്തില്‍ സഹായം ആവശ്യപ്പെടുന്ന ഏതൊരു പ്രദേശത്തും നടത്തി വരുന്ന സഹായഹസ്തം മാനുഷിക മൂല്യങ്ങള്‍ ഉയര്‍ത്തി പിടിക്കുന്നതാണെന്നും കുവൈത്ത് ഫണ്ട് ഫോര്‍ അറബ് ഇക്കണോമിക് ഡെവലപ്‌മെന്റ് ആന്‍ഡ് കുവൈത്ത് ചാരിറ്റബിള്‍ സ്ഥാപനം അതിനുള്ള ഏറ്റവും നല്ല ഉദാഹരണമാണെന്നും അമീര്‍ ചൂണ്ടികാണിച്ചു.
അമീറിനോടൊപ്പം കിരീടാവകാശി ഷെയ്ഖ് നവാഫ് അല്‍ അഹ്മദ് അല്‍ ജാബിര്‍ അല്‍ സബാഹും ദേശീയ സേന ഉപ മേധാവി ഷെയ്ഖ് മിശാല്‍ അല്‍ അഹ്മദ് അല്‍ ജാബിര്‍ അല്‍ സബാഹും സന്നിഹിതരായിരുന്നു.
ഉപപ്രധാനമന്ത്രിയും വിദേശ കാര്യ മന്ത്രിയുമായ ഷെയ്ഖ് സബാഹ് ഖാലിദ് അല്‍ ഹമദ് അല്‍ സബാഹ് കൂടാതെ ഡെപ്യൂട്ടി വിദേശ കാര്യ മന്ത്രി ഖാലിദ് അല്‍ ജാറള്ളയും ചേര്‍ന്നു അമീറിനെ സ്വീകരിച്ചു.
ഇരുണ്ട രാഷ്ട്രീയ സാഹചര്യത്തിലൂടെയാണ് മേഖല കടന്ന് പോകുന്നതെന്നും സഹോദര രാജ്യങ്ങളുമായി ഏറ്റവും നല്ല നയതന്ത്ര സഹകരണം ഉറപ്പ് വരുത്തണമെന്നും അമീര്‍ ഷെയ്ഖ് സബാഹ് ആവശ്യപ്പെട്ടു.
