കുവൈത്ത് സിറ്റി:  കേരള സര്‍ക്കാരിന്റെ പ്രവാസി ക്ഷേമനിധിയുടെ  പ്രായപരിധി  ഉയര്‍ത്തണമെന്ന ആവശ്യത്തില്‍ രണ്ടു മാസത്തിനകം തീരുമാനമെടുക്കാന്‍  കേരള ഹൈക്കോടതി നിര്‍ദേശം നല്‍കി. പ്രവാസി  ലീഗല്‍ സെല്‍ നല്‍കിയ  ഹര്‍ജിയിലാണ് ജസ്റ്റിസ് അനു ശിവരാമന്‍  ഉത്തരവ്  നല്‍കിയത്. കേരള  സംസ്ഥാന സര്‍ക്കാറിന്റെ കീഴില്‍ പ്രവര്‍ത്തിക്കുന്ന  പ്രവാസി വെല്‍ഫെയര്‍ ബോര്‍ഡിനാണ് ഹൈക്കോടതി നിര്‍ദേശം.

കേരളത്തിലേക്ക് മടങ്ങിവരുന്ന പ്രവാസികളെ സഹായിക്കുക എന്ന ലക്ഷ്യത്തോടെ 2008ല്‍ കേരള സര്‍ക്കാര്‍ പ്രവാസി ക്ഷേമ നിയമം പാസാക്കിയിരുന്നു. തുടര്‍ന്നു പ്രവാസികള്‍ക്ക്  പെന്‍ഷനുള്‍പ്പെടെ നല്‍കുക എന്ന ലക്ഷ്യത്തോടെ പ്രവാസി ക്ഷേമ ബോര്‍ഡ് സ്ഥാപിക്കുകയും പ്രവാസികള്‍ക്ക് പെന്‍ഷനും മറ്റും നല്‍കുന്നതിനായി ഷേമനിധി രൂപീകരിക്കുകയും  ചെയ്തു.

നിലവില്‍  ഈ ക്ഷേമ നിധിയില്‍ അംഗത്വമെടുക്കുവാനുള്ള പ്രായപരിധി 60 വയസാണ്. എന്നാല്‍ ഈ ക്ഷേമനിധിയെകുറിച്ചു നിരവധി പ്രവാസികള്‍ക്ക് കാര്യമായ അറിവില്ലാത്തതിനെ  തുടര്‍ന്നു ഇതില്‍ ചേരാന്‍ ഒരുപാട് പ്രവാസികള്‍ക്ക് ഇതുവരെയും  സാധിച്ചിട്ടില്ല. ഇപ്പോള്‍ കോവിഡിനെയും മറ്റും തുടര്‍ന്നു  നിരവധി പ്രവാസികളാണ്  നാട്ടിലേക്കെത്തുന്നത്. 60 വയസിനുശേഷം പ്രവാസജീവിതം അവസാനിപ്പിച്ച് വരുന്നവര്‍ക്ക് ക്ഷേമനിധിയില്‍ അംഗത്വം നല്‍കാതിരിക്കുന്നത് വിവേചനപരമാണെന്നും പ്രവാസ ജീവിതം അവസാനിപിച്ചു നാട്ടിലേക്കെത്തുന്ന എല്ലാവര്‍ക്കും പ്രവാസ ക്ഷേമനിധിയില്‍ അംഗത്വം  നല്‍കണമെന്നുമാണ് ഹര്‍ജിയിലെ പ്രധാന ആവശ്യം. പ്രവാസി  ലീഗല്‍  സെല്ലിനുവേണ്ടി സംഘടനയുടെ ഗ്ലോബല്‍ പ്രസിഡന്റ്  അഡ്വ. ജോസ്  എബ്രഹാമാണ് ഹൈക്കോടതിയില്‍ ഹാജരായത്

അറുപതു വയസിനുശേഷം പ്രവാസജീവിതം അവസാനിപ്പിച്ച്  വരുന്നവര്‍ക്കും ക്ഷേമനിധിയില്‍ അംഗത്വം ലഭിക്കുന്നതിനാവശ്യമായ നടപടികള്‍ കോടതിയുടെ ഉത്തരവിന്റെ പശ്ചാത്തലത്തില്‍ സ്വീകരിക്കുന്നമെന്ന് പ്രതീക്ഷിക്കുന്നതായി പ്രവാസി ലീഗല്‍ സെല്‍ കുവൈറ്റ് കണ്‍ട്രി ഹെഡ് ബാബു ഫ്രാന്‍സീസും, ജനറല്‍ സെക്രട്ടറി ബിജു സ്റ്റീഫനും അറിയിച്ചു.