മനാമ:ലോകത്തിന്റെ നെറുകയില്‍ ഇന്ത്യയെ എത്തിക്കാന്‍ വേണ്ട അടിസ്ഥാന സൗകര്യങ്ങള്‍ ഉണ്ടാക്കുവാന്‍ അക്ഷീണം പരിശ്രമിച്ച നേതാവായിരുന്നു ഇന്ദിരാ ഗാന്ധിയെന്ന് കോഴിക്കോട് ജില്ലാ കോണ്‍ഗ്രസ് കമ്മറ്റി മുന്‍ പ്രസിഡന്റ് കെസി അബു അഭിപ്രായപ്പെട്ടു. ഒഐസിസി കോഴിക്കോട് ജില്ലാ കമ്മറ്റിയുടെ ആഭിമുഖ്യത്തില്‍ നടത്തിയ ഇന്ദിരാ ഗാന്ധി അനുസ്മരണ സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
മഹാത്മാ ഗാന്ധിയുടെ ലളിതമായ ജീവിതവും നെഹ്റുവിന്റെ വീക്ഷണവും കണ്ടു വളര്‍ന്ന ഇന്ദിരാ ഗാന്ധിക്ക് വളരെ ചെറുപ്പത്തില്‍ തന്നെ ഇന്ത്യന്‍ സ്വാതന്ത്ര്യ സമരത്തില്‍ പങ്കെടുക്കുന്ന ആളുകളെ സഹായിക്കുവാന്‍ വാനര സേന എന്ന പേരില്‍ കുട്ടികളുടെ സംഘടന രൂപീകരിച്ച് അതിന്റെ ആഭിമുഖ്യത്തില്‍ കുട്ടികള്‍ക്ക് ദേശീയ ബോധം ഉണ്ടാക്കുവാന്‍ സാധിച്ചു. ഒഡിഷയില്‍ നടന്ന പൊതുയോഗത്തില്‍ തന്റെ അവസാന തുള്ളി രക്തം പോലും ഇന്ത്യയുടെ ഐക്യത്തിനും അഖണ്ഡതക്കും വേണ്ടി ചൊരിയാന്‍ തയ്യാറാണെന്ന് പ്രഖ്യാപിച്ചു 48 മണിക്കൂറിനുള്ളില്‍ രക്തസാക്ഷിയായി. ആണവ പരീക്ഷണവും, പാകിസ്ഥാന്‍ യുദ്ധവും ഇന്ത്യയുടെ സൈനീക ശക്തിയുടെ കഴിവ് വിളിച്ചോതുന്ന സംഭവങ്ങള്‍ ആയിരുന്നു എന്നും അദ്ദേഹം അഭിപ്രായപ്പെട്ടു.
ഒഐസിസി ആക്ടിങ് പ്രസിഡന്റ് രഞ്ചന്‍ കേച്ചേരി അധ്യക്ഷത വഹിച്ചു. ദേശീയ ജനറല്‍ സെക്രട്ടറി ഗഫൂര്‍ ഉണ്ണികുളം യോഗം നിയന്ത്രിച്ചു. ജനറല്‍ സെക്രട്ടറി ബിജുബാല്‍ സ്വാഗതം ആശംസിച്ചു. ഗ്ലോബല്‍ ജനറല്‍ സെക്രട്ടറി രാജു കല്ലുമ്പുറം മുഖ്യ പ്രഭാഷണം നടത്തി. ദേശീയ പ്രസിഡന്റ് ബിനു കുന്നന്താനം, വൈസ് പ്രസിഡന്റ് ലത്തീഫ് ആയംചേരി, ജനറല്‍ സെക്രട്ടറി ബോബി പാറയില്‍ സെക്രട്ടറിമാരായ രവി സോള, മനു മാത്യു, ഷാജി തങ്കച്ചന്‍, ജില്ലാ നേതാക്കളായ മുഹമ്മദ് ഷമീം, കെ. സി, ചെമ്പന്‍ ജലാല്‍, റംഷാദ് അയിലക്കാട്, സല്‍മാനുല്‍ ഫാരിസ്, സുരേഷ് മണ്ടോടി, രവി പേരാമ്പ്ര, സുമേഷ് ആനേരി, ഷാഹിര്‍ മാലോല്‍, ജാലിസ് കുന്നത്ത്കാട്ടില്‍, ഗിരീഷ് കാളിയത്ത്, പ്രദീപ് മൂടാടി, രജിത് മൊട്ടപ്പാറ, അനില്‍ കുമാര്‍, ശ്രീജിത്ത് പാനായി, റഷീദ് മുയിപ്പോത്ത്, വിന്‍സെന്റ് കക്കയം, മുബി കോക്കല്ലൂര്‍, റാഷിക് നന്മിണ്ട എന്നിവര്‍ അനുസ്മരണ പ്രഭാഷണം നടത്തി. ജില്ലാ ട്രഷറര്‍ പ്രദീപ് മേപ്പയൂര്‍ നന്ദി രേഖപ്പെടുത്തി.
