മനാമ: ഫ്രഞ്ച് ഭാഷയെയും സംസ്‌കാരത്തെയും പരിചയപ്പെടുത്തുന്ന വിവിധ പരിപാടികളോടെ ബഹ്‌റൈനിലെ ഇന്ത്യന്‍ സ്‌കൂളില്‍ ഫ്രഞ്ച് ദിനം ആഘോഷിച്ചു. സ്‌കൂള്‍ പ്രാര്‍ത്ഥനയോടെ പരിപാടി ആരംഭിച്ചു.
കവിത പാരായണം, ഫ്രഞ്ച് ഭാഷയിലെ പ്രസംഗങ്ങള്‍, ഗാനങ്ങള്‍, റോള്‍ പ്ലേകള്‍, ഇന്‍സ്ട്രുമെന്റല്‍ മ്യൂസിക്, പവര്‍ പോയിന്റ് പ്രസന്റേഷന്‍ എന്നിങ്ങനെ വിവിധ പരിപാടികളില്‍ വിദ്യാര്‍ത്ഥികള്‍ പങ്കെടുത്തു. വകുപ്പ് മേധാവി ട്രെവിസ് മിഷേല്‍ പരിപാടിയുടെ മേല്‍നോട്ടം നിര്‍വഹിച്ചു. അഞ്ച് ഭൂഖണ്ഡങ്ങളിലായി 300 ദശലക്ഷത്തിലധികം ആളുകള്‍ ഫ്രഞ്ച് സംസാരിക്കുന്നുണ്ടെന്നും ഫ്രഞ്ച്, ഇംഗ്ലീഷ് തുടങ്ങിയ ഭാഷകള്‍ സംസാരിക്കാനുള്ള കഴിവ് അന്താരാഷ്ട്ര തൊഴില്‍ വിപണിയില്‍ ഒരു നേട്ടമാണെന്നും ഇന്ത്യന്‍ സ്‌കൂള്‍ ചെയര്‍മാന്‍ പ്രിന്‍സ് എസ് നടരാജന്‍ സന്ദേശത്തില്‍ പറഞ്ഞു.
അന്താരാഷ്ട്ര ഭാഷ എന്ന നിലയില്‍ ഫ്രഞ്ച് പഠനം, തിയേറ്റര്‍, ദൃശ്യ കല, നൃത്തം വാസ്തുവിദ്യ, ഫ്രഞ്ച് സാഹിത്യത്തിലെ കൃതികള്‍ അതുപോലെ സിനിമകള്‍, ഗാനങ്ങള്‍ തുടങ്ങിയവ അടുത്തറിയാന്‍ ഉപകാരപ്പെടുമെന്ന് ഇന്ത്യന്‍ സ്‌കൂള്‍ സെക്രട്ടറി സജി ആന്റണി പറഞ്ഞു. ഫ്രഞ്ച് ഭാഷയില്‍ ആഘോഷങ്ങള്‍ സംഘടിപ്പിക്കുന്നതിനുള്ള ഇന്ത്യന്‍ സ്‌കൂള്‍ അധ്യാപകരുടെ ശ്രമങ്ങളെ പ്രിന്‍സിപ്പല്‍ വി ആര്‍ പളനിസ്വാമി അഭിനന്ദിച്ചു.
