മനാമ: ഇന്ത്യന്‍ സ്‌കൂള്‍ ബഹ്റൈന്‍, ഇന്ത്യന്‍ എംബസിയുടെ സഹകരണത്തോടെ വിശ്വ ഹിന്ദി ദിവസ് 2021 ഓണ്‍ലൈനായി ആഘോഷിച്ചു. ദേശീയഗാനത്തോടെ പരിപാടി ആരംഭിച്ചു. തുടര്‍ന്ന് സ്‌കൂള്‍ പ്രാര്‍ത്ഥനയും. ഹിന്ദി വകുപ്പ് മേധാവി ബാബൂ ഖാന്‍ സ്വാഗതം പറഞ്ഞു.
രണ്ട് ഘട്ടങ്ങളായി നടത്തിയ ഒരാഴ്ച നീണ്ടുനിന്ന ആഘോഷത്തിന്റെ സമാപനമായിരുന്നു പരിപാടികള്‍. ആദ്യ ഘട്ടത്തില്‍ ഇന്റര്‍-സ്‌കൂള്‍ മത്സരങ്ങളും സാംസ്‌കാരിക പ്രവര്‍ത്തനങ്ങളും സംഘടിപ്പിച്ചു. ന്യൂ മില്ലേനിയം സ്‌കൂള്‍, ഏഷ്യന്‍ സ്‌കൂള്‍, ന്യൂ ഇന്ത്യന്‍ സ്‌കൂള്‍, ബഹ്റൈന്‍ ഇന്ത്യന്‍ സ്‌കൂള്‍, ഇബന്‍ അല്‍ ഹൈതം ഇസ്ലാമിക് സ്‌കൂള്‍, ന്യൂ ഹൊറൈസണ്‍ സ്‌കൂള്‍ എന്നിവയാണ് മത്സരങ്ങളില്‍ പങ്കെടുത്ത മറ്റ് സിബിഎസ്ഇ സ്‌കൂളുകള്‍. മത്സരങ്ങള്‍ക്ക് പുറമെ ദേശസ്‌നേഹ ഗാനങ്ങള്‍ പോലുള്ള വൈവിധ്യമാര്‍ന്ന പരിപാടികളും ഉണ്ടായിരുന്നു. ഗണേഷ് ബി പവാര്‍ (ഡീന്‍ സ്റ്റുഡന്റ്‌സ് വെല്‍ഫെയര്‍ & ഹിന്ദി വകുപ്പ് മേധാവി, കര്‍ണാടക സെന്‍ട്രല്‍ യൂണിവേഴ്സിറ്റി), അസോസിയേറ്റ് പ്രൊഫസര്‍ ജയ പ്രിയദര്‍ശിനി ശുക്ല (അലിഗഡ് മുസ്ലിം യൂണിവേഴ്സിറ്റി) എന്നിവരായിരുന്നു വിധികര്‍ത്താക്കള്‍. പ്രൊഫ. ഗണേഷ് ബി പവാര്‍ ഹിന്ദി ഭാഷയുടെ സംഭാവന എടുത്തുകാട്ടുകയും പരിപാടിയെ അഭിനന്ദിക്കുകയും ചെയ്തു, ആഘോഷം ഗംഭീരമായി സംഘടിപ്പിക്കാനുള്ള ശ്രമങ്ങളെ പ്രൊഫ. ജയ പ്രിയദര്‍ശിനി ശുക്ല അഭിനന്ദിച്ചു. അനൂജ ശ്രീനിവാസന്‍ നന്ദി പറഞ്ഞു.
ജനുവരി 10 ന് ഇന്ത്യന്‍ എംബസിയില്‍ അവാര്‍ഡ് ദാന ചടങ്ങ് നടന്നു. ഇന്ത്യന്‍ അംബാസഡര്‍ പീയൂഷ് ശ്രീവാസ്തവ ട്രോഫിയും സര്‍ട്ടിഫിക്കറ്റും വിതരണം ചെയ്തു. പരിപാടി ഏകോപിപ്പിക്കുന്നതില്‍ ഹിന്ദി അധ്യാപകരുടെയും ആഘോഷത്തില്‍ സജീവമായി പങ്കെടുത്ത വിദ്യാര്‍ത്ഥികളുടെയും ശ്രമങ്ങളെ പ്രിന്‍സിപ്പല്‍ വി ആര്‍ പളനിസ്വാമി അഭിനന്ദിച്ചു. തന്റെ സന്ദേശത്തില്‍ ഇന്ത്യന്‍ സ്‌കൂള്‍ ചെയര്‍മാന്‍ ലോക ചരിത്രത്തില്‍ ഹിന്ദി വളരെയധികം സ്വാധീനം ചെലുത്തിയെന്നു മാത്രമല്ല, ഇന്നും ലോകത്തെ വളരെയധികം സ്വാധീനിക്കുന്നുവെന്നു പറഞ്ഞു. ലോക സംസ്‌കാരങ്ങളുടെ ചരിത്രപരമായ വികാസത്തില്‍ ഹിന്ദി ഏറെ പ്രാധാന്യമര്‍ഹിക്കുന്നുവെന്നു സ്‌കൂള്‍ സെക്രട്ടറി സജി ആന്റണി പറഞ്ഞു.
