ചെന്നൈ: കോവിഡ്-19 എന്ന മഹാമാരി നിരവധി പേരുടെ ജീവിനോപാധികളെയാണ് ബാധിച്ചത്. ജീവിതം മുന്നോട്ടു കൊണ്ടുപോകാന്‍ വരുമാനമില്ലാതെ ബുദ്ധിമുട്ടുന്ന നിരവധി പേരാണ് നമുക്കു ചുറ്റുമുള്ളത്. കഷ്ടപ്പാടിന്റെയും ബുദ്ധിമുട്ടുകളുടെയും ഇക്കാലത്ത് സല്‍പ്രവൃത്തി കൊണ്ട് മാതൃകയാവുകയാണ് ഒരു തമിഴ്‌നാട്ടുകാരന്‍. തമിഴരസന്‍ എന്നാണ് ഇദ്ദേഹത്തിന്റെ പേര്. മധുര അളങ്കാനെല്ലൂര്‍ സ്വദേശിയായ തമിഴരസന്‍ ചായവില്‍പനക്കാരനാണ്.
ചായവില്‍പനയിലൂടെ ലഭിക്കുന്ന വരുമാനത്തില്‍ ഒരു ഭാഗം പാവപ്പെട്ടവരെയും തെരുവില്‍ കഴിയുന്നവരെയും സഹായിക്കാന്‍ മാറ്റിവെക്കുകയാണ് ഇദ്ദേഹമെന്ന് വാര്‍ത്ത ഏജന്‍സിയായ എ.എന്‍.ഐ. റിപ്പോര്‍ട്ട് ചെയ്യുന്നു.
അളങ്കാനെല്ലൂരിനു സമീപത്തെ ഗ്രാമങ്ങളായ മേട്ടുപ്പട്ടിയിലും പുതുപ്പട്ടിയിലും അതിരാവിലെയും വൈകുന്നേരവും സൈക്കിളില്‍ ചായ വില്‍ക്കുകയാണ് തമിഴരസന്‍ ചെയ്യുന്നത്. ഇതില്‍നിന്ന് ന്യായമായ വരുമാനം തനിക്ക് ലഭിക്കുന്നുണ്ടെന്നും ഇദ്ദേഹം പറയുന്നു.
ചായ വില്‍ക്കുന്നതിനിടെ, വഴിയോരത്തും ക്ഷേത്രങ്ങളുടെ മുന്നിലും ഒക്കെ കാണുന്ന പാവപ്പെട്ടവര്‍ക്ക് തമിഴരസന്‍ സൗജന്യമായി ചായ നല്‍കും. വരുമാനത്തില്‍ ഒരു ഭാഗം ഇത്തരം പാവപ്പെട്ട ആളുകള്‍ക്ക് മൂന്നു നേരം ഭക്ഷണം നല്‍കാനായി മാറ്റിവെക്കുന്നുമുണ്ടെന്നും ഇദ്ദേഹം കൂട്ടിച്ചേര്‍ക്കുന്നു. പ്രദേശത്ത് സ്വന്തമായി ഒരു കട ആരംഭിക്കുക എന്നതും സാമ്പത്തികമായി പിന്നാക്കം നില്‍ക്കുന്നവരെ സഹായിക്കുക എന്നതുമാണ് തന്റെ സ്വപ്‌നമെന്നും തമിഴരസന്‍ വ്യക്തമാക്കുന്നു.
Tamil Nadu: Tamilarasan, a tea seller in Alanganallur, Madurai spends a part of his earnings to feed poor and homeless people. He says, "I sell tea on a bicycle every morning & evening. I also provide food and water to the needy people out of my meagre earnings." (22.07.20) pic.twitter.com/z1qMWj7ezw
— ANI (@ANI) July 22, 2020
content highlights: tamil nadu tea seller spends part of income to feed poor
